Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .iij. Capittel.

1

⁺DOen heeft Tobias versucht, ende begonst te bidden met tranen

+ A

2

segghende, Rechtuerdich sijdi Heere, ende allen uwe vonnissen sijn rechtuerdich, ende allen uwe weghen sijn bermherticheyt, ende warachticheyt, ende recht vonnis.

3

Ende nv Heere weest mijns ghedachtich, ende en neemt gheen wrake van mijnen sonden, noch en weest niet ghedachtich mijnder versumenissen, oft mijnder ouders.

4

Want wij en hebben uwen gheboden niet ghehoorsam gheweest, daer om sijn wij gheleuert tot een beroouinghe ende gheuanghenisse, ende ter doot, ende tot een fabule, ende een lachteringhe allen den natien waer onder dat ghij ons verstroyt hebt.

5

Ende nv Heere groot sijn v oordeelen, want wij en hebben niet ghedaen nae uwe gheboden, ende wij en hebben niet oprechtelijck ghewandelt voor v.

6

Ende nv Heere nae uwen wille doet met mi, ende ghebiedt dat mijnen gheest in vrede ontfanghen worde. want tes mij orbaerlijcker te steruen dan te leuen.

7

⁺Aldus eest ghesciet op den seluen dach dat Sara die dochter van Raguel in Rages der Meden stadt, ooc selue hoorde een verwijt van een haers vaders dienstvrouwen,

+ B

8

dat si ghegeuen was seuen mans, ende eenen duyuel Asmodeus ghenaemt hadde die ghedoot, ter stont als die tot bij haer inne ghegaen waren.

9

Hierom doen sij die ionghe dochter voor haer scult strafte, so heeft die haer gheantwoort segghende, Voerts aen en moeten wij gheenen sone ofte dochter sien op der aerden, ghi dootslaghersse van uwen mannen,

10

wildi mij ooc dooden ghelijck ghij nv seuen mannen ghedoot hebt? Tot deser stemmen so ghinc sij in die opperste slaepcamer van haren huyse, ende drij dagen ende drij nachten en heeft sij niet gheten noch ghedroncken,

11

maer bliuende in haer ghebet, met tranen heeft sij den Heere ghebeden, dat hij haer van desen verwijt soude verlossen.

12

Ende tes ghesciet op den derden dach als sij haer ghebedt voleynde ghebenedijdende den Heere

13

dat sij heeft gheseyt. Ghebenedijt is uwen naem Godt onser vaderen, ⁺die welcke als ghij gram sijt, soo suldi bermherticheyt doen, ende inden tijt der tribulatien, soo vergheefdi die

+ C

[p. *401]

sonden, den ghenen die v aenroepen,

14

Tot v Heere keer ick myn aensicht, tot v heffe ick mijn ooghen.

15

Ic begheer Heere dat ghij mij wt den bant van desen verwijt ontslaet, oft immer haelt mij wech van der aerden.

16

Ghij weet Heere dat ick noyt man begheert en hebbe, ende heb mijn ziele suyuer ghehouden van allen begheerlijcheden,

17

Noyt en heb ick mij met den spelende ghemenghet, noch met den ghenen die in lichtuerdicheden wandelen en heb ic mij niet deelachtich ghemaect,

18

maer eenen man heb ick gheconsenteert te ontfanghen met uwer vreesen, niet met mijnder wellusticheyt.

19

Ende oft ick en was hens niet weerdich, oft sij en waren messchiens mijns niet weerdich, om dat ghij mij bij auontueren voor eenen anderen man bewaert hebt,

20

Want uwen raet en is niet in des menschen macht,

21

⁺maer dat heeft hij voor zeker alle die v dient, dat sijn leuen (eest dat in proeuinghe is) sal ghecroont worden. Maer eest dat in tribulacien is, soo sal hij verlost worden, ende eest dat hij in castijngije es, soo sal hij moghen tot uwe bermherticheyt comen,

+ D

22

want ghij en hebt gheen ghenoechte in onse verdoemenissen. Want nae tempeest maecte ghij stillicheyt, ende nae screyinghe ende weenen stort ghij verhueghen in.

23

Vwen naem Godt van Israel sij ghebenedijt inder eewicheyt.

24

Op dien tyt sijn verhoort die ghebeden van beyden in daenschijn der glorien vanden alderhoochsten God,

25

ende daer is ghesonden den heylighen inghel Gods Raphael, dat hij die beyde ghenesen soude, der welcker ghebeden sijn op eenen tijt int aenschijn des Heeren verhaelt.