Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xiiij. Capittel.

1

⁺ENde Iudith heeft gheseyt tot alle den volcke, Hoort my broeders, Hangt dit hooft op onse mueren,

+ A

2

ende tsal sijn als die sonne op gaen sal, dat een ieghelijck neme sijn wapenen, ende gaet wt met eenen ghedruyssche, niet om nederwaerts te gane, maer als eenen oploop makende.

3

Dan salt van noode sijn dat die bespieders vlieden sullen om haer lieder prince ten stryde te verwecken.

4

Ende als hen hooftmannen sullen loopen tot het tabernakel van Holofernes, ende hem vinden sullen onthooft in sijn bloet ghewentelt, soo sal die vreese hen gheheel oueruallen.

5

Ende als ghy weet dat sij vlieden, soo gaet hen na vrijlijck, want die Heere salse vernielen onder v voeten.

6

⁺Achior doen siende die cracht die Israels Godt ghedaen hadde, verlatende die zeden der heydenscap heeft Gode ghelooft, ende heeft besneden dat vleesch van die voorhuyt sijnder manlijckheyt, ende hy is versaemt met den volcke van Israel, ende alle die nacomelinghen van sijnen gheslachte, tot op den dach van heden toe.

+ B

8

Ende soo haest als den dach op ghegaen was so hebben

[p. *414]

sij op die mueren ghehanghen Holofernis hooft, ende elck man heeft sijn wapenen ghenomen, ende sij sijn wt ghegaen met een groot ghecrysch ende ghehuyl.

8

Het welcke die bespieders siende sijn gheloopen tot Holofernis tabernakel.

9

Maer die int tabernakel waren comende, ende voer den inganck des slaepcamers gheluyt makende, om hem te wecken, hebben sij looselijck gherucht ghepijnt te maken, dat Holofernes niet vanden ghenen die hem wecten, maer vanden ghenen diet gherucht maecten ontspringhen soude.

10

Want niemant en dorste die slaepcamer van die cracht der Assyrien cloppende oft ingaende open doen.

11

⁺Maer doen sijn hooftmannen ende duysent mannen comen waren, ende alle die meeste van des conincs van Assyrien heyr, soo seyden sij tot die camerlinghen.

+ C

12

Gaet binnen ende wect hem. Want die muysen sijn wt haren holen comen, ende dorren ons beroepen ten strijde.

13

Doen is Vagao in die slaepcamer ghegaen, ende stont voer die gordijne, ende heeft een cloppinghe met sijnen handen te gader ghemaect, want hy vermoedde dat hy met Iudith sliep.

14

Maer doen hi gheen verroeringhe van hem die daer lach, met dat ghevuelen sijnder ooren en vernam, soo is hy naerder ghecomen by die gordijne, ende die opheffende ende siende het doot lichaem van Holofernis sonder hooft in sijn bloet veruuylt ligghende op die aerde, ⁺soo heeft hy gheroepen met luyder stemmen, ende met weenen, ende heeft sijn cleederen ghescoert.

+ D

15

Ende gaende in Iudiths tabernakel en heeft hy haer niet gheuonden, ende hy es wt ghespronghen buyten totten volcke ende heeft gheseyt,

16

Een Hebreussche vrouwe heeft een bescaemtheyt ghemaect in Nabugodonosor des conincs huys. Want siet Holofernes leyt op deerde, ende sijn hooft en is aen hem niet.

17

Het welck als die princen van die macht der Assyrien ghehoort hebben, soo hebben sij allegader hen cleederen ghescoert, ende een onuerdraghelijcke vreese ende beuinghe heeft hen oueruallen, ende hen moeden sijn seer verbaest gheworden.

18

Ende daer is een onghelijckelijck gheroep opghestaen int midden vanharen heyrlegher.