Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .viij. Capittel.

1

⁺MAer nae dat si het auontmael gheten hadden, soo hebben sij den ionghelinck binnen tot haer ingheleydt.

+ A

2

Ende Tobias ghedachtich sijnde der woorden vanden enghel, heeft wt sijnder malen voortghebracht het deel vander leueren, ende heeft dat gheleydt op leuende colen.

3

Doen heeft die enghel Raphael den duyuel ghegrepen, ende dien ghebonden in die woestyne van douerste van Egipten,

4

Doen heeft Tobias die maghet vermaent, ende tot haer gheseyt, Sara staet op, ende laet ons Godt bidden, heden ende morghen, ende ouermorghen, want dese dry nachten worden wij met Godt versaemt, maer als den derden nacht sal voorleden sijn, dan sullen wij in onsen houwelijc wesen.

5

Want wij sijn kinderen der heylighen, ende wij en moghen alsoo niet versaemt worden, ghelijck die heydenen die Godt niet en kennen.

6

Hierom sijn zij tsamen opghestaen ende hebben gebeden beyde te samen, dat hen ghesontheyt soude gegeuen worden.

7

Ende Tobias heeft gheseyt, Heere Godt onser vaderen, ⁺v moeten ghebenediden die hemelen, ende die aertrijcken, ende die zee, ende die fonteynen, ende die vloeden, ende alle creatueren die daer in sijn.

+ B

8

Ghy hebt Adam ghemaect vanden slym der aerden, ende hebt hem tot een hulpe ghegheuen Heuam.

9

Ende nu Heere ghij weet wel, dat ick mijn suster ter saken van oncuysheden niet en neme tot een huysvrouwe, maer alleen wt liefde der nacomelinghen, waer in moet ghebenedijt worden uwen naem, in der eewicheyt.

10

Aldus heeft Sara gheseyt, Ontfermt v onser Heere, ontfermt v onser, ende laet ons beyde oudt worden tsamen ghesont.

11

Ende tis gebuert omtrent der hanen ghecray, dat Raguel heeft doen roepen sijn knechten, ende sij sijn met hem tsamen wech ghegaen om een graff te grauen.

12

Want hy seyde, dat hem by auontueren inder seluer manieren niet en sij ghesciet, ghelijck den anderen seuen mannen, die tot haer in ghegaen waren.

13

⁺Ende als sij dat graff bereydt hadden, soo is Raguel wederom comen bij sijn huysvrouwe, ende heeft haer gheseyt,

+ C

14

Sendt een van uwen dienst vrouwen, dat sij besie oft hy doot is, dat ick hem begraue, eer dat claer dach worde.

15

Ende sij heeft een van haeren dienstvrouwen ghesonden, die welcke in die slaepcamer ghegaen sijnde heeftse beyde gheuonden welvarende, ende ghesont, met malcanderen slapende.

16

Ende wederom comende heeft sij een goede bootscap ghebracht, ende sij hebben den Heere ghebenedijt, te weten Raguel ende Anna sijn huysvrouwe,

17

ende hebben gheseyt, Wij ghebenedijden v Heere Godt van Israel, dat niet en is ghesciet, alsoo wij meynden,

18

Want ghij hebt met ons v bermherticheyt ghedaen, ende hebt van ons wt ghesloten den vyant die ons veruolchde.

19

Ende ghij hebt bermhertich gheweest den twee eenighe kinderen. ⁺Doetse Heere v volcomenlijcker ghebenedijden, ende v offeren het sacrificie van uwen loff, ende van hen ghesontheyt, op dat alle die menichte der heydenen mach bekennen dat ghi Godt alleen sijt ouer alle aertrijck.

+ D

20

Ende ter stont heeft Raguel sijnen knechten gheboden, dat sij vullen souden die gracht die sij ghemaect hadden eer dat claer worde.

21

Maer sijnder huysvrouwen heeft hij gheseyt, dat sij eenen maeltijt soude bereyden, ende dat sij bereyden soude alle dat tot spijse den reysenden ouer wech van noode ware.

22

Oock heeft hy twee vetten coyen, ende vier rammen doen dooden, ende bereyden maeltyden alle sijnen ghebueren, ende alle sijnen vrinden.

23

Ende Raguel heeft Tobiam besworen dat hy twee weken soude bij hem blijuen.

24

Ende van alles dat Raguel besadt, daer aff heeft hy die helicht Tobie ghegheuen, ende hy heeft dit ghescrifte ghemaect, dat die helicht die daer ouerbleef nae hen doot, Tobias besittinghe toecomen soude.