Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .iiij. Capittel.

1

⁺DOen dit verhoorden die kinderen van Israel die int lant van Iuda woonden, hebben sij zeer gbeureest van synen aensicht.

+ A

2

Oock worden hen sinnen bevanghen met beuinghe ende grouwel, dat hij Ierusalem ende den tempel des Heeren dat selue doen soude, dat hy den anderen steden ghedaen hadde, ende haren tempelen.

3

Ende sij hebben ghesonden in gheheel Samarien int ronde tot Iericho toe, ende sij hebben ierst besleghen die toppen der berghen,

4

ende met mueren hebben sij hen steden al om beleydt, ende sij hebben coren vergadert tot bereytsel des strijdts.

5

Ooc so heeft die priester Eliachim ghescreuen tot alle die teghen Esdrelon waren, welck is teghen daensicht van dat groot velt, by Dothain, ende tot alle die ghene door die welcke eenighen doorganc des weechs wesen mocht, ⁺dat sij besetten souden die opghanghen der berghen, door die welcke eenighen wech sijn mocht tot Ierusalem, ende dat sijt daer bewaren souden, daer den wech engher mocht sijn tusschen die berghen.

+ B

6

Ende die kinderen van Israel hebben ghedaen, nae dat hen ghestelt hadde die priester des Heeren Eliachim.

7

Ende alle tvolck heeft gheroepen totten Heere met grooter naersticheyt, ende sij hebben hen sielen verootmoedicht met vasten ende ghebeden, sij, ende hen huysvrouwen.

8

Ende die priesters hebben hen ghecleedt met hairen cleederen, ende die ionghe kinderkens hebben sij neder gheleyt teghen dat aensicht vanden tempel des Heeren, ende den outaer des Heeren hebben sij bedect met een hairen cleet,

9

⁺Ende sij hebben gheroepen totten Heere den Godt van Israel eenmoedelijck, dat hen ionghe kinderkens niet en souden ghegheuen worden tot eenen roof, ende hen huysvrouwen ter deylinghen, ende hen steden ter verderfenissen, ende hen heylighe dinghen ter besmettinghen, ende dat sij souden worden een bescimpingen den heydenen.

+ C

10

Doen heeft Eliachim die groote priester des Heeren ommeghegaen alle Israel, ende heeftse aenghesproken

11

segghende, Weet dat die Heere verhooren sal v ghebeden, eest dat ghij blijuende volherdelijc blijft in vasten ende ghebeden voor des Heeren aensicht.

12

Weest gedachtich Moysi des Heeren knechts, ⁺die welcke heeft neder gheworpen Amalec die betrouwen hadde in sijn cracht, ende in sijn macht, ende in sijn heyr, ende in sijn schilden, ende in sijn waghenen, ende in sijn peerdevolck, niet met yser vechtende, maer met heyleghen ghebeden biddende.

+ D

13

Alsoo sullen alle die vianden van Israel sijn, eest sake dat ghy ghestadich blijft in dit werck dat ghij begonst hebt.

14

Hierom door dese sijne vermaninghe den Heere biddende, bleuen sij vast voor des Heeren aensicht,

15

also dat ooc die ghene die den Heere brant offeranden offerden omgort met hairen cleederen, den Heere sacrificien offerden, ende daer waren asschen op hen hooft.

16

Ende wt allen hen herte hebben sij alle Godt ghebeden, dat hy besoecken soude sijn volck Israel.