Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .vij. Capittel.

1

⁺ALdus is die coninck ende Aman binnen ghegaen dat sij metter coninghinnen drincken souden.

+ A

2

Ende die coninck heeft haer gheseyt oock opden tweeden dach, nae dat hy vanden wijne verwermt was. Wat is v begheerte Esther, dat v die ghegheuen worde? ende wat wildi ghedaen hebben? Oock al begheerde ghy die helicht van mynen rijcke, soo suldijt verweruen.

3

Totten welcken sij gheantwoert heeft. Heb ick gratie in v ooghen gheuonden o coninck, ende eest dat v belieft, soe gheeft my mijn ziele daer ick voer bidde, ende mijn volck daer ick voer smeeke.

4

Want ick ende mijn volck sijn gheleuert dat wy souden worden vernielt, vermoort, ende verdoruen. ⁺Ende och oft wy tot eyghen knechten ende dienstwijuen vercocht worden, soo waert een verdraghelijck quaet, ende ick soude suchtende swijghen. Maer nu isser een ons viant, wiens wreetheyt oock op des conincs hooft wedervloeyet.

+ B

5

Ende die coninck Assuerus antwoerdende, heeft gheseyt. Wie is dese, ende van wat macht is hy, dat hy dese dinghen derret doen?

6

Ende Esther heeft gheseyt, Ons viant ende ons alderquaetste wederpartijder is dese Aman. ⁺Het welck hy hoorende, is ter stont verbaest gheweest, niet connende verdraghen het aensicht des conincs ende der coninghinnen.

+ C

7

Ende die coninck is gram op ghestaen, ende van die plaetse des maeltijts is hy ghegaen in den hof die met boomen beplant was. Aman is oock opghestaen, om dat hy Esther die coninghinne bidden soude voer sijn ziele, want hy verstont wel dat hem vanden coninck quaet bereydt was.

8

Ende als die coninck wederom comen was wt den hof met boomen beplant, ende als hi ghecomen was in die eetplaetse, soe heeft hy gheuonden dat Aman gheuallen was opt beddeken daer Esther op lach, ende hy heeft gheseyt. ⁺Hy wilt oock die coninghinne vercrachten in mijnder teghenwoerdicheyt in mijn huys. Dat woert en was noch wt des conincs mont niet heel ghegaen ende sij bedecten ter stont sijn aensicht.

+ D

9

Ende Harbona een vanden ghesneden camerlingen die in des conincs dienst stonden, heeft gheseyt, Siet daer staet een hout in Amans huys, het welcke hy bereydt hadde voer Mardocheus die voer den coninck ghesproken heeft, hebbende in die hoochde vijftich cubitus. Tot den welcken heeft die coninck gheseyt, Hangt hem daer aen.

10

Aldus is Aman aen die galghe ghehanghen, die hy bereydt hadde Mardocheo, ende des conincs gramscap is gheleghen.