Den gheheelen Bybel, Inhoudende het oude ende nieuwe Testament (Leuvense bijbel 1548)

Het .v. Capittel.

1

⁺DOen antwoorde Tobias sijnen vader, ende seyde, Alle dat ghij mij beuolen hebt sal ick doen vader,

+ A

2

maer hoe ic dit ghelt crijghen sal en weet ic niet, die man en kint mij niet, ende ick in ken hem niet, wat teeken sal ick hem gheuen? Ende oock den wech waer doer men derwaerts gaet en heb ick noyt bekent.

3

Doen heeft sijn vader hem gheantwoort ende gheseyt, Sijn hantscrift heb ic emmers bij mij, het welck als ghij hem toonen sult, soo sal hij v terstont wedergeuen.

4

Maer gaet nv wech, ende soect voor v eenen ghetrouwen man, de met v gae, behouwelijck sijnen loon, die wijle dat ick noch leue, dat ghij dit ghelt moecht ontfanghen.

5

Tobias doen wt ghegaen sijnde heeft gheuonden eenen blinckenden ionghelinck staende ghescort, ende als bereyt om te reysen.

6

Ende niet wetende dat die enghel gods was, heeft hij hem ghegroet ende gheseyt, Van waer hebben wij v goede ionghelinck?

7

⁺Ende hij heeft gheantwoort, Wt die kinderen van Israel. Ende Tobias heeft hem gheseyt, Kende ghij den wech die leyt int lantscap der Meden?

+ B

8

Den welcken hij heeft gheantwoort, Ick ken dien wel, ende alle die weghen van dien lande heb ick dicmael ghewandelt, ende heb gheherbercht bi Gabelum onsen broeder, die daer woont in Rages der Meden stadt, die welcke gheleghen is op den berch Ecbatanis.

9

Tot den welcken Tobias seyde, Verbeyt mij (dat bidde ick) tot dat ick dese selue dinghen mijnen vader bootscappe.

10

Doen is Tobias binnen ghegaen, ende heeft alle dese dinghen sijnen vader te kennen ghegeuen. Van die welcke die vader verwondert sijnde, heeft ghebeden, dat hij binnen tot hem comen soude.

11

Hier om als hij in comen was, soo heeft hij hem ghegroet ende gheseyt, Blyscap zij v altijt,

12

Ende Tobias seyde, Wat blijscap sal mij wesen, die in duysternissen sitte, ende dlicht des hemels niet en sie?

13

Tot wien heeft die ionghelinck gheseyt, ⁺Hebt goeden moet, tes zeer nae bij, dat ghij van Godt sult ghenesen worden.

+ C

14

Aldus heeft Tobias tot hem gheseyt, Suldi mijnen sone moghen leyden tot Gabelum in Rages der Meden stadt? ende als ghij wedercomen sijt, dan sal ick v gheuen uwen loon.

15

Ende die enghel seyde tot hem, Ick sal hem leyden ende wederom brenghen bij v.

16

Totten welcken heeft Tobias gheantwoort, Ick bid

[p. *402]

v, gheeft my te kennen van wat huyse, oft van wat gheslachte sijt ghij?

17

Den welcken die enghel Raphael heeft gheseyt, Vraechdi nae tgheslachte van eenen huerlinck, oft nae den huerlinck selue die met uwen sone gaen sal?

18

Maer op dat ick v by auontueren niet besorcht en make, ick ben Azarias des grooten Ananias sone.

19

Ende Tobias heeft gheantwoort, Ghij sijt van eenen grooten gheslachte. Maer ic begheere dat ghij niet gram en wort dat ick heb willen kennen v gheslachte.

20

Ende die enghel heeft hem gheseyt, Ick sal uwen sone ghesont leyden, ende ghesont wederom brenghen.

21

Ende Tobias antwoordende heeft gheseyt, Wel moet ghy wandelen, ende Godt sij in uwen wech, ende sijnen enghel sij met v inden wech.

22

⁺Alst doen al bereydt was datter ouer wech te draghen was, so heeft Tobias sijnen vader ende sijn moeder te gode beuolen, ende sij zijn beyde tsamen ghereyst.

+ D

23

Ende als sij wech ghereyst waren, soo heeft sijn moeder begonst te weenen, ende te segghen, Den staff onser ouderdoms hebdij wech ghenomen, ende dien ghesonden van ons.

24

Och oft dat ghelt noyt gheweest en hadde, daerom dat ghij hem ghesonden hebt.

25

Want ons armoede was ons ghenoech, dat wij voor rijcdom gheacht souden hebben, dat wij onsen sone saghen.

26

Ende Tobias heeft haer gheseyt, En wilt niet weenen, onse sone sal ghesont tot daer gaen, ende ghesont wederom tot ons comen, ende v ooghen sullen hem sien.

27

Want ick ghelooue dat die goede enghel Gods met hem gaet, ende alle dinghen wel bescict, die bi hem ghescieden, also dat hi met blyscappen tot ons sal wederkeeren.

28

Tot deser stemmen soo hiel sijn moeder op van weenen, ende heeft ghesweghen.