Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .x. Capittel.

1

⁺ENde tis ghesciet doen si ophiel te roepen tot den Heere, dat si is op ghestaen vander plaetsen daer op sij gheleghen hadde ghestrect tot den Heere.

+ A

2

Ende sij heeft haer ionge dienstvrouwe geroepen, ende nederwaerts gaende in haer huys, heeftse van haer ghenomen dat hairen cleedt, ende heeft haer ontcleedt van die cleederen haerder weduwelijcheyt,

3

ende heeft haer lichaem ghewasschen, ende ghesalft met die beste myrtusolie, ende si ontvlocht dat hair haers hoofts, ende si heeft een costelijck cieraet op haer hooft ghestelt, ende heeft haer ghecleedt met die cleederen haerder ghenuechlijcheyt, ende si heeft pantoffelen aen haer voeten ghedaen, ende heeft aenghenomen cierlijcke braceletten vanden rechten arm, ende lilien, ende oorringhen, ende vingerlinghen, ende met allen haren cieraten heeftse haer verciert.

4

Der welcker die Heere oock claerheyt ghegeuen heeft, want alle dit cierlijc palleersel, en quam niet wt die wellusticheyt, maer wter duecht, ende daerom heeft die Heere dese schoonheyt in haer vermeerdert, alsoo dat si den ooghen van allen menschen schoon scheen, met een schoonheyt die niet te ghelijcken en was.

5

Aldus soo heeft si op haer dienstvrouwe gheleyt een flessche wijns ende een vaetken olien, ⁺ende gerstenbrij, ende vijghen, ende brooden ende case, ende sij is ghereyst.

+ B

6

Ende als sij comen waren by der stadt poorte, soo hebben sij daer vonden Oziam verbeydende, ende die ouders der stadt, die welcke als sij haer ghesien hadden, verbaest sijnde,

7

hebben hen bouen maten seer verwondert van haer schoonheyt.

8

Nochtans haer niet vraghende, hebben sij haer laten doorgaen, segghende, Onser vaderen Godt gheue v gratie, ende hy verstercke alle den raet ws herten met zijnder cracht, dat Ierusalem van v gloriere, ende dat uwen naem sij int ghetal der heyleghen ende rechtuerdighen.

9

Ende alle die daer waren hebben gheseyt met eender stemmen, dat ghesciede, dat ghesciede.

10

Ende Iudith biddende den Heere, is door die poorten ghegaen, sij ende haer ionghe dienstvrouwe.

11

Ende tis ghesciet doen sij vanden berch nederwaerts ghinc omtrent den opganc des daechs, dat haer te ghemoet quamen die bespieders vanden Assyrien, ende sij hebben haer ghehouden, segghende, Van waer coemdi? oft waer gaedi henen.

12

Die welcke antwoorde, ⁺Ic ben een dochter vanden Hebreusschen, daer om ben ick ghevloden van haren aensicht, want ick heb gheweten datter toecomende was, dat sij v lieden sullen ghegheuen worden tot een beroouinghe, om dat sij v lieden versmadende, niet en hebben willen van selfs hen ouergheuen, dat sij hadden moghen bermherticheyt vinden voor v lieder aensicht.

+ C

13

Om dese sake heb ick by my seluen ghedacht, segghende, Ick sal gaen totten aensicht vanden prince Holofernes, dat ick hem te kennen gheue hen verholentheden, ende hem toone, door wat wech dat hyse mocht cryghen, also datter niet eenen man en valle van sijnen heyre.

14

Ende doen die mannen ghehoort hadden haer woorden, so aenmercten sy haer aensicht, ende in hen ooghen was een verbaestheyt, want van haer schoonheyt verwonderden sij hen bouen maten zeere.

15

⁺Ende sij hebben tot haer gheseyt, Ghij hebt v ziele behouden, om dat ghij sulcken raet gheuonden hebt, dat ghij nedercomen soudt tot onsen Heere.

+ D

16

Ende dat weet, dat hy v wel doen sal, wanneer ghij staen sult voor sijn aensicht, ende ghij sult dalder ghenaemste sijn in sijn herte.

17

Ende sij hebben haer gheleyt tot Holofernis tabernakel, vercondighende haer Ende doen sij in ghegaen was voor sijn aensicht, so is Holofernes ter stont gheuangen gheweest met sijnen ooghen.

18

Ende sijn knechten seyden tot hem, Wie soude dat Hebreussch volck versmaden, dat so scoone vrouwen heeft, dat wij om die ter goeder reden teghen hen niet en souden strijden?

19

Aldus Iudith siende Holofernem sittende in een omhancsel, dwelc was van purpur ende gout, ende smaragden, ende costelijcke ghesteente in een ghewrocht, ende doen zij in sijn aensichte sach,

20

soo heeft sy hem aenghebeden, streckende haer neder ter aerden. Ende Holofernis dienaers hebben haer op ghehauen, alst hen Heere beual.