Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .vij. Capittel.

1

⁺ENde sij sijn inghegaen tot Raguel, ende Raguel heeftse met blijscap ontfanghenn.

+ A

2

Ende Raguel aensiende Tobiam seyde tot Anna sijnder huysvrouwen, Hoe ghelijck is dese ionghelinck mijnder moeyen sone.

3

Ende doen hy dit gheseyt hadde, so sprac hij, Van waer sijdi ionghelinghen onse broeders?

4

Ende sij seyden, Wy sijn wt den gheslachte van Nephtali, wt die gheuanghenisse van Niniue.

5

Ende Raguel heeft tot hem gheseyt, Kendi Tobiam niet mynen broeder? Die welcke seyde, Wy kennen hem wel.

6

Ende doen Raguel veel goets van hem seyde, soo heeft die enghel tot Raguel gheseyt, Tobias daer ghij aff vraecht, is die vader van desen.

7

Ende Raguel viel op hem, ende met tranen heeft hy hem ghecust, ende weenende op synen hals, heeft hy gheseyt, Ghebenedidinge sij v mijn sone, want ghi sijt eens goets ende alder beste mans sone.

8

⁺Ende Anna sijn huysvrouwe, ende hen dochter hebben gheweent.

+ B

9

Maer nae dat sij ghesproken hebben, soo heeft Raguel beuolen, datmen eenen ram dooden soude, ende eenen maeltijt bereyden. Ende als hijse vermaende dat zij sitten souden ten noenmaeltijt,

10

soo seyde Tobias, Hier en sal ick heden noch eten noch drincken, ten si dat ghij ierst mijn begheerte mij vast toe segghet, ende my gheloeft te gheuen Saram v dochter.

11

Als Raguel dat woort ghehoort hadde, soo verscricte hij hem, wetende wat ghesciedt was dien seuen mans die tot haer in ghegaen waren, ende hy begonste te vreesen, dat by auontueren desen oock desghelijcs soude gheschieden. ⁺Ende doen hy twijfelachtich

+ C

[p. *403]

was, ende den begherende gheen antwoorde engaf,

12

soo heeft die enghel tot hem gheseit, En wilt niet vreesen haer te gheuen desen, want desen Godt vreesende behoort v dochter tot eender huysvrouwen, daerom en heeft gheen ander haer moghen hebben.

13

Doen seyde Raguel, Ick en twijfel niet, Godt en heeft mijn ghebeden ende tranen in sijn tegenwoordicheyt laten comen,

14

ende ick ghelooue dat hy v daer om tot mij heeft doen comen, om dat dese soude versaemt worden met haren gheslachte, nae die wet van Moyses, ende nu en wilt niet twyfelen ic en salse v leueren.

15

Eude nemende die rechte hant van sijnder dochter heeft hij die gheleuert der rechter hant van Tobias, seggende, ⁺Die Godt van Abraham, ende die Godt van Isaac ende die Godt van Iacob, sij met v lieden, ende hy versame v lieden, ende veruulle sijn benedictie in v lieden.

+ D

16

Ende nemende eenen brief, hebben si een bescreuen voorwarde des houwelijcs ghemaect.

17

Ende nae desen hebben sij blyde chiere ghemaect ghebenedydende Godt.

18

Ende Raguel heeft Annam sijn huysvrouwe tot hem gheroepen, ende haer beuolen dat sij een ander slaepcamer bereyden soude.

19

Ende hy heeft daer in gheleydt Saram sijn dochter, ende sij heeft gheweent,

20

ende hy heeft tot haer gheseyt, Weest vroom van moede mijn dochter, die Heere des hemels gheue v blyscap voor tverdriet dat ghij gheleden hebt.