Den gheheelen Bybel, Inhoudende het oude ende nieuwe Testament (Leuvense bijbel 1548)

Dat xi. Capittel.

1

⁺DOen seyde haer Holofernes, Sijt wel ghemoet, ende en wilt niet veruaert sijn in v herte, want ick en heb noyt man scade ghedaen, die dienen wilde Nabugodonosor den coninck.

+ A

2

Ende en hadde v volck mij niet versmaedt, soo en soude ick myn lancie ouer hen niet ghehauen hebben.

3

Daerom segghet my nu, om wat sake sijdi van hen wech ghegaen, ende heuet v belieft dat ghy tot ons comen soudt?

4

Ende Iudith heeft tot hem gheseyt, Ontfanct die woorden van uwer dienstvrouwen, want eest dat ghij volcht die woorden van uwer dienstvrouwen, soo sal die Heere een volmaect dinc met v doen.

5

Want soo warachtelijc als Nabugodonosor die coninc der aerden leeft, ende zijn cracht leeft, die in v is tot straffinge van alle dolende zielen, so en dienen hem niet alleen

[p. *412]

die menschen door v, maer oock die beesten des velts sijn hem onderdanich,

6

⁺Want die cloecheyt ws verstants wort vercondicht alle den volcken, ende tis kenlijck gheworden alle der werelt, dat ghij alleen goet ende machtich sijt in alle sijn rijck, ende v voorsichticheyt wort in allen lantscappen ghepresen.

+ B

7

Ende ten is oock niet verborghen, dat Achior ghesproken heeft, noch ten is niet onbekent, wat ghij gheboden hebt hem te ghescieden.

8

Want tis zeker dat onse Godt also vertornt es om die sonden, dat hy ontboden heeft door sijn propheten totten volcke, dat hyse leueren sal om hen sonden.

9

Ende om dat die kinderen van Israel weeten dat sij haeren Godt vertornt hebben, daerom is v vreese op hen.

10

Daer bouen soo heeft hen den hongher ooc bevanghen, ende van die dorheyt des waters, so worden sij onder die dooden gherekent.

11

Voorts so ordineren sij, dat sij souden dooden hen beesten, ende drincken hen bloet,

12

⁺ende die gheheylichde offeranden des Heeren haers Godts, die welke Godt heeft beuolen niet aen te tasten, in tarwe, wijn ende olie, dese hebben sij ghedacht te verbesighen, ende sij willen verteren dat sij metten handen niet en souden behooren te ghenaken. Hierom want sij dese dinghen doen, so ist seker dat sij sullen ter verderfenissen ghegheuen worden.

+ C

13

Het welck ick v dienstvrouwe bekennende, ben van hen lieden ghevloden, ende die Heere heeft mij ghesonden dese selue dinghen v te bootscappen,

14

want ick v dienstvrouwe diene Gode ooc nu ter tijt by v, ende v dienstvrouwe sal wt gaen, ende ick sal Godt bidden,

15

ende hy sal my segghen, wanneer hy henlieden hen sonden sal betalen, ende ick comende sal v dat bootscappen, also dat ick v leyden sal door dmidden van Ierusalem, ende ghij sult alle tvolck van Israel hebben, ghelijck scapen die gheenen herder en hebben, ende daer en sal niet so veel als een hont teghen v bassen.

16

⁺Want dese dinghen sijn my gheseyt door die voorsienicheyt Godts.

+ D

17

Ende om dat Godt op hen gram es, daerom ben ick ghesonden dese selue dingen v te bootscappen.

18

Ende alle dese woorden hebben behaghelijc gheweest voor Holofernes, ende voor sijn knechten, ende sij verwonderden hen van haer wijsheyt, ende seyden deen totten anderen,

19

Daer en is sulcke vrouwe niet op der aerden van aensien, in schoonheyt, ende in verstandicheyt van woorden.

20

Ende Holofernes heeft tot haer gheseyt, Godt heuet wel ghedaen, die v ghesonden heeft voor tvolck, dat ghij dat leueren soudt in onse handen,

21

ende aenghesien dat v belofte goet is, ist sake dat v Godt mij dit doet, so sal hy oock mijn Godt sijn, ende ghy sult int huys van Nabugodonosor groot sijn, ende uwen naem sal ghenoemt worden ouer alle die aerde.