Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .x. Capittel.

1

⁺MAer doen Tobias vertoefde ter saken vander bruloft, so was sijn vader Tobias sorchuuldich, segghende, Waerom meyndi dat mijn sone vertoeft? oft waerom is hy daer ghehouden?

+ A

2

meyndi niet dat Gabelus ghestoruen is, ende dat hem niemant tghelt wedergeuen en sal?

3

Ende hy begonste bouen maten seer droeuich te worden, hy ende Anna sijn huysvrouwe met hem, ende sij begonsten beyde tsamen te weenen, om dat ten ghesetten daghen hen sone niet wederom en quam tot hen.

4

Hierom heeft sijn moeder gheweent met ontroostelijcke tranen, ende seyde. ⁺Wee wee mij mijn sone, waerom hebben wij v ghesonden om in vreemde landen te reysen, het licht onser ooghen den staf onser outheyt, tsolaes ons leuens, die hope van onsen nacomelinghen?

+ B

5

Alle dese dinghen tsamen in v alleen hebbende, en behoirden wy v niet te laten gaen van ons.

6

Tot wien Tobias seyde, Swycht ende en wilt niet onstelt worden, onse sone is ghesont, die man is ghetrou ghenoech daer wy hem mede ghesonden hebben,

7

maer si en mocht gheensins ghetroost worden, maer dachelijcs wtspringhende sach sij al omme, ⁺ende ginck om alle die weghen, door die welcke dat scheen hope te sijn des wedercomens op dat sij hem van verre, waert moghelijck, soude sien comen.

+ C

8

Maer Raguel seyde tot sijnen behouden sone, Blijft hier, ende ick sal eenen bode van uwer weluaert senden tot Tobiam uwen vader.

9

Tot wien Tobias seyde, Ick weet wel dat mijn vader ende mijn moeder nu die daghen tellen, ende dat haren gheest in hen seluen ghepijnt wort.

10

Ende doen Raguel met veel woorden Tobiam badt, ende hy hem gheenssins hooren en wilde, so heeft hy hem Saram gheleuert, ende die helicht van allen sijnen hauelijcken goede, in knechten, in dienstvrouwen, in beesten, in kemelen, ⁺ende in coeyen, ende in veel gelts, ende blyde, ende ghesont heeft hy hem van hem laten gaen

+ D

11

segghende, Den heylighen enghel des Heeren sij in v lieder wech, ende brenghe v welvarende, ende dat ghy alle dinghen te rechte vinden moghet by v ouders, ende dat mijn ooghen sien v kinderen, eer dat ick sterue.

12

Ende die ouders nemende haerlieder dochter, hebbense ghecust, ende laten gaen,

13

vermanende haer dat sij haer swegers eeren soude, haeren man lief hebben, dat huysghesin regeren, ende thuys bescicken, ende haer seluen onberispelijck te houden.