Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .ix. Capittel.

1

⁺ALs die opwaerts ghinghen, so is Iudith gegaen in haer bedecamerken, ende aendoende een hairen cleedt heeft si asschen op haer hooft ghedaen, ende streckende haer plat neder voor den Heere, heeft si gheroepen totten Heere seggende,

+ A

2

Heere mijns vaders Simeons Godt, die hem tswaert ghegheuen hebt tot een bescermen teghen die vreemdelinghen, die vercrachters gheweest hebben in hen onsuyuerheden, ende hebben die dgije der maghet ontdect ter scanden,

3

ende ghij hebt hen vrouwen ghegeuen tot eenen roof, ende hen dochteren ter gheuanghenissen, ende allen haren roof ter deylinghen uwen dienaeren die uwen toren vierichlijc ghewroken hebben, coemt te helpen bid ick v Heere mijn Godt my weduwe,

4

want ghij hebt die ierste dinghen ghedaen, ende hebt dese nae die ghedacht, ende tis ghesciet dat ghij seluer hebt ghewilt.

5

⁺Want alle alle uwe weghen sijn bereydt, ende v vonnissen hebdi in v voorsienicheyt ghestelt.

+ B

6

Aensiet die heyrlegers der Assyrien nv, ghelijc ghij v doen gheweerdicht hebt die heyrleghers der Egiptenaren te aensien, doen sij nae uwe dienaren ghewapent liepen, betrouwen hebbende in hen waghenen, ende in hen rosvolc, ende in die menich-

[p. *411]

te der strijtbaer mannen,

7

maer ghij hebt op hen heyrlegers ghesien, ende die duysternissen hebbense moede ghemaect.

8

Den afgront heeft hen voeten ghehouden, ende die wateren hebbense ouerdect.

9

⁺Also moeten dese ooc worden Heere die in hen menichte betrouwen, ende in hen waghenen, ende in hen spiessen, ende in hen scilden, ende in hen scichten, ende in hen lancien glorieren,

+ C

10

ende niet en weten dat ghij seluer ons Godt sijt, die de orlooghe te niet doen vanden beghinsel, ende Heere is uwen naem.

11

Richt op uwen arm ghelijc vant beghinsel, ende worpt ter neder hen cracht met uwer cracht. Laet hen cracht vallen in v gramscap, die ghelouen dat si v heylicheden sullen ontsuyueren, ende besmetten dat tabernakel ws naems, ende dat si ter neder worpen sullen met haren swaerden den horn van uwen outaer.

12

Maect Heere dat met syn eygen swaert sijn hoouerdie mach afghehouden worden.

13

Laet hem gheuanghen worden met den strick sijnder ooghen in mij, ende ghij sult hem slaen met die lippen van mijnder liefden,

14

Gheeft mij in mijnen moet stantachticheyt, ⁺dat ick hem ende sijn cracht versmade, dat ick hem omkeeren mach.

+ D

15

Want dat sal wesen een ghedenckenisse ws naems, als die hant van eender vrouwen hem sal neder gheworpen hebben.

16

Want in die menichte en is v cracht niet Heere, noch in der peerden macht en is uwen wille niet, noch die houerdige en hebben v van tbeghinsel niet behaecht, maer der ootmoedigher ende saechtmoedigher ghebedt heeft v altijts behaecht.

17

Godt der hemelen, scepper der wateren, ende Heere van alle die creatueren. Verhoort mij allendighe biddende, ende van uwer bermherticheyt vast betrouwen hebbende.

18

Weest ghedachtich Heere ws testaments, ende gheuet dwoort in mynen mont, ende in myn herte versterct den raet, op dat v huys in v heylichmakinghe blyue,

19

ende dat alle die heydenen bekennen, dat ghij Godt sijt, ende datter gheen ander en is sonder v.