Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .vi. Capittel.

1

⁺ENde Tobias is ghereyst, ende den hont is hem gheuolcht ende hij is ter ierster herberghen ghebleuen by den vloet Tigris.

+ A

2

Ende hy is wtghegaen, dat hy zijn voeten wasschen soude, ende siet eenen seer grooten visch is daer wt comen om hem te verslinden.

3

Vanden welcken Tobias verscrict sijnde, heeft gheroepen met luyder stemmen segghende, Heere hy vaert mij toe.

4

Ende die enghel seyde tot hem Grijpt sijn wammen, ende trect hem tot v. Dwelc als hy ghedaen hadde, so heeft hy hem ghetrocken tot opt drooghe, ende hy begonste te spertelen voor sijn voeten.

5

Doen seyde tot hem die enghel, Doet het inghewant van desen visch wt, ende syn herte, ende galle, ende die leuere bewaert voor v, want dese sijn nootelijck, tot medecine orberlijck.

6

Dwelc als hij ghedaen hadde, soo heeft hy sijn vleesch ghebraden, ende si hebben dat met hen ghedraghen ouer den wech, dat ander hebben sij ghesouten, welc hen ghenoech sijn souden, tot dat si quamen in Rages der Meden stadt.

7

⁺Doen vraechde Tobias den enghel, ende seyde hem, Ick bidde v hertelijc Azaria broeder, dat ghy my segget, wat remedie dat dese dinghen hebben sullen, die ghij vanden visch hebt beuolen te bewaren.

+ B

8

Ende die enghel antwoordende heeft hem gheseyt, Het stucsken van sijn herte eest dat ghijt op kolen legghet, soo verdrijft den roock van dien alle manier van duyuelen, tsij van eenen man oft van eender vrouwen, also dat hy voorts niet meer tot hem en coemt.

9

Ende die galle is goet om die ooghen te bestrijcken, daer een witte vlecke in is, ende die sullen ghenesen worden.

10

Ende Tobias heeft hem gheseyt, Waer wilt ghij dat wij blijuen?

11

Ende de enghel antwoordende seyde, Hier is een man Raguel ghenaemt, een maech van uwen gheslachte, ende dese heeft een dochter Sara ghenaemt, ende hy en heeft gheenen sone oft dochter anders meer dan dese.

12

⁺V behoort alle sijn goet toe, ende ghij moet die tot een huysvrouwe nemen.

+ C

13

Aldus so begheert dese van haren vader, ende hy salse v tot een huysvrouwe gheuen.

14

Doen antwoorde Tobias ende seyde, Ick hoore dat si seuen mannen ghegeuen is gheweest, ende dat die ghestoruen sijn, maer ic heb dat ooc ghehoort, datse die duyuel ghedoot heeft,

15

hierom vreese ic, dat my by auontueren dese dinghen ooc toe comen mochten, ende aenghesien dat ic een eenich kint ben mijnen ouders, dat ic haeren ouderdom nederlegghen soude met droefheit ter hellen waerts

16

Doen heeft die enghel Raphael tot hem gheseyt, Hoort my ende ic sal v toonen wie si sijn ouer die welcke die duyuel macht hebben mach.

17

Want dese die den houwelijc also aennemen, dat si Godt van hen ende van hen herte wtsluyten, ende dat si hen also ter wellusticheyt gheuen, ghelijc een peert ende een muyl, in die welcke gheen verstant en is, ouer dese heeft die duyuel macht.

18

⁺Maer ghij als ghijse ghenomen sult hebben, ende in die camer ghegaen sijt, so onthoudt v drij daghen van haer, ende ghij en sult niet anders doen, dan v tot ghebeden gheuen met haer.

+ D

19

Ende op den seluen nacht, als die leuer vanden visch sal verbrant wesen, so sal den duyuel veriaecht worden.

20

Ende op den tweeden nacht suldi int versamen vanden heylighen patriarchen toeghelaten worden.

21

Ende op den derden nacht suldi die benedictie vercrijghen, dat wt v lieden ghesonde kinderen sullen gheboren worden.

22

Maer als den derden nacht ouerghegaen is, so suldi die maghet nemen met die vreese Gods, door die liefde der kinderen meer dan door die wellusticheyt ghetrocken sijnde, op dat ghij in Abrahams saet, die benedictie moecht in v kinderen vercrijghen.