Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .iij. Capittel.

1

⁺DOen hebben hen legaten ghesonden alle di coninghen ende princen der steden, ende lantscappen, te weten van Syrien ende Mesopotamien, ende van Syrien Sobal ende Libyen, ende Cilicien, die welcke comende tot Holofernem hebben gheseyt,

+ A

2

Laet v verbolghentheyt ophouden teghen ons, want tes beter dat wy leuende dienen Nabugodonosor den grooten coninc, ende v onderdanich sijn, dan dat wy steruende, met onser verderffenissen selue die scade ons dienst lijden.

3

Alle onse steden, ende alle besittinghe, ⁺alle die berghen ende hueuelen, ende velden, ende die cudden der ossen, ende der scapen, ende gheyten, ende peerden, ende kemelen, ende allen onsen rijcdommen,

+ B

4

ende ghesinnen sijn voor v aensicht, alle dat onse is laet sijn onder v wet

5

Wy ooc ende onse kinderen sijn v dienaers,

6

Coemt ons een vredelijc heere, ende ghebruyct onsen dienst alsoot v belieuen sal.

7

Doen ghinck hy neder vanden berghen metten rosvolck, met grooter macht, ende hy heeft in ghenomen alle die steden, ende alle die int lant woonden.

8

⁺Ende van alle die steden heeft hy tot hem ghenomen stercke mannen ter helpen, ende wtghecoren ter orloghen.

+ C

9

Ende so groote vreese heeft die lantscappen oueruallen, dat van allen steden die inwoonders, die princen, ende eerlijcke mannen tsamen metten ghemeynen volcke hem te ghemoete ghinghen als hy quam,

10

ontfanghende hem met croonen ende lichten, leydende dansen met bommen ende pypen.

11

Nochtans dese dinghen doende, en hebben si die wreetheyt sijns herten niet moghen vermorwen,

12

want hen steden heeft hy ooc bedoruen ende hen bosschen af ghehouwen.

13

⁺Want Nabugodonosor die coninck hadde hem beuolen, dat hy alle die goden der aerden verdrijuen soude, te weten om dat hy alleen soude godt ghenoemt worden, van dien nacien die door Holofernis macht souden moghen tonderbracht worden.

+ D

14

Ende treckende door Sirien Sobal, ende Apamien, ende gheheel Mesopotamien, is hy ghecomen tot die Idumeen int lant Gabaa,

15

ende hy heeft hen steden inghenomen, ende heeft daer gheseten veertich daghen lanck, in die welcke daghen hy heeft doen vergaderen tgheheel heyr van sijnder macht.