Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .vi. Capittel.

1

⁺ENde tis ghesciedt als sij op hielden te spreken, dat Holofernes zeer verbolghen sijnde gheseyt heeft tot Achior,

+ A

2

Want ghij ons ghepropheteert hebt segghende, dat het volck van Israel bescermt wort van haren Godt, op dat ick v toonen mach datter anders gheen godt en is dan Nabugodonosor,

3

als wij hen alle sullen verslaghen hebben ghelijck eenen mensche, dan suldi selue oock met hen, door der Assyrien sweert steruen, ende gheheel Israel sal met v door die doot vergaen,

4

ende ghy sult beuinden dat Nabugodonosor een godt is van gheheel aertrijck, ende dan salt swaert van mijnder oorloghen door v syden gaen, ende doorsteken suldi vallen onder die ghewonde van Israel, ende ghij en sult voortaen uwen adem niet meer verhalen, tot dat ghij met hen sult ghedoot worden.

5

Maer eest dat ghij meynt dat uwe prophetie warachtich es, soo en laet v aensicht niet veruallen, ende die bleecheyt die v aensicht ghecreghen heeft, die vergae van v, eest dat ghij meynt, dat dese myne woorden niet en souden moghen volbracht worden.

6

Maer op dat ghij kennen moecht dat ghy te samen met hen dit beuinden sult, siet ghij sult van deser vren voorts met dien volck versaemt worden, ⁺op dat ghij (soo wanneer sij die verdiende pene mijns swaerts ontfanghen sullen) oock mede der wraken moecht onderworpen sijn.

+ B

7

Doen heeft Holofernes gheboden sijnen knechten, dat sij Achior souden vanghen, ende hem brenghen tot Bethulien, ende hem leueren in die handen der kinderen van Israel.

8

Ende die knechten Holofernis hem nemende, sijn ghereyst door die platte velt landen. Maer doen sij ghenaecten aen die berghen, soo sijn teghen hen wt ghecomen die slingherworpers,

9

maer sij besijden gaende aen die sijde vanden berch, hebben Achior ghebonden aen eenen boom met handen ende voeten, ende alsoo hebben sij hem met zeelen ghebonden ghelaten, ende sijn wederom comen tot haren heere,

10

maer die kinderen van Israel af comende van Bethulien sijn tot hem ghecomen, den welcken ontbindende,

[p. *409]

hebben sij in Bethulien ghebracht, ende hem int midden des volcs stellende, hebben si gheuraecht, wat dinghen dat waren, daerom dat hem die Assyrien hadden ghebonden ghelaten.

11

⁺In dien daghen so waren daer die princen Ozias die sone Micha van Simeons gheslachte, ende Charmi die oock hiet Gothoniel.

+ C

12

Hierom soo heeft Achior int midden der ouders, ende int aenschijn van hen allen gheseyt alle die woorden die hij gheseyt hadde, doen hij van Holofernes gheuraecht was, ende hoe dattet volck van Holofernes hem hadde (om dat woort) willen doot slaen,

13

ende hoe dat Holofernes gram sijnde, selue gheboden hadden datmen hen den Israeliten om dese sake soude ouerleueren, op dat hij wanneer hij die kinderen van Israel soude verwonnen hebben, dan oock hem Achior door versceyden pijnen soude doen steruen, om dat hij gheseyt hadde, Godt des hemels is hen bescermer.

14

Ende doen Achior alle dese dinghen wtgheleyt hadde, soo viel alle tvolc op hen aensicht, aenbiddende den Heere, ende met een ghemeyn bescreyinghe ende weenen, soo hebben sij eendrachtelijck hen ghebeden wtghestort voor den Heere,

15

segghende, Heere Godt van hemel ende aerde, aensiet hen houerdie, ende siet op onse ootmoedicheyt, ende aenmerct het aensicht uwer heylighen, ende toont dat ghij niet en verlaet die ghene die op v betrouwen, ⁺ende dat ghij die ghene die hen betrouwen op hen seluen, ende van hen eyghen cracht hen beroemen, verootmoedicht.

+ D

16

Aldus doen het weenen ghedaen was, ende dat ghebedt des volcs alle den dach voleynt, soo hebben sij Achior ghetroost

17

segghende, Onser vaderen Godt, wiens macht ghi vercondicht hebt, die sal v dese veranderinghe gheuen, dat ghij meer hen doot sien sult.

18

Ende als onse Godt dese vrijcheyt sijnen dienaers sal ghegheuen hebben, soo sij Godt met v int midden van ons, op dat ghij (ghelijc v dat belieuen sal) sult moghen alsoo met allen die uwe verkeeren met ons.

19

Doen heeft Ozias, nae dat den raet voleynt was, hem ontfanghen in sijn huys, ende hem een groot auontmael ghegheuen.

20

Ende als hij alle die ouders gheroepen hadde, soo hebben sij nae dat die vasten voleynt was, hen te samen met eten vermaect.

21

Maer daer nae is alle tvolck vergadert, ende alle den nacht lanck hebben sij in die vergaderinghe ghebeden, begherende helpe van Godt van Israel.