Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .iiij. Capittel.

1

⁺ALdus doen Tobias meynde dat sijn ghebet verhoort worde, dat hij soude hebben moghen steruen, soo heeft hij tot hem gheroepen Tobiam sijnen sone,

+ A

2

ende tot hem gheseyt, Hoort mijn sone die woorden mijns monts, ende timmert die in v herte als een fundament.

3

Als Godt mijn ziele sal ghenomen hebben, soo begraeft mijn lichaem, ende ghij sult uwe moeder in eeren hebben alle die daghen ws leuens,

4

want ghij moet ghedachtich sijn hoedanighe ende hoe groote periculen dat sij gheleden heeft om v, in haren lichaem.

5

Ende als sij oock sal voleynt hebben den tijt van haren leuen, soo begraeft haer omtrent mij.

6

Ende alle die daghen ws leuens hebt Godt in v ghedachte, ⁺ende wacht v dat ghij nemmermeer tot die sonde consent en gheeft, noch achter en laet die gheboden des Heeren ons Gods.

+ B

7

Van uwen goede doet almisse, ende en wilt v aensicht niet afkeeren van eenighen armen mensche, alsoo salt ghescieden, dat oock van v niet en sal afghekeert worden het aensicht des Heeren.

8

In wat manieren dat ghij moecht, alsoo weest bermhertich.

9

Eest dat ghij veel hebt, soo gheeft ouervloedelijck, eest dat ghij luttel hebt, soo weest oock naerstich dat luttel mede te deylen,

10

want ghij vergadert v eenen goeden loon in den dach des noots,

11

want die almisse van alle sonde, ende van die doot verlost, ende sij en sal niet ghedooghen dat die ziele gaen sal in die duysternisse.

12

Een groot betrouwen sal voor den den hooghen God sijn die almisse alle den gheenen diese doen.

13

⁺Wacht v mijn sone van alle oncuyscheyt ende behaluen v huysvrouwe en lijdet nemmermeer eenich misdaet te weten.

+ C

14

Houerdie en latet nemmermeer in uwen sin oft in v woort heerscappie hebben, want daer doer heeft beghinsel ghenomen alle verderffenisse.

15

Soo wie v iet ghewracht heeft, gheeft hem terstont sijnen loon, ende den loon van uwen huerlinck en laet gheensins bij v blijuen.

16

Wat ghij noode hebt dat een ander v doe, siet dat ghij nemmermeer een anderen dat en doet.

17

V broot eedt met den hongherighen, ende behoeuighen, ende met uwen cleederen bedect die naecten.

18

V broot ende uwen wijn stelt op die begrauinghe van eenen rechtuerdighen, ende en wilt daer af niet eten ende drincken metten sondaers.

19

⁺Soect altijt raet vanden wijse.

+ D

20

Tot allen tijden ghebenedijt Godt, ende begheert van hem dat hij v weghen bescicke, ende dat alle v raden in hem moghen blijuen.

21

Oock gheue ic v te kennen mijn soone, dat ick ghegheuen heb thien talenten siluers, doen ghij noch een cleyn kindeken waert Gabelo in Rages der Meden stadt, ende sijn hantscrift heb ick bij mij,

22

ende daerom doersoect hoe ghij soudt moghen tot hem comen, ende ontfanghen van hem dat voorseyde ghewichte siluers, ende gheuen hem weder sijn hantteeken.

23

En wilt niet vreesen mijn soon, want wij leuen voorwaer een arm leuen, maer wij sullen veel goets hebben, eest dat wij Godt vreesen, ende dat wij af scheyden van allen sonden, ende weldoen.