Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .v. Capittel.

1

⁺ENde tes Holoferni den prince des ruyterscaps van Assyrien ghebootscapt, dat die kinderen van Israel hen bereydden om te wederstaen, ende dat sij die weghen der berghen besloten hadden,

+ A

2

ende met grooter rasernie is hy onsteken met een groote gramscap. Ende hy heeft gheroepen alle die princen van Moab, ende die vorsten van Ammon,

3

ende hy heeft tot hen gheseyt, Segghet my, wat volck dat dit is, die tgheberchte belegt, oft welcke ende hoedanighe, ende hoe veel dat hen steden sijn, welck ooc hen macht is, oft welck haer menichte is, oft wie die coninck is van hairen ruyterscap,

4

ende waerom dat dese (bouen alle die ghene die int oosten woonen) ons versmaet hebben, ende niet en sijn wt ghecomen ons te ghemoete, dat sij ons met vrede souden ontfanghen?

5

Doen heeft Achior die hooftman van alle die kinderen van Ammon antwoordende gheseyt, Eest dat ghy v gheweerdicht te hooren mijn Heere, soo sal ic die waerheyt segghen voor v aensicht, van desen volc-

[p. *408]

ke, dat int gheberchte woont, ende daer en sal gheen valsch woort wt mijnen monde gaen.

6

Dit volck is wten gheslachte der Chaldeen,

7

⁺dit heeft ierstmael in Mosopotamien ghewoont, om dat sij niet volghen en wilden haerder vaderen goden die int lant der Chaldeen waren.

+ B

8

Hier om latende haerder vaderen ceremonien, die welcke waren in menichte der goden,

9

hebben sij eenen Godt des hemels ghedient, die welcke hen oock gheboden heeft, dat sij van daer souden wtgaen, ende woonen in Charan. Ende doen alle dlant eenen dieren tijt oueruallen hadde, soo sijn zij neder ghedaelt in Egipten, ende aldaer sijn zij binnen vier hondert iaren alsoo vermenichfuldicht, dat hen heyr niet en mocht ghetelt worden.

10

Ende doen die coninck van Egipten hen verlaste, ende in die timmeringhe van sijnen steden in leem ende bacsteenen hen tonderbracht hadde, soo hebben sij gheroepen tot haren Heere, ende hij heeft alle dlant van Egipten gheslaghen met versceyden plaghen.

11

Ende als die Egiptenaren hen verdreuen hadden van hen, ende die plaghe van hen lieden op ghehouden was, ende sij wederom hen wilden vanghen, ende tot haren dienst weder roepen, doen dese vluchten,

12

soo heeft die Godt des hemels die zee open ghedaen, alsoo dat aen beyde syden die wateren als mueren vast worden, ende dat dese droochs voets den gront der zee ouerwandelende doorghinghen.

13

Op welcke plaetse als hen een ontellijck heyr der Egiptenaeren veruolchde, soo worde dat alsoo van die wateren ouerdect, datter niet soo veel als een ouer en bleef, die dat werck den naecomelinghen hadde moghen vercondighen.

14

Als sij oock ghegaen waren wt die roode zee, soo hebben si die woestijnen vanden berch Sina besleghen, daer noyt mensch en heeft moghen inwoonen, oft sone des menschen rusten.

15

Daer sijn bitter fonteynen hen lieden suer worden om te drincken, ⁺ende veertich iaren lanck hebben sij voetsel wten hemel ghecreghen.

+ C

16

Al waersij incomen sijn sonder boghe oft pyl, ende sonder schilt ende swaert, heeft hen Godt voor hen lieden ghestreden, ende verwonnen.

17

Ende daer en is niemant gheweest die dit volck verwinnen mocht, dan alst scheyde vanden dienst des Heeren haer lieder Godt.

18

Maer soo menichmael als sij behaluen desen haren Godt, eenen anderen ghedient hebben, so sijn zij gheleuert gheweest ten rooue, ende ten swaerde, ende ten verwijte.

19

Maer hoe menichmael dat sij penitencie ghedaen hebben, dat sij ghesceyden waren vanden dienst haers Gods, soo heeft hen Godt des hemels macht ghegheuen te wederstaen.

20

Voorts soo hebben sij den coninck der Chananeen, ende Iebuseen, ende Pherezeen, ende Hetheen, ende Heueen, ende Amorrheen, ende alle die machtighe in Hesebon ter needer gheworpen, ende hen landen, ende hen steden hebben sij beseten,

21

ende alsoo lange als sij niet en sondichden int aensicht van haren Godt, soo waren met hen goede dinghen. Want hen Godt haet die ongherechticheyt.

22

Want oock voor dese iaren, doen sij af ghegaen waren vanden wech, den welcken hen Godt ghegheuen hadde, dat sij daer in wandelen souden, soo sijn zij verdreuen gheweest met orloghen van veel natien, ende veel van haer lieden sijn gheuanghen wech gheleyt in een vreemt lant,

23

maer onlancs als sij weder ghekeert waren tot den Heere haren Godt, ⁺soo sijn zij wt die verstroytheyt, waer door sij verstroyt waren, vergadert, ende sijn gheclommen op alle dese gheberchten, ende sij besitten wederom Ierusalem, daer die heylighe dinghen der heylegher sijn.

+ D

24

Daerom nv myn heere, ondersoect ofter eenighe boosheyt is van haer lieden ghedaen int aenschijn haers Gods, ende laet ons dan tot hen op climmen, want leuerende salse Godt v leueren, ende sij sullen onder tbedwanc van uwer moghentheyt wesen.

25

Maer en isser gheen misdaet des volcs voor haren Godt, soo en sullen wij hen niet moghen wederstaen, want hen Godt salse bescermen, ende wy sullen tot een versmaetheyt wesen allen landen.

26

Ende tes gheschiet, doen Achior op hiel van te spreken dese woorden, dat alle die groote heeren Holofernis gram sijn gheworden, ende dachten hem te dooden, segghende deen teghen dandere,

27

Wie is dese die seyt dat die kinderen van Israel souden moghen wederstaen den coninck Nabugodonosor, ende sijnen heyren, onghewapende menschen, ende sonder cracht, ende sonder wetentheyt van die conste des strijdens.

28

Daer om op dat Achior bekenne dat hy ons bedriecht, soo laet ons opt gheberchte climmen, ende als hen machtighe sullen gheuanghen sijn, dan sal hy met die selue metten swaerde doorslaghen worden,

29

op dat alle tvolc wete, dat Nabugodonosor een godt van aertrijck is, ende datter behaluen hem gheen ander godt en is.