Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .ij. Capittel.

1

ALs dese dinghen aldus ghesciet waren, ⁺nae dat die verbolghentheyt des conincs Assueri vercoelt was, soe es hy ghedachtich gheweest Vasthi, ende wat sij ghedaen, oft wat sij gheleden hadde,

+ A

2

ende die knechten des conincs ende sijn dienaers hebben gheseyt, Laet voer den coninck soecken Ionghe maechden, ende schoone,

3

ende laet wt senden die besien moghen doer alle die lantscappen Ionghe schoon dochteren ende maechden ende dat sij die brenghen tot die stadt Susan, ende die leueren, int vrouwen huys, onder die hant Egeides ghesneden camerlincs, die douerste ende bewaerder es van des conincs vrouwen, ende dat sij nemen vrouwen cieraet, ende andere dinghen nootelijck tot hen behoef,

4

ende welcke onder al des conincs ooghen behaghet, die sij coninghinne voer Vasthi. Dit woert behaechde den coninck, ende ghelijck hy by ghebrocht hadde alsoo gheboodt hy datmen doen soude.

5

Daer was een Ioetsch man in die stadt van Susan ghenaemt Mardocheus, die sone Iair, des soens Semei, des soens Cis, vanden gheslachte van Iemini,

6

die ouerghevoert was van Ierusalem ten tijde doen Nabugodonosor die coninck van Babilonien Ieconiam den coninck van Iuda, ⁺wech ghevoert hadde.

+ B

7

Die welcke was een voesterheere van Edissa sijns broeders dochter, die met eenen anderen naem genaemt was Esther, ende hadde beyde haer ouders verloren, bouen maten schoon ende fray van aensicht, ende nae dat haer vader ende moeder ghestoruen waren, soo heeftse Mardocheus voer sij seluen vercoren tot een dochter.

8

Ende doen des conincs ghebodt vermaert was, ende datter nae sijn ghebodt veel schoon maechden te Susan ghebrocht worden, ende Egeo den ghesneden camerlinck gheleuert, soo is Esther onder die andere ionghe dochters hem oock gheleuert, dat sij bewaert soude worden int ghetal der vrouwen.

9

Die welcke heeft hem behaghet, ende sij heeft gratie vonden in sijn aensicht. Ende hy heeft den ghesneden camerlinck beuolen dat hy haestelijc haer soude gheuen der vrouwen cieraet, ende dat hi haer leueren soude haer deelen, ende seuen die schoonste ioncvrouwen van des conincs huys, ende dat hy soo wel haer als haer camerieren soude vercieren ende naerstelijck toe maken.

10

Die welcke en heeft hem niet willen te kennen gheuen haer volck, ende haer lant. ⁺Want Mardocheus hadde haer beuolen dat sij van desen dinghe teenemael swijghen soude,

+ C

11

die welcke wandelde daghelijcs voer dat poortael des huys daer die vercoren maechden in bewaert worden, sorghe draghende voer die salicheyt van Esther, ende begherende te weten wat haer ghescieden soude.

12

Maer als den tijt comen was van elcker maghet besonder nae die ordinancie, dat sij tot den coninck ingaen souden, als volbracht was alle dat totter vrouwen cieraet behoorde, soo verliept tot die twaelfste maent, alsoo nochtans dat sij die ses maenden worden ghesalft met olie van myrten, ende binnen die ses ander maen besichden sij sommighe andere costelijcke olien, ende specerien.

13

Ende ingaende totten coninck, soo ontfinghen sij al wat sij begheerden der vrouwen ciraet aengaende, ende ghepalleert alsoo hen dat belieft hadde, ghinghen sij van die camer der vrouwen tot des conincs slaepcamer.

14

Ende die tsauonts incomen was, ghinck smorghens wt, ende van daer worden sij in dat tweede huys gheleydt, die onder die hant Susagazi des ghesneden camerlincs waren, die ouer des conincs

[p. *417]

byslaperssen was, noch sij en hadde gheenen orlof by den coninck voerts meer te comen, het en was dat die coninck wilde, ende dat hy gheboodt namelijck dat die comen soude.

15

Ende als den tijt verloopen was nae tveruolghen, soo naecte den dach dat Esther die dochter van Abihail Mardocheus broeder, die welcke hy voer hem tot een dochter vercoren hadde, ingaen soude totten coninck. Die welcke en heeft niet begheert der vrouwen cieraet, maer alle dat Egeus die ghesneden camerlinck der maechden bewaerder wilde, dat heeft hy haer tot cieraet ghegheuen. Want sij was seer schoon, ende van ongheloofelijcker schoonheyt, soo scheen sij voer die ooghen van allen menschen gratioes ende minlijck.

16

Aldus is sij gheleyt tot die slaepcamer des conincs Assueri in die thienste maent, die ghenoemt worde Tebeth, int seuenste iaer sijns conincrijcs

17

ende die coninck heeft haer lief ghehadt bouen alle ander vrouwen, ende sij hadde gratie ende bermherticheyt voer hem bouen alle vrouwen, ende hy heeft die croone des conincrijcs op haer hoofd ghestelt, ende heeft haer doen regneren in die plaetse van Vasthi.

18

Ende hy heeft gheboden datmen eenen seer heerlijcken maeltijt soude bereyden, allen sijnen princen, ende knechten, om dat versamen ende die bruyloft van Esther. Ende hy heeft alle den lantscappen rust ghegheuen, ende giften ghegheuen, ⁺nae sijn princelijcke miltheyt.

+ D

19

Ende alsmen ten tweeden male maechden socht ende vergaderde, soo woonde Mardocheus aen des conincs doore,

20

ende Esther en hadde noch niet te kennen ghegheuen haer lant ende volck, nae sijn ghebodt. Want al wat hy gheboodt dat dat onderhiel Esther, ende sij dede alle dinghen alsoo sij ghewoon was op dien tijt, doen hy haer een cleyn kint wesende op voedde.

21

Aldus op dien tijt dat Mardocheus by des conincs poorte woonde, sijn gram gheworden Bagathan ende Thares twee van des conincs ghesneden dienaers die doerwaerders waren, ende aen den iersten inganck des pallays die ouerste waren, ende sij wilden opstaen teghen den coninck, ende hem dooden.

22

Het welcke voer Mardocheus niet is verborghen gheweest, ende hy heeft dat ter stont ghebootscapt Esther der coninghinnen, ende sij den coninck wt Mardocheus naem, die dit dinck haer ouerghebracht hadde.

23

Het es ondersocht, ende beuonden, ende sij sijn alle beyde aen die galghe ghehanghen. Ende het is ghestelt in die historien ende ghescreuen in die cronijcken van die iaerlijcsche ghesciedenissen, voer den coninck.