Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xij. Capittel.

1

⁺DOen heeft hy gheboden, dat si ingaen soude daer sijn scatten gheleyt waren, ende hy gheboodt dat si daer blyuen soude, ende hy heeft ghestelt watmen haer gheuen soude van sijnder maeltijt,

+ A

2

Den welcken Iudith heeft gheantwoort ende gheseyt, Ick en mach nv niet eten van dese dinghen die ghij beueelt datmen mij gheue, op dat die gramscap op my niet en come, maer van tghene dat ick voor my mede bracht hebbe sal ick eten.

3

Tot die welcke seyde Holofernes. Eest dat v dese dinghen ghebreken die ghij met v ghebracht hebt, wat sullen wij v dan doen?

4

Ende Iudith seyde, Bij dat leuen uwer zielen mijn heere, v dienstvrouwe en sal al dese dinghen niet verteeren totter tijt dat Godt doen sal door mijn hant dese dinghen die ic ghedacht hebbe.

5

Ende sijn knechten hebben haer gheleyt int tabernakel dat hy beuolen hadde. Ende si begheerde doen si daer in ghinc, ⁺datmen haer soude orlof gheuen des nachts, ende voor den dach wt te gaen buyten ter bedinghen, ende om den Heere te bidden.

+ B

6

Ende hij heeft sijnen camerlinghen gheboden, dat si (ghelijck dat haer beliefde) soude moghen wtgaen ende in comen om haren Godt te aenbidden drij daghen lanck.

7

Ende si ghinc bij nachten in die valleye van Bethulien, ende si wiesch haer in die water fonteyne.

8

Ende als si op quam, soo badt si den Heere den Godt van Israel, dat hij haren wech soude bescicken tot der verlossinghe van sijnen volcke.

9

Ende incomende bleef si suyuer in dat tabernakel, tot dat si haer spijse nam des auonts.

10

⁺Ende tis ghesciet opden vierden dach dat Holofernes heeft ghehouden een auontmael sijnen knechten, ende hij heeft gheseyt tot Vagao sijnen ghesneden camerlinc, Gaet henen, ende raet der Hebreusscher vrouwen, dat si willichlijck consentere met mij te woonen,

+ C

11

want tis scande by den Assyrien, ist dat een vrouwe eenen man bespot, makende dat sij onghescent van hem wech gae.

12

Doen is Vagao tot Iudith binnen gegaen, ende seyde, Die goede ionghe dochter en ontsie haer niet te gaen binnen by mijnen heere, dat si gheeert mach worden voor sijn aensicht, dat sij met hem ete, ende drincke wijn in vrolijcheden.

13

Den welcken heeft Iudith gheantwoort, Wie ben ic, dat ick soude moghen wedersegghen mijnen heere?

14

Alle dat voor sijn ooghen goet ende tbeste is, dat sal ick doen, ende al wat hem behaghen sal, ⁺dat sal mij tbeste wesen, alle die daghen mijns leuens.

+ D

15

Ende sij is opghestaen, ende heeft haer verciert met haren cleederen, ende inghecomen sijnde, heeft sij ghestaen voor sijn aensicht.

16

Ende dat herte van Holofernes is heel verslaghen gheworden, Want hij was berrende in die begheerlijcheyt van haer.

17

Ende Holofernes heeft tot haer gheseyt, Drinct nv, ende sidt ter maeltijt met vrolijckheyt, want ghij hebt gratie gheuonden voor my.

18

Ende Iudith seyde, Ick sal drincken heere, want mijn ziele is heden groot ghemaect bouen alle mijn daghen.

19

Ende sij heeft ghenomen, ende gheten, ende ghedroncken voor hem, tghene dat haer dienstwijf voor haer bereydt hadde.

20

Ende Holofernes is vrolijck gheworden tot haer, ende hy heeft wijn ghedroncken bouen maten veel, soo vele als hy oyt ghedroncken hadde binnen sijnen leuen.

[afbeelding]