Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .v. Capittel.

1

⁺MAer opden derden dach, soo cleede haer Esther met die coninclijcke cleederen, ende stont in die vorste sale van des conincs huys, welck binnen was teghen ouer des conincs pallays, ende hy sadt op sijnen coninclijcken stoel, in die consistorie des pallays teghen die doore des huys.

+ A

2

Ende als hy Esther die coninghinne hadde ghesien staende, soo heeft sij sijnen ooghen behaecht, ende hy stack wt tot haer die gulden roede, die hy in sijn handt hadde. Die welcke bijcomende heeft dat wterste van sijnder roeden ghecust.

3

Ende die coninck heeft tot haer gheseyt, Wat wildi Esther coninghinne? ende wat is v begheerte? Oock al begheerde ghy die helicht van mijnen rijcke, dat sal v ghegheuen worden.

4

Ende sij antwoerde. Eest dat den coninck belieft, soo bidde ick hertelijck dat ghy tot my heden comen wilt, ende Aman met v totter maeltijt den welcken ick bereyt hebbe.

5

Ende ter stont die coninc. ⁺Roept (seyt hy) haestelijck Aman dat hy Esthers wille onderdanich sij. Aldus sijn die coninck ende Aman ter maeltijt ghecomen den welcken die coninghinne hen bereyt hadde.

+ B

6

Ende die coninck heeft tot haer gheseyt, nae dat hy ouervloedelijck wijn ghedroncken hadde. Wat begheerdi, datmen v gheue? ende waer om bidt ghy? Oock al begheerde ghy dat half deel van mijnen conincrijcke, dat suldi vercrijghen?

7

Den welcken heeft Esther gheantwoert. Mijn begheerte, ende bede is dese.

8

Heb ick voer daensicht des conincs gratie gheuonden, ende belieuet den coninck dat hy my gheue dat ick bidde, ende mijn begheerte volbrenghe. ⁺Soo come die coninck ende Aman ter maeltijt die ick hen bereyt hebbe, ende morghen sal ick den coninck mijnen wille openbaren.

+ C

9

Aldus is op dien dach Aman wt ghegaen blijde ende wel ghemoet. Ende als hi sach Mardocheum sittende voer die doore des pallays, ende dat hy niet alleen voer hem niet op en stont, maer oock hem niet en roerde vander plaetsen daer hy sadt, soo is hy seer verbolghen gheworden,

10

ende verberghende die gramscap ende weder ghekeert sijnde in sijn huys heeft hy te samen gheroepen sijn vrinden ende Zares sijn huysvrouwe,

11

ende hi heeft hen wtgheleyt die grootheyt van sijn rijcdommen, ende die menichte sijnder kinderen, ende met wat glorien dat hem die coninck bouen alle sijn princen ende dienaers verheuen hadde.

12

Ende hier nae heeft hy gheseyt, ⁺Oock soo en heeft die coninghinne Esther niemant anders ter maeltijt gheroepen metten coninck dan my, by die welcke ick morghen oock metten coninck ter noenen eten sal.

+ D

13

Ende als ick alle dese dinghen hebbe, soo dunct my dat ick niet en hebbe, alsoo langhe als ick sie Mardocheum den Iode sitten voer des conincs doore.

14

Ende Zares sijn huysvrouwe ende sijn ander vrienden hebben hem gheantwoert. Ghebiedt dat men bereyde eenen hooghen balck hebbende die lengde van vijftich cubitus, ende segt den coninck morghen vroech dat Mardocheus daer aen ghehanghen worde, ende alsoo suldi metten coninck blijdelijck gaen ter maeltijt. Den raet behaechde hem wel ende hy heeft beuolen datmen een hooghe galghe bereyden soude.