Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xiii. Capittel.

1

⁺ENde alst spade gheworden was, soo hebben sijn knechten ghehaest tot haerlieden her-

+ A

[p. *413]

berghe te gaen. Ende Vagao heeft die dooren vander slaepcamer ghesloten, ende hy is wech ghegaen,

2

ende sij waren alle mat vanden wijne,

3

ende Iudith was alleene in die slaepcamer,

4

maer Holofernes lach int bedde van te zeer groote dronckenheijt ontslapen.

5

Ende Iudith heeft haren ioncwyue gheseyt, dat si buyten staen soude voor die slaepcamer, ende hoede draghen.

6

Ende Iudith heeft voor tbedde ghestaen, biddende met tranen ende met rueren der lippen in stillicheyt,

7

segghende, Versterct my Heere Godt van Israel, ende aensiet in dese vre tot die wercken van mijnen handen, op dat ghij (ghelijck ghij gheloeft hebt) Ierusalem v stadt opricht, ende dat ic volbrenghen mach tghene dat ick ghedacht hebbe, gheloouende dat dit door v soude moghen ghedaen worden.

8

Ende doen si dese woorden gheseyt hadde, soo is zij ghegaen tot die columne die aent hooft van sijne beddeken was, ende zy heeft het swaert dat daer aen ghebonden hinck, ontbonden.

9

Ende doen zij dat wter sceyden ghetrocken hadde, soo heeft si dat hair zijns hoofts ghegrepen, ende gheseyt, Versterct mi Heere Godt in dese vre,

10

ende zij heeft tweewerff in sijnen neck gheslaghen, ende heeft zijn hooft aff ghehouwen. Ende zij heeft zijn bedde behancsel aff ghenomen van die columnen, ende heeft zijn onthooft lichaem aff ghewentelt.

11

Ende nae een luttelken tijts is zij wtghecomen, ende heeft dat hooft van Holofernes ghegheuen haerder dienst ioncvrouwen, ende beuolen dat zij dat steken soude in haer male.

12

Ende zij twee sijn wt ghegaen, nae hen ghewoonte, als ten ghebede gaende, ende sij zijn die heyrleghers door ghegaen, ⁺ende drayende om die valleye sijn zij ghecomen totter stadt poorte.

+ B

13

Ende Iudith heeft gheseyt van verre den wachters der mueren. Doet die poorten open, Want Godt es met ons, die cracht ghedaen heeft in Israel.

14

Ende tes gheschiet, doen die mannen haer stemme ghehoort hadden, soo hebbensij gheroepen die ouders vander stadt,

15

ende si zijn tot haer alle te ghemoete gheloopen vanden minsten tot den meesten, Want sij vermoedden, dat zij nv niet wedercomen en soude.

16

Ende onstekende lichten, zijn sij alle rontsomme haer ghecomen, ende sij climmende op een hooghe plaetse heeft gheboden datmen swyghen soude. Ende als sij alle sweghen,

17

soo heeft Iudith gheseyt, Loeft den Heere onsen Godt, die niet en heeft verlaten die in hem hopende zijn,

18

ende door my sijn dienstvrouwe heeft hy volbracht sijn bermherticheyt, die hij beloeft heeft den huyse van Israrael, ende heeft ghedoot met mijnder hant den vyant van sijnen volcke in desen nacht.

19

Ende voortbrenghende wter malen dat hooft van Holofernes, heeft sij hen dat ghetoont, segghende, Siet dats thooft van Holofernes des princes van die orloosch mannen der Assyrien. Ende siet sijn bedde behancsel daer in dat hy lach in zijn dronckenscap, daer die Heere onse Godt hem gheslaghen heeft door die hant van eender vrouwen.

20

⁺Ende soo warachtelijck als die Heere selue leeft, sooheeft sijnen enghel my bewaert, ende van hier gaende, ende daer blyuende, ende van daer wederom herwaerts comende, ende die Heere en heeft my sijn dienstvrouwe niet laten ontsuyuert worden, maer sonder besmettinghe der sonden heeft hy my wederom gheroepen tot v lieden, blijde in sijn victorie, ende in mijnen ontgaen, ende in uwe verlossinghe.

+ C

21

Looft hem alle gader, want hy goet is, want inder eewiheyt is sijn bermherticheyt.

22

Ende sij alle gader den Heere aenbiddende, hebben gheseyt tot haer, Die Heere heeft v ghebenedijt in sijn cracht, want door v heeft hy te niet bracht onse vyanden.

23

Maer Ozias die prince des volcs van Israel heeft tot haer gheseyt, Ghebenedijt sijt ghij dochter van den hooghen Heere Godt, bouen allen vrouwen op der aerden.

24

Ghebenedijt sij die Heere, die hemel ende aerde ghescapen heeft, die v wt ghescict heeft tot die wonden van dat hooft des princen van onsen vyanden.

25

Want heden heeft hy uwen naem alsoo groot ghemaect, dat uwen loff niet vergaen en sal wt den mont der menschen, die ghedachtich sullen sijn der cracht des Heeren inder eewicheyt, ⁺voor die welcke ghij v ziele niet en hebt ghespaert, om die benautheden, ende bedructheyt ws gheslachts, maer hebt den valle ter helpen ghecomen, voor dat aensien ons Gods.

+ D

26

Ende alle tvolck heeft gheseyt, Het ghesciede, het ghesciede.

27

Voorts Achior gheroepen wesende, is ghecomen, ende Iudith heeft tot hem gheseyt, Godt van Israel, den welcken ghij ghetuyghenisse hebt ghegheuen, dat hy hem wreect van sijnen vianden, die heeft het hooft van allen ongheloouighen aff gheslaghen in desen nacht, met mijnder hant.

28

Ende op dat ghy beuinden moecht dattet soo is, siet dat hooft van Holofernes, die int versmaden van sijnder hoouerdien, Israels Godt versmaet heeft, ende dreychde v metter doot, segghende, Alst volck van Israel sal verwonnen sijn, dan sal ick ghebieden datmen met den swaerde v sijden doorsteke.

29

Ende Achior siende thooft van Holofernes, benauwt van verscrictheyt, viel op sijn aensicht op daerde, ende sijn ziele begaff hem.

30

Maer nae dat hy sijnen gheest herhaelt hadde, ende vermaect was, soo is hy haer te voete gheuallen, ende heeft haer aenbeden, ende gheseyt,

31

Ghebenedijt sijdi van uwen Godt in allen tabernakelen van Iacob, want in allen volcken die uwen naem hooren sullen, sal ouer v groot ghemaeckt worden Israels Godt.