Den gheheelen Bybel, Inhoudende het oude ende nieuwe Testament (Leuvense bijbel 1548)

Dat ierste Capittel

1

⁺IN die daghen van Assuerus, die gheregneert heeft van Indien totten Morianen landt toe, ouer hondert ende seuenentwintich lantscappen,

+ A

2

als hy sadt inden stoel sijns rijcs, soo was die stadt Susan tbeghinsel van sijnen rijcke.

3

Ende in den derden iare van sijnen rijcke heeft hy ghemaect eenen grooten maeltijt allen sijnen princen ende dienaren, den stercsten van Persen ende den heerlijcsten vanden Meden, ende den presidenten vanden lantscappen voer hem,

4

om dat hy vertoonen soude die rijckdommen van die glorie sijns rijcs, ende die grootheyt ende beroemelijcheyt van sijnder moghentheyt langhen tijt, te weten hondert ende tachtentich daghen lanck.

5

Ende als die daghen des maeltijts wt ghinghen, soo heeft hy ghenoodt alle tvolckdat in Susan gheuonden is vanden meesten totten minsten, ende hy heeft beuolen datmen seuen daghen lanck den maeltijt soude bereyden inden inganck des hofs, ⁺ende des boschs, het welck doer des conincs oeffeninghe ende handt beplant was.

+ B

6

Ende daer hinghen aen alle sijden ghespannen tapijten, van hemelsblau, van gruen ende van roode colueren ghehouden met witte lijnen ende purpuren coerden, die doer yuooren ringhen ghetrocken waren, ende worden van marmoren columnen onderhouden.

7

Ende gulden ende silueren beddekens waren ghestelt opt pauiment, dwelck met Smaragdus steenen ende marmor steenen ghepaueyt was, het welck een scilderie van wonderlijcke versceyden verwen vercierde. Ende alle die ghenoodt waren droncken wt gouden coppen, ende met verscheyden scotelen worden die spijsen inghebracht. Oock worde daer wijn (ghelijck der coninclijcker hoocheyt betaemde) ouervloedich ende seer sonderlinghe ghestelt.

8

Ende daer en was niemandt die hen bedwanck te drincken, diet niet en wilden. Maer ghelijck die coninck ghestelt hadde, settende ouer die tafelen eenen besonderen van sijnen Princen, dat een yeghelijck ne-

[p. *416]

men soude dat hy wilde.

9

Ende Vasthi die coninghinne heeft eenen maeltijt van vrouwen ghemaect int pallays, daer die coninck Assuerus plach te woonen.

10

Aldus opden seuensten dach als die coninck vrolijcker was, ende nae te veel drinckens vanden wijn verwermt was, soo heeft hy beuolen Mamnan ende Bazatha, ende Harbona, ende Bagatha, ende Abgatha, ende Zethar, ende Charchas, den seuen ghesneden camerlinghen, die voer sijn aensicht dienden,

11

dat sij souden inbrenghen die coninghinne Vasthi voer den coninck met die coninclijcke croone op haer hooft ghestelt, om dat hy thoonen soude alle den volcken ende den princen haer schoonheyt. Want sij was seer schoone.

12

Die welcke heeft dat gheweyghert, ende heeft versmaet te comen tot des conincs ghebode, dwelck hy doer die ghesneden camerlinghen ontboden hadde. Waer om die coninck gram sijnde, ende met een seer groote verbolghentheyt onsteken,

13

⁺heeft ghevraecht die wijse die nae die coninclijcke maniere altijt by hem waren, ende doer welcker raet hy alle dinghen dede, wetende die wetten ende rechten der ouderen

+ C

14

(ende het waren dierste ende die naeste Charsena, ende Sethar, ende Admatha, ende Tharsis, ende Mares, ende Marsana, ende Mamuchan, seuen vorsten der Persen ende Meden, die des conincs aensicht saghen, ende dierste nae hem plaghen te sitten)

15

wat recht datmen ouer die coninghinne Vasthi doen soude, die des conincs Assueri ghebodt (dwelck hy doer sijn ghesneden camerlinghen gheboden hadde) niet en hadde willen doen.

16

Ende Mamuchan heeft gheantworwoert, dat die coninck hoorde ende die princen. Die coninghinne Vasthi en heeft den coninck niet alleen te cort ghedaen, maer oock alle den luyden, ende princen, die in alle die lantscappen des conincs Assueri sijn.

17

Want het woert vander coninghinnen sal voerts wt comen tot allen vrouwen, dat sij hen mans sullen verachten, ende segghen, Die coninck Assuerus heeft gheboden dat die coninghinne Vasthi tot hem incomen soude, ende sij en heeft dat niet willen doen,

18

⁺ende doer dit exempel sullen alle die huysvrouwen vanden princen der Persen ende Meden cleynachten die gheboden van haren mans. Daer om is des conincs verbolghentheyt rechtuerdich.

+ D

19

Eest dat v belieft Laet een ghebodt wtgaen van v aensicht, ende laet dat scrijuen nae die wet der Persen ende Meden die welcke men niet ouertreden en mach, dat Vasthi die coninghinne voertaen gheenssins meer binnen en come tot den coninck, maer dat haer conincrijck een ander (die beter sij dan sij) ontfange.

20

Ende laet dat ouer alle trijck uwer lantscappen (het welck seer wijt es) vercondighen, ende dat alle die huysvrouwen, soo wel van die meeste als van die minste haren mans eere bewijsen.

21

Sijnen raet heeft den coninck behaecht, ende den princen, ende die coninck heeft ghedaen nae den raet van Mamuchan,

22

ende hi heeft brieuen ghesonden tot alle die lantscappen van sijnen rijcke, alsoo dat elc volc hooren ende lesen mochte met versceyden talen ende letteren, dat die mans princen ende ouerste waren in hen huysen, ende datmen dit soude vercondighen ouer alle natien van volcke.