Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xij. Capittel.

1

⁺DOen heeft Tobias sijnen sone gheroepen, ende hem gheseyt, Wat mogen wy desen heyleghen man gheuen, die met v comen is.

+ A

2

Ende Tobias antwoordende heeft tot sijnen vader gheseyt, Vader, wat loon sullen wij hem gheuen? oft wat sal mogen weerdich wesen sijnen weldaden?

3

Hy heeft my gheleyt, ende ghesont weder om gebracht. Tgelt van Gabelus geeft hy seluer ontfanghen, een huysvrouwe heeft hy mij doen hebben, ende den duyuel heeft hy van haer bedwonghen, Haren ouders heeft hy blijscap ghedaen, mij seluen heeft hy verlost van tverslinden des vischs, ende v heeft hij ooc doen sien dlicht des hemels, ende met allen goede sijn wy door hem veruult. ⁺Wat moghen wij hem hier voore doen dat weerdich sij?

+ B

4

Maer ick bidde v mijn vader dat ghij hem bid-

[p. *405]

det, oft hij hem by auontueren soude willen gheweerdighen die een helicht van alle die dinghen die ghebracht sijn, voor hem te nemen.

5

Ende roepende hem (te weten die vader ende die sone) hebben sij hem ter sijden ghenomen, ende hebben begonst te bidden, dat hy hem ghewerdighen wilde die helicht van allen den dinghen die sij ghebracht hadden in dancke tontfangen.

6

Doen seyde hy hen al heymelijck, Ghebenedijt Godt des hemels, ende voor allen die leuende sijn belijdt hem, want hij heeft met v lieden sijn bermherticheyt ghedaen.

7

Want des conincs verholenthede te verberghen is goet, maer Gods wercken te openbaren ende te belijden, dat is eerlijck.

8

Tghebet is goet met vasten, ende die almisse is beter dan scatten van goude op te legghen,

9

want die almisse verlost vander doot, ende sij eest die de sonden suuert, ende doet bermherticheyt vinden ende dat eewich leuen.

10

Maer die sonde doen ende boosheyt, die sijn haers selfs zielen vianden.

11

Hierom openbaer ick v die waerheyt, ⁺ende ick en sal voor v lieden niet verborghen dat bedect woort.

+ C

12

Doen ghy baedt met tranen, ende begroeft die dooden ende verliet uwen noen maeltijt, ende berchdet die dooden in v huys inden dach, ende des nachts begroefde ghy die, soo offerde ick v ghebet den Heere.

13

Ende om dat ghy Gode aenghenaem waert, daer om heuet van noode gheweest, dat die becoringhe v proeuen soude.

14

Ende nv heeft my die Heere ghesonden dat ick v ghenesen soude, ende dat ick Saram ws soons huysvrouwe vanden duyuel verlossen soude,

15

Want ick ben Raphael die enghel een vanden seuen, die voor den Heere staen.

16

Ende als si dat ghehoort hebben, soo sijn si verscrict gheweest, ende beuende sijn sij gheuallen ter aerden op hen aensicht

17

⁺Ende die enghel heeft hen gheseyt, Vrede sij v lieden, en wilt niet vreesen,

+ D

18

want doen ick met v lieden was, soo was ick daer door den wille Gods, ghebenedijt hem ende singht hem.

19

Het scheen voorwaer dat ick met v lieden adt ende dranc, maer ick ghebruyke onsienlijcke spijse ende dranck, die vanden menschen niet en moghen ghesien worden.

20

Daer om eest tijdt dat ick wederom keere, totten ghenen die mij ghesonden heeft, maer ghij lieden ghebenedijt Godt, ende vertelt alle sijn wonderlijcheden.

21

Ende doen hy dese woorden gheseyt hadde, soo is hij van haer lieden aensicht wech ghenomen, ende voortaen en mochten sij hem niet sien.

22

Doen hebben sij (nederligghende op hen aensicht drij vren lanck) Godt ghebeden, ende opstaende hebben sij vertelt alle sijn wonderlijcheden.