Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xvi. Capittel.

1

⁺DOen heeft Iudith dit liedeken den Heere ghesonghen segghende,

+ A

2

Beghint den Heere met bommen, singhet den Heere op cymbalen, singhet hem soetelijck eenen nieuwen loff sanck, verhuecht v, ende aenroept sijnen naem.

3

Die Heere in stucken brekende die orloghen, die Heere is sijnen naem.

4

Die sijn heyrlegers ghestelt heeft int midden van sijnen volcke om dat hy ons soude verlossen wt die hant van allen onsen vianden.

5

Assur is comen wt die berghen vanden noorden, in die menichte van sijnder stercheyt, wiens menichte heeft die beken ghestopt, ende hen peerden hebben die valleyen ouerdect.

6

Hy heeft gheseyt dat hy mijn palen verbranden soude, ende mijn ionghelinghen dooden metten sweerde, mijn ionghe kinderkens gheuen ten rooue, ende mijn maechden ter gheuanghenissen.

7

Maer die almachtighe Heere heeft hem beledt, ⁺ende heeft hem gheleuert in eender vrouwen hant, ende hem doersteken.

+ B

8

Want haerlieden machtighe en is niet gheuallen doer die ionghelinghen, noch Tytans kinderen en hebben hem niet gheslaghen, noch die hooghe ruesen en hebben hen teghen hem niet ghestelt, maer Iudith die dochter van Merari heeft hem sijn macht ghenomen doer die scoonheyt haers aensichts.

9

Want sij heeft haer ontcleedt van haer weduwelijck cleedt, ende heeft haer ghecleedt met een cleedt der vrolijcheyt int verhueghen der kinderen van Israel.

10

Sij heeft haer aensicht ghesalft met costelijcke olie, ende haer vlechten heeft sij ghebonden met een costelijck hooft cieraet, sij heeft een nieuwe cleedt ghenomen om hem te bedrieghen.

11

Haer pantoffelen hebben sijn ooghen berooft, haer schoonheyt heeft sijn ziele gheuanghen, sij heeft met een sweert sijnen neck aff ghehouden.

[p. *415]

12

Die Persen hebben hen verscrict van haer stantachticheyt, ende die Meden van haer stouticheyt.

13

Doen huylden die heyrleghers vanden Assyrien, als mijn ootmoedighe ghesien worden verdorrende van dorste.

14

Die kinderen der iongher vrouwen hebbense doersteken, ende ghelijck kinderen vliedende hebben sij die ghedoot, sij sijn inden strijt ghedoodt van daensicht des Heeren mijns Godts.

15

Laet ons den Heere eenen lof sanck singhen, Laet ons eenen nieuwen lof sanck onsen Godt singhen,

16

Adonai Heere groot sijt ghy, ende heerlijc in v cracht, ende den welcken niemant verwinnen en mach.

17

Alle v creatuere moet v dienen, want ghy hebbet ghesproken, ende sij worde ghemaect, ghy hebt uwen gheest ghesonden ende sij worde ghescapen, ende daer en is niemant die uwer stemmen mach wederstaen.

18

Die berghen sullen vanden fundamenten beroert worden metten wateren, die steenrootsen sullen ghelijck was smelten voer v aensicht.

19

⁺Maer die v vreesen, sullen groot wesen by v in alle dinghen.

+ C

20

Wee den volcke welck opstaet teghen mijn volck, want die almachtighe Heere salt aen hen lieden wreken, in den dach des ordeels sal hy die besoecken.

21

Want hy sal vier ende wormen gheuen in hen vleesch, dat sij ghebrant worden ende ghevuelen dat tot inder eewicheyt.

22

Ende tes ghesciet nae desen, dat alle tvolck nae die victorie is comen in Ierusalem den Heere aenbidden, ende alsoe haest als sij gesuyuert waren, soo hebben sij alle gheoffert hen brant offeranden, ende hen begheerten ende beloften.

23

Maer Iudith heeft alle die orloochsche wapenen van Holofernes die welcke haer het volck ghegheuen hadde, ende dat behancsel dat sij wech ghenomen hadde, wt sijn camer gheoffert, tot een Godts offerande der verghetelijcheyt.

24

Ende tvolck was blijde nae dat aensicht der heyleghen, ende drij maenden lanck is die blijscap van deser victorien feestelijck gheviert met Iudith.

25

⁺Maer nae die daghen is een ieghelijck wederom in sijn huys ghegaen, ende Iudith es groot gheworden in Bethulien, ende sij was die vermaerste van alle den lande, van Israel.

+ D

26

Sij was ooc met die duecht der reynicheyt vereenicht, alsoo dat sij gheenen man en bekende alle die daghen haers leuens, van dat Manasses haer man ghestoruen is.

27

Ende op die feestdaghen soo ghinck sij int openbaer met grooter glorien.

28

Ende sij is ghebleuen in haers mans huys hondert ende vijf iaren, ende sij heeft haer ionghe dienstvrouwe vrij laten gaen, ende sij is ghestoruen, ende begrauen by haren man in Bethulien.

29

Ende alle tvolck heeft haer bescreydt seuen daghen lanck.

30

Ende binnen allen den tijt van haren leuen, soo en wasser niemant die Israel verstoorde, ende nae haer doot tot veel iaren toe.

31

Ende den dach van die feeste deser victorien wort vanden Hebreusschen int ghetal vanden heyleghen daghen ontfanghen, ende wort gheviert vanden Ioden van dien tijt aen tot op den teghenwoerdighen dach toe.

Hier eyndet dat boeck van Iudith.