Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xi. Capittel.

1

⁺ENde als sij wederom quamen, so sijn zij ghecomen tot Charan, welck is int midden des wechs teghen ouer Niniue, op den elfsten dach.

+ A

2

Ende die enghel seyde, Tobia broeder, ghij weet wel hoe dat ghij uwen vader ghelaten hebt,

3

Hierom eest dat v belieft, soo laet ons voor gaen, ende laet dat ghesinne tsamen met uwer huysvrouwen, ende metten beesten nae ons lancsamelijck comen.

4

Ende doen dat hem soo beliefde, dat sij gaen souden, so seyde Raphael tot Tobias, Neemt met v van die Galle des vischs, want die sal nootelijck wesen. Aldus heeft Tobias van dier gallen ghenomen, ende sij zijn wech ghegaen.

5

⁺Maer Anna sadt by den wech daghelijcs opt hoochste vanden berghe, van daer zij sien mocht van verre.

+ B

6

Ende doen sij van der seluer plaetsen sach nae sijn coemste, soo heeft sij van verre ghesien, ende ter stont heeft sij ghekent haeren sone comende, ende loopende heeft sij dat haeren man gebootscapt segghende, Siet v sone coemt.

7

Ende Raphael seyde tot Tobiam, Als ghij in v huys sult comen sijn, so aenbidt ter stont den Heere uwen Godt, ende hem danckende gaet by uwen vader, ende cust hem.

8

Ende terstont soo strijct op sijn ooghen van deser gallen des vischs die ghij met v draecht. Want weet dat ter stont sijn ooghen sullen gheopent worden, ende v vader sal sien dlicht des hemels, ende in v aensien sal hy hem verblijden.

9

Doen liep den hont voore, die met hen op den wech gheweest hadde, ende ghelijck eenen bode aen comende, ⁺heeft hij met dat wispelen van sijnen steerte blyscap ghetoont.

+ C

10

Ende sijn blinde vader opstaende heeft begonst al struyckelende metten voeten te loepen, ende gheuende den knecht die hant, es hy sijnen sone te ghemoete gheloopen.

11

Ende hem ontfanghende heeft hy hem gecust met sijnder huysvrouwen, ende sij begonsten beyde te weenen van blyscappen.

12

Ende doen sij Godt aenghebeden hadden ende ghedanct, soo sijn zy gheseten.

13

Doen nam Tobias van die galle des vischs, ende heeft sijns vaders ooghen bestreken,

14

ende hy verbeyde omtrent by nae een halue vre, ende daer begonste een witte scelle wt sijn ooghen te gaen ghelijck het liesken van een eye,

15

het welcke Tobias grypende, heeft dat van sijn ooghen ghetrocken, ende ter stont heeft hy tghesicht ontfanghen.

16

⁺Ende sij hebben Godt gheglorificeert, te weten hy ende sijn huysvrouwe, ende alle die hen kenden.

+ D

17

Ende Tobias seyde, Ick ghebenedide v Heere Godt van Israel, want ghij hebt mij ghecastijt, ende ghij hebt my ghesont ghemaect, ende siet, ick sie Tobiam mijnen sone.

18

Ende nae seuen daghen is Sara sijns soons huysvrouwe oock in ghecomen, ende alle het huysghesin ende zijn beesten ghesont, ende die kemels, ende veel ghelts vander huysvrouwen, ende ooc dat ghelt dwelc hy ontfanghen hadde van Gabelo.

19

Ende hy heeft sijnen ouders vertelt alle die weldaden Gods, die hij aen hem ghedaen hadde, door den mensch die hem gheleyt hadde.

20

Ende Achior ende Nabath Tobias neuen sijn ghecomen, ende hebben hen verblijdt met Tobias, ende met hem verhueghende van alle die goede dinghen, welck Godt aen hem ghetoont hadde,

21

ende seuen daghen lanck, maeltijden houdende, sijn zij alle gader te samen verblijdt gheweest met groter blijscap.