Den gheheelen Bybel, Inhoudende het oude ende nieuwe Testament (Leuvense bijbel 1548)

Dat ierste Capittel.

1

⁺ARphaxad die coninck van Meden hadde veel natien onder sijn heerlijckeyt ghebracht, ende hij heeft ghetimmert die alder machtichste stadt, welc hij ghenoemt heeft Ecbatanis.

+ A

2

Van viercantighe ende ghehouwen steenen heeft hij die mueren van die ghemaect, totter hoochden van tseuentich cubitus, ende in die breyde van dertich cubitus, ende haer torrens stelde hy totter hoochden van hondert cubitus. Ende int viercant van dien strecten beyde die syden tot die spacie van twintich voeten,

3

⁺ende hij heeft haer poorten ghestelt tot die hoochde der torren.

+ B

4

Ende hij glorieerde als een machtighe in die machticheyt sijns heyrs, ende in die glorie van sijnen waghenen.

5

Aldus int twaelfste iaer van sijnen rijcke, soo heeft Nabugodonosor die coninck der Assyrien (die te Niniue in die groote stadt regneerde) ghestreden teghen Arphaxad,

6

⁺ende heeft hem verwonnen in dat groot velt, welck ghenoemt wort Ragau, omtrent die vloeden Euphrates ende Tigris, ende Iadason, int velt Erioch des conincs van Elicom.

+ C

7

Doen worde dat conincrijck des conincs Nabugodonosor verheuen, ende sijn herte is op ghehauen, ende hij heeft ghesonden tot alle die woonden in Cilicien, ende Damasco, ende Libano,

8

ende tot die volcken die sijn in Carmelo, ende Cedar, ende die woonden in Galileen int groot velt Esdrelon,

9

⁺ende tot alle die ghene die in Samarien waren, ende ouer den vloet der Iordanen, tot Ierusalem toe, ende alle dlant van Iesse, tot datmen coemt tot die palen der Morianen lant.

+ D

10

Tot alle dese heeft Nabugodonosor die coninck van Assyrien boden ghesonden,

11

die welcke hebben met eenen moet daer teghen gheseyt, ende hebben die boden ydel weder om ghesonden, ende sonder eere verworpen.

12

Doen wert die coninck Nabugodonosor ghestoort teghen alle dat lant, ende heeft ghesworen bij sijnen throon ende sijn rijcke, dat hij hem verweren soude van allen desen lantscappen.