Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .vi. Capittel.

1

DIen nacht heeft die coninck sonder slapen ouerbracht, ⁺ende hy heeft gheboden datmen hem brenghen soude die historien ende ghescriften van die ghesciedenissen der voerleder tijden. Als die voer hem ghelesen worden,

+ A

2

soo eest comen tot dier plaetsen, daert ghescreuen was, Hoe dat Mardocheus vercondicht hadde die laghen van Bagathan ende Thares der ghesneder camerlinghen, die den coninck Assuerus begheerden te vermoorden. Het welck als die coninck ghehoort hadde,

3

soe heeft

[p. *419]

hy gheseyt. Wat eeren ende loon heeft Mardocheus voer dese ghetrouwicheyt ontfanghen? Sijn knechten ende dienaers hebben hem gheseyt. Hy en heeft met allen gheenen loon ontfanghen.

4

Ende ter stont die coninck. Wie esser (seyt hy) in die sale? Want Aman was in die binnenste sale van des conincs huys ghecomen, dat hy den coninck in blasen soude, dat hy Mardocheum soude doen hanghen aen die galghe, die voer hem bereyt was.

5

Die knechten hebben gheantwoert. ⁺Aman staet in die sale. Ende die coninck heeft gheseyt, Laet hem binnen comen.

+ B

6

Ende als hy binnen ghecomen was, soo heeft hy tot hem gheseyt, Wat moetmen den man doen den welcken die coninck begheert te eeren? Ende Aman denckende in sijn herte, ende meynende dat die coninck niemant anders dan hem en wilde eere aendoen,

7

heeft gheantwoert. Die mensch den welcken die coninck wilt eeren,

8

moet ghecleedt worden met coninclijcke cleederen, ende ghesedt worden op een peert welck van des conincs sadel is, ende ontfanghen die coninclijcke croone op sijn hooft,

9

ende die eerlijcste van des conincs princen ende vorsten sal sijn peert houden, ende doer die straten der stadt gaende sal hy roepen ende segghen. ⁺Alsoo sal hy gheeert worden, den welcken die coninck wilt eeren.

+ C

10

Ende die coninck heeft hem gheseyt, Haest v ende nemende een eerlijck cleedt ende een peert, doet alsoe ghy gheseyt hebt Mardocheo den Iode, die voer die doore des pallays sidt. Wacht v dat ghy niet achter en laet van alle dat ghy ghesproken hebt.

11

Hier om heeft Aman ghenomen een eerlijc cleedt, ende een peert, ende heeft Mardocheum ghecleedt, in die strate vander stadt, ende als hy hem opt peert ghestelt hadde, soe ghinck hy vore ende riep, Sulcker eeren is hy weerdich, den welcken die coninck wilt eeren.

12

Ende Mardocheus is weder om ghecomen tot die doore des pallays, ende Aman heeft hem ghehaest tot sijn huys te gaen rou makende, ende met bedecten hoofde.

13

⁺Ende hi heeft Zares sijnder huysvrouwen ende sijnen vrienden vertelt alle dat hem ghesciedt was. Den welcken hebben gheantwoert die wijse mannen die hi in sijnen raet hadde, ende sijn huysvrouwe. Eest dat Mardocheus vander Ioden saet is, voer den welcken ghy hebt begonst te vallen, soo en suldi hem niet moghen wederstaen, maer ghy sult voer sijn aensicht vallen.

+ D

14

Die wijle dat sij noch spraken soo sijn des conincs ghesneden camerlinghen ghecomen, ende hebben hem ghedwonghen haestelijck te comen ter maeltijt den welcken die coninghinne bereyt hadde.