Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .viij. Capittel.

1

⁺ENde tis ghesciet nae dat dese woorden ghehoort hadde Iudith een weduwe, die welcke was een dochter Merari, des soons Idox, des soons Ioseph, des soons Ozie, des soons Elai, des soons Iamnor, des soons Gedeon, des soons Haphaim, des soons Achitob, des soons Melchie, des soons Enan, des soons Nathanie, des soons Salathiel, des soons Symeon, des soons Ruben,

+ A

2

Ende haer man was Manasses die ghestoruen is in die daghen vander ghersten oochst,

3

want hij stont naerstelijck ouer die ghene die schoouen bonden int velt, ende die hitte quam op sijn hooft, ende hy is gestoruen in Bethulien sijn stadt, ende aldaer begrauen met sijnen vaderen.

4

Ende Iudith was sijn achterghebleuen weduwe nu drij iaren, ende ses maenden.

5

Ende int opperste van haren huyse heeft sij voor haer seluen ghemaect een heymelijck camerken, daer sij met hare ionghe dienst vrouwen besloten woonde,

6

ende hebbende om haer lendenen een hairen cleedt, vaste sij alle die daghen haers leuens, sonder die sabboth daghen ende feesten der nieuwer maenden, ende die hoochtijden des huys van Israel.

7

Ende sij was bouen maten zeer schoon int aenscouwen, der welcker haer man hadde ghelaten veel rijcdommen, ende een groot huysghesin, ende erffgronden vol cudden van ossen, ende scapen.

8

Ende dese was in alles dalder vermaerste,want sij vreesde den Heere zeere Ende daer en was niemant die van haer een quaet woort sprack.

9

Hierom doen dese ghehoort hadde, dat Ozias gheloeft hadde, dat hy, als den vijfsten dach voorby ware, die stadt soude leueren, soo heeft sij gesonden tot die ouders Chabri ende Charmi.

10

⁺Ende die sijn tot haer ghecomen, ende sij heeft tot hen gheseyt, Wat woort is dit daer Ozias in gheconsenteert heeft, dat hy die stadt soude den Assyrien leueren, eest dat binnen vijf daghen v heden gheen helpe en coemt?

+ B

11

En wie sijt ghy, die den Heere tempteert?

12

Dit en is gheen reden die bermherticheyt verweruen soude, maer meer gramscap verwecken, ende den rasenden toren soude ontsteken.

13

Ghy hebt des Heeren bermherticheyt eenen tijt ghestelt, ende tot uwen wille hebdi hem eenen dach ghestelt.

14

Maer want die Heere lydsaem is, soo laet ons daer aff oock penitencie doen, ende sijn ghenadicheyt met wt ghestorte tranen begheren,

15

want Godt en sal niet dreyghen ghelick een mensch, noch ooc ter gramscappen onsteken worden als eens menschen kint.

16

Ende daerom laet ons voor hem onse zielen verootmoedighen, ende laet ons in eenen verootmoedichden gheest ghestelt, hem dienende,

17

al weenende segghen den Heere, dat hy nae sijnen wille also doe met ons haestelijck sijn bermherticheyt, dat wij oock moghen glorieren van onse ootmoedicheyt ghelijck ons herte heel onstelt is in hen houerdie,

18

want wy en hebben niet gheuolcht onser vaderen sonden, die haren Godt verlaten hebben, ⁺ende vreemde goden hebben aenghebeden,

+ C

19

om welck groot misdaet, sij ghegheuen sijn ten swaerde ende ten rooue, ende tot een bescaemptheyt haren vyanden, maer wy en kennen anders gheenen godt dan hem.

20

Laet ons ootmoedich verbeyden sijnen troost, ende hij sal ons bloet versoecken van die verdruckinghe onser vianden, ende die Heere onse Godt sal alle volcken vernederen so wie teghen ons opstaen, ende die maken sonder eere.

21

Ende nu broeders want ghij ouders sijt onder Godts volc, ende want wt v lieden hen ziele hanghet, soo richt hen herten op door v sprake, dat si moghen ghedachtich sijn, dat onse vaderen ghetempteert sijn gheweest, om dat sij souden gheproeft worden oft si warachtelijck haren Godt dienden.

22

Sy moeten ghedachtich sijn, hoe dat onse vader Abraham ghetempteert is gheweest, ende door veel lydens gheproeft sijnde, Gods vrint gheworden is.

23

Also ooc Isaac, also Iacob, also Moyses ende alle die Gode behaecht hebben, sijn door veel lijdens getrouwe doorghegaen.

24

Maer die ghene die de becoringhen niet en hebben ontfanghen metter vreese Gods, ende hen ontlijdtsaemheyt, ende dat verwijt van hen murmuratie teghen den Heere voortbracht hebben,

25

sijn vernielt gheweest vanden vernielder, ende vanden serpenten vergaen.

26

⁺Daerom en laet ons ooc ons seluen niet wreken om dese dinghen die wij lyden,

+ D

27

maer achtende dese selue pynen des Heeren gheesselen minder dan onse sonden, met die welcke wij als knechten ghestraft worden, laet ons gheloouen dat dese ghesciet sijn tot beternissen, ende niet tot onser verderffenissen.

28

Ende Ozias ende die ouders hebben haer gheseyt, Alle die woorden die ghij ghesproken hebt sijn warachtich, ende in uwe woorden en is gheen berispinghe.

29

Daerom nv bidt voor ons, want ghij sijt een heylighe vrouwe, ende Godt vreesende.

30

Ende Iudith heeft tot hen lieden gheseyt, Ghelijck ghij bekent dat van God es tghene dat ick heb connen spreken,

31

alsoo ondersoect ooc tghene dat ick ghescict hebbe oft van God is, ende bidt dat Godt mynen raet vast make.

32

Ghij sult aen die poorstaen desen nacht, ende ick sal wtgaen met mijn ionghe dienstvrouwe ende bidt, dat die Heere (ghelijck ghij geseyt hebt) binnen dese vijf daghen aensie sijn volck van Israel.

33

Maer ick en wil niet dat ghy mijn daet onder soecket, ende tot dat ick wederom v bootscappe, soo en laet anders niet ghescieden dan bidden voor mij totten Heere onsen Godt.

34

Ende Ozias die prince van Iuda heeft tot haer gheseyt, Gaet in vrede, ende die Heere si met v ter wraken van onsen vianden. Ende wederkeerende sijn zij wech ghegaen.