Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .iiij. Capittel.

1

VVelcke dinghen als Mardocheus ghehoort hadde soe heeft hi sijn clederen ghescoert, ⁺ende hi heeft eenen sack aenghedaen, spraeyende asschen op sijn hooft, ende op die strate in midden der stadt heeft hy met luyder stemmen gheroepen, toonende die bitterheyt sijns moets,

+ A

2

ende met desen ghecrijsch was hy tot die doere des pallays gaende. Want ten

[p. *418]

was niet gheorlooft, dat iemant met eenen sack ghecleedt in des conincs pallays soude gaen.

3

Ende in alle die lantscappen, steden, ende plaetsen tot die welcke des conincs wreet beuel comen was, was een seer groote screyinghe onder die Ioden, vasten, ghehuyl, ende weeninghe, ende veel van hen besichden sacken ende asschen voer hen bedde.

4

Ende die Ioncvrouwen van Esther ende die ghesneden camerlinghen sijn inghegaen, ende hebben haer dit ghebootscapt. ⁺Ende doen sij dit ghehoort hadde is sij verslaghen gheweest, ende sij heeft hem een cleedt ghesonden, dat hy den sack wt ghedaen hebbende, dat cleedt aendoen soude, het welcke hy niet en heeft willen nemen.

+ B

5

Ende tot haer gheroepen hebbende Athach den ghesneden camerlinck, den welcken haer die coninck tot eenen dienaer ghegheuen hadde, heeft sij hem beuolen dat hy gaen soude tot Mardocheum, ende van hem vernemen, waer om dat hy dit dede.

6

Ende Athach wtghegaen sijnde is ghegaen tot Mardocheum, staende in der stadt strate, voer die doore des pallays,

7

die welcke hem al te kennen ghegheuen heeft datter ghesciet was, hoe dat Aman gheloeft hadde, dat hy in des conincs scatten soude voer der Ioden doot, siluer inbrenghen.

8

Ende dat inhoudt van tgebodt dat binnen Susan hinck, heeft hy hem ghegheuen dat hijt der coninghinen toonen soude, ende haer vermanen dat sij totten coninck ingaen soude, ⁺ende hem bidden voer haer volck.

+ C

9

Athach wedercomen sijnde heuet Esther al ghebootscapt dat Mardocheus gheseyt hadde.

10

Die welcke heeft hem gheantwoert, ende gheboden dat hy Mardocheo segghen soude.

11

Alle des conincs dienaers, ende alle die lantscappen die onder sijn heerlijcheyt sijn weeten wel, dat soe wie tsij man oft vrouwe ongheroepen in des conincs binnenste sale coemt, sonder eenich vertreck ter stont ghedoot wort, ten sij dat bij auontueren die coninc die gulden roede tot hem wtsteect voer een teeken der goedertierenheyt, ende dat hy alsoe mach te leuen blijuen. Daer om hoe sal ic totten coninc moghen binnen comen, die nu binnen dertich daghen tot hem niet en heb gheroepen gheweest?

12

Het welck als Mardocheus ghehoort heeft,

13

soo heeft hy Esther ontboden, segghende, En meynt niet dat ghi v ziele alleen verlost, ⁺om dat ghy in des conincs huys sijt, bouen alle die Ioden,

+ D

14

want eest dat ghy nu swijcht, soo sullen die Ioden doer een ander oorsake verlost worden, ende ghy ende ws vaders huys sult vergaen. Ende wie weet, oft ghy daer om tot dat conincrijck ghecomen sijt, dat ghy tot sulcken tijt soude bereyt worden.

15

Ende Esther heeft wederom Mardocheo dese woerden ontboden

16

Gaet henen, ende vergadert alle die Ioden, die ghy in Susan vinden sult, ende bidt voer my. En eet niet noch en drinct niet, drij daghen, ende drij nachten lanck, ende ick sal met mijnen dienstioncvrouwen des ghelijck vasten, ende dan sal ick totten coninck ingaen, teghen die wet doende ongheroepen, ende my seluen leuerende ter doot ende ten perikel.

17

Aldus is Mardocheus ghegaen ende hy heuet al ghedaen dat hem Esther beuolen hadde.