Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .ix. Capittel.

1

⁺DOen heeft Tobias den enghel tot hem gheroepen, den welcken hy meynde eenen mensch te wesen, ende heeft hem gheseyt, Azaria broeder, ick beghere dat ghij nae mijn woorden hoort.

+ A

2

Al waert dat ick my seluen v ouer gaue tot eenen knecht, soo en soude ick uwer vorsienicheyt niet weerdelijck voldoen.

3

Nochtans bidde ick v, dat ghij met v neemt behelpighe beesten oft diensten, ende gaet tot Gabelum in Rages der Meden stadt, ende gheeft hem wederom sijn hantscrift, ende ontfanct van hem tghelt, ende bidt hem dat hy come tot mynder bruyloft.

4

Want ghij weet wel hoe dat mijn vader die daghen telt, ⁺ende ist dat ick eenen dach langher vertoeue, soo is sijn ziele bedroeft.

+ B

5

Ende voorwaer ghy siet hoe dat my Raguel besworen heeft, wiens besweringhe ick niet en mach versmaden.

6

Doen nam Raphael vier van Raguels knechten, ende twee kemels, ende is ghereyst tot Rages der Meden stadt, ende vindende Gabelum heeft hy hem ghegheuen sijn hantscrift, ende heeft van hen ontfanghen alle tgelt,

7

ende hij heeft hem te kennen ghegeuen van Tobias den sone van Tobia, ⁺al datter gesciedt was, ende heeft hem met hem ter bruyloft doen comen.

+ C

8

Ende doen hi in Raguels huys comen was, soo heeft hij Tobiam gheuonden ouer maeltijt sittende, ende opspringhende hebben sij malcanderen ghecust, ende Gabelus heeft gheweent, ende Godt ghebenedijt,

9

ende gheseyt, Godt van Israel ghebenedie v, want ghij sijt een sone van eenen alderbesten ende rechtuerdigen ende Godtvreesende man, ende die almissen doet,

10

ende die ghebenedijdinghe moet gheseyt worden ouer v

[p. *404]

huysvrouwe, ende ouer uws ouders,

11

ende sien moet ghij lieden v kinderen, ende die kinderen uwer kinderen, tot in die derde ende vierde afcoemste, ende v saet sij ghebenedyt van Godt van Israel, die in die eewicheyt der eewicheden regneert.

12

Ende doen sij alle gheseyt hadden, Amen, so sijn si ter maeltijt ghegaen. Maer sij hielen ooc den maeltijt des brulofts metter vreesen Gods.