Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xv. Capittel.

1

⁺ENde als alle theyr ghehoort hadde, dat Holofernes onthalst was, soo vloodt sin ende raet van hen, ende alleen doer anxt ende vreese ghedreuen sijnde hebben sij die vlucht ter helpen ghenomen,

+ A

2

alsoo dat niemant met sijnen naesten en sprack, maer met gheneychden hoofden, alle dinghen achterlatende hebben sij alle ghehaest om te ontgaen die Hebreussche (die sij ghehoort hadden ghewapent op hen te comen) vliedende doer der velden weghen, ende der hueuelen paden.

3

Hier om die kinderen van Israel siende hen vlieden sijn hen nae gheuolcht. Ende sij sijn nederwaerts gheloopen, gheclanck makende met trompetten, ende huylende hen nae.

4

Ende want die Assyriers niet vergadert in die vlucht onuersienlijck liepen, ende die kinderen van Israel met eenen hoop hen veruolghden, ⁺soo hebben sij ghecrenct, alle die sij vinden mochten.

+ B

5

Hier om heeft Ozias boden ghesonden doer alle die steden ende landen van Israel.

6

Aldus soo hebben alle die landtscappen ende alle die steden wt gheghecoren ionghe mannen ghewapent nae hen lieden ghesonden, ende sij hebbense veruolcht doert scerp vanden sweerde, tot dat sij quamen tot dat wterste van haren palen.

7

Ende die andere die in Bethulien waren sijn ghegaen in den legher vanden Assyriers ende hebben wech ghedraghen den roofden welcken die Assyriers vliedende achterghelaten hadden, ende waren seer gheladen.

8

Maer de ghene die verwinders wederom comen sijn te Bethulien hebben met hen ghebrocht alle dat den Assyriers toe behoorde, ⁺alsoo datter gheen ghetal en was van cleynen vee, ende groot vee, ende van allen haren hauelijcken goeden, alsoo dat sij van den minsten totten meesten alle rijck worden van haren rooue.

+ C

9

Maer Ioachim die ouerste priester van Ierusalem is comen in Bethulien, met alle sijnen priesteren dat hy Iudith sien soude.

10

Die welcke (als sij tot hem wt ghegaen was) soo hebben sij daer alle ghebenedijt, met eender stemmen, segghende, Ghy sijt die glorie van Ierusalem, ghy sijt die blijscap van Israel, ghy sijt die eerlijcheyt van onsen volcke,

11

want ghy hebt manlijck ghedaen, ende v herte is versterct, om dat ghy die suyuerheyt bemint hebt, ⁺ende nae uwen man gheenen anderen bekent en hebt, daer om heeft v die hant des Heeren ooc versterct, ende daer om sult ghy ghebenedijt sijn inder eewicheyt.

+ D

12

Ende alle tvolck heeft gheseyt. Dat moet ghescieden, dat moet ghescieden.

13

Ende binnen dertich daghen sijn die roouen der Assyriers nauwelijck vergadert vanden volcke van Israel.

14

Maer alle die dinghen die beuonden worden datse Holofernes eyghen waren hebben sij Iudith ghegheuen in gout, ende siluer, ende cleederen, ende costelijcke ghesteente, ende in allen huysraet, ende die sijn haer al ghegheuen vanden volcke.

15

Ende alle die luyden verblijdden hen metten vrouwen, ende maechden, ende ionghelinghen, met pijpen ende herpen.