Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .ij. Capittel.

1

⁺INt derthienste iaer Nabugodonosor des conincs, op den tweentwintichsten dach der ierster maent is het woort ghesciet in Nabugodonosors des conincs van Assyrien huys, dat hij hem seluen verweren soude.

+ A

2

Ende hij heeft gheroepen alle die outste van gheboorten, ende alle sijn capeteynen, ende strijtbaer mannen,

3

ende heeft met hem ghehadt die verborghentheyt van sijnen raede.

4

Ende hij heeft gheseyt dat sijn ghedachte daer in was, dat hij alle dlant wilde brenghen onder sijn heerscappie.

4

Welck woort alst hen allen behaecht hadde, soo heeft Nabugodonosor die coninck gheroepen Holofernem den prince sijns heyrs,

5

ende heeft hem gheseyt, Trect wt teghen alle die rijcken vanden westen, ende sonderlinghe teghen die ghene die mijn ghebodt versmaet hebben.

6

V ooghe en sal niet sparen eenich rijck, ⁺ende alle besloten steden suldi mij onderdanich maken.

+ B

7

Doen heeft Holofernes gheroepen die princen ende hooftluyden van die cracht der Assyrien, ende hij heeft mannen ghetelt totter heyrvaert, ghelijck hem die coninck beuolen hadde, hondert ende twintich duysent strijtbaer voetvolcs, ende twaelf duysent scutters te paerde.

8

Ende voor alle sijn heyrwaert dede hij gaen een menichte van ontellijcke kemelen met die dinghen die den heyren ghenoech souden wesen ouervloedelijc. Oock cudden van runderen, ende cudden scapen der welcker gheen ghetal en was.

9

⁺Tarwe dede hij wt gheheel Syrien tot synder reysen bereyden.

+ C

10

Maer gout ende siluer heeft hij van des conincs huys mede ghenomen veel bouen maten.

11

Ende hij is ghereyst ende alle theyr, met die waghenen ende peerde volck, ende scutters, die welcke hebben het ouerste der aerden bedect ghelijck sprinchanen.

12

Ende als hij die palen van Assyrien door ghegaen was, soo is hij comen tot die groote berghen Auge, die welcke sijn aen die slincke syde van Cilicien, ende hij heeft op alle hen casteelen gheclommen, ende allen hen stercke plaetsen inghecreghen.

13

Ende hij heeft verdoruen die alder vermaerste stadt Melothi, ende heeft berooft alle die kinderen van Tharsis, ende die kinderen van Ismael, die daer waren teghen ouer het aensicht der woestynen, ende ten suyden des

[p. *407]

lants Cellon.

14

Ende hij is ouer den Euphrates ghetrocken, ⁺ende is ghecomen in Mesopotamien, ende hij heeft alle die hooghe steden ghebroken die daer waren, van die beke Mambre, tot datmen coemt aen die zee,

+ D

15

ende hij heeft haer palen inghenomen, van Cilicien tot die palen van Iapheth, die ten suyden sijn.

16

Ende hy heeft wech gheleydt alle die kinderen Madian, ende hy beroefde alle hen rijcdommen, ende alle die hem wederstonden heeft hy doot gheslaghen metten scerpe des swaerts.

17

Ende nae desen is hij nederghedaelt in die velden van Damasco, in die daghen des oochst, ende hy heeft alle dat coren verbrant, ende alle die boomen ende wijngaerden heeft hy doen afhouwen,

18

ende sijn vreese viel op alle die op der aerden wonende waren.