Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .iij. Capittel.

1

⁺NAe dese ghesciedenisse, soo heeft die coninck Assuerus verheuen Aman den sone Amadathi, die was van Agags gheslachte, ende hy heeft sijnen princelijcken stoel ghestelt bouen alle Princen die hy hadde.

+ A

2

Ende alle des conincs dienaers die binnen die doore van des conincs palleys verkeerden buychden hen knien, ende aenbaden Aman, want alsoo hadde hen die coninck beuolen. Maer Mardocheus alleen en boochde sijn knien niet, noch en aenbadt hem niet.

3

Tot den welcken seyden des conincs knechten die aen des pallays dooren die ouerste waren. Waerom en onderhoude ghy buyten dandere des conincs ghebodt niet?

4

Ende doen sij dit dicmael seyden, ende hy niet hooren en wilde, soo hebben sij dat Aman ghebootscapt, begherende te weten oft hy in sijnen sin blijuen soude, want hy hadde henlieden gheseyt dat hy een Iode was.

5

Het welcke als Aman ghehoort hadde, ende by ondersoeck beuonden hadde, dat Mardocheus hem gheen knye en boochde, ⁺noch hem niet en aenbadt, so is hy bouen maten seer gram gheworden,

+ B

6

ende hy achte voer niet sijn handen te steken aen Mardocheus alleene, want hy hadde ghehoort dat hy van dat Ioetsche volck was, maer hy heeft meer ghewilt, dat hy alle der Ioden natie welc in Assuerus conincrijck was, vernielen soude.

7

Op dierste maent, die Nisan ghenoemt wort, int twaelfste iaer van Assuerus conincrijck, soo is dlot gheworpen in een cruycke, welck int Hebreusch ghenoemt wort Phur voer Aman, op wat dach ende in welcke maent dat der Ioden volck soude moeten ghedoodt worden, ende daer is wt comen die twaelfste maent, die ghenaemt wort Adar.

8

Ende Aman heeft gheseyt totten coninck Assuerus. Daer es een volck ouer alle die landtscappen ws rijcks verstroyt, ende van sij seluen onderlinghe ghesceyden, ghebruyckende nieuwe wetten, ende ceremonien, ende daer bouen oock des conincs gheboden versmadende. ⁺Ende ghy weet alderbest, dat niet profijtelijck en es uwen rijcke, dat dit volck hoomoedich worde, doer vrijheyt,

+ C

9

dus eest dat v belieft, soe ghebiedt dat dit ghedoot worde, ende ick sal thien duysent talenten by ghewichte gheuen den tresoriers van uwen stadt.

10

Hier om heeft die coninck van sijnder handt ghenomen eenen rinck den welcken hy besichde, ende heeften ghegheuen Aman den sone van Amadathi van Agags gheslachte der Ioden viant,

11

ende hy heeft tot hem gheseyt, Tsiluer dat ghy beloeft dat sij uwe, vanden volcke doet dat v belieft.

12

Ende des conincs scrijuers sijn gheroepen in dierste maent Nisan, op den derthiensten dach der seluer maent, ende daer is ghescreuen ghelijck Aman beuolen hadde tot alle die drossaten des conincs, ende rechters der lantscappen, ende van versceyden volcken, alsoo dat elck volck lesen mocht ende hooren nae die versceydenheyt der talen, wt des conincs Assuerus naem,

13

⁺ende die brieuen met sijnen rinck gheteekent sijn ghesonden doer des conincs loopers, tot alle die lantscappen, dat sij dooden souden, ende te niet doen alle die Ioden vanden kinderen totten ouden lieden, die cleyn kinderen ende vrouwen op eenen dach, dat is op den derthiensten dach van der tweelfster maent, die Adar ghenoemt wort, ende dat sij hen goet souden roouen.

+ D

14

Ende dinhout der brieuen int corte was dit, dat alle die lantscappen weten souden, ende hen bereyden teghen den voerseyden dach.

15

Die loopers die ghesonden waren hebben hen ghehaest, om des conincs ghebodt te voldoen. Ende ter stont heeft in Susan dat ghebodt wt ghehanghen, die wijle dat die coninck ende Aman feestelijcken maeltijt hielen, ende als alle die Ioden die in die stadt waren weenden.