Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xiiij. Capittel.

1

⁺ENde tes ghesciet op den derden dach, ende ick sadt onder die eycke, Ende siet een stemme ghinck wt teghen mij wt den dornboom ende seyde, Esdra, Esdra.

+ A

2

Ende ick seyde, Siet ick Heere, Ende ick ben op ghestaen op mijn voeten,

3

ende hij heeft tot mij gheseyt, Vertoouende ben ic vertoont op den dornboom, ende heb Moysi aenghesproken, doen mijn volck diende in Egipten,

4

ende ick heb hem ghesonden, ende ick heb mijn volck wt Egipten gheleyt, ende ick heb hem gheleyt op den berch van Sina, ende ick hiel hem by mij veel daghen,

5

ende ick heb hem vertelt veel wonderlijckheden, ende ic heb hem vertoont die verborghentheyt der tyden, ende dat eynde, ende ick heb hem gheboden segghende,

6

Dese woorden suldi openbaer maken, ende dese suldi verberghen.

7

Ende nv segghe ick v,

8

die teekenen die ick ghetoont hebbe, ende die droomen die ghij ghesien hebt, ende die bediedenissen die ghij ghesien hebt, legghet die op in v herte,

9

want ghij sult ontfanghen worden van allen menschen, ghij sult bekeert worden ouerghebleuen met mynen rade, ende met ws ghelijcke, tot dat die tijden sullen volint worden,

10

want die werelt heeft haer ionghe iuecht verloren, ende die tyden naecken dat sij verouderen sal.

11

Want die werelt is in thien deelen ghedeelt, ⁺ende haer thiende deel, ende die helicht van een thiende deel sijn ouerleden,

+ B

12

ende daer sciet noch ouer van haer dat nae die helicht des thiende deels is.

13

Daerom nv bescict v huys ende straft v volck, ende troost haer vernederde, ende laet varen die bederffenisse,

14

ende laet van v die sterffelijcke ghepeysen, ende worpt van v die menschelijcke lasten, ende doet v nv wt die crancke natuere,

15

ende stelt op deen syde die ghedachten die v zeer quellijck sijn, ende haest v wech te trecken wt desen tijden,

16

want sij sullen wederom noch quader dinghen doen, dan die dinghen die ghij ghesien hebt dat ghesciet sijn.

17

Want hoe die werelt onmachtigher worden sal van ouderdom, soo veel sullen die quade dinghen ouer die inwoonders vermenichfuldicht worden.

18

Want die warachticheyt heeft haer verder vertrocken, ende die loghene bij is ghenaect. Want dat visioen dwelck ghij gesien hebt, haest hem nv te comen.

19

Ende ick heb geantwoort ende heb gheseyt

20

voor v Heere, want siet ick sal wech gaen ghelijck ghij mi gheboden hebt, ende ic sal dit teghenwoordich volc straffen. Maer die daer namaels gheboren sullen worden, wie sal die straffen? Hierom is die wereld ghestelt in duysternissen, ende die daer in woonen sonder licht.

21

Want v wet in onsteken,

[p. *396]

waerom niemant en weet wat van v ghemaect is, oft wat wercken dat daer nae begonst sullen worden.

22

Want heb ick in v gratie gheuonden, soo sendt in mij den heylighen gheest, ende ick sal scrijuen alle dat in die werelt ghesciedt is van tbeghinsel, die in v wet ghescreuen waren, op dat die menschen moghen den wech vinden, ende die willen leuen int laetste, dat sij leuen.

23

Ende hij heeft tot mij gheantwoort, ende gheseyt, ⁺Gaet henen ende vergadert dat volck, ende ghij sult hen segghen, dat sij v niet en soecken binnen veertich daghen,

+ C

24

maer bereyt voor v veel scrijftafelkens van busboomen hout, ende neemt met v Saream, Dabriam, Salemiam, Echanum, ende Asiel, dese vijue die bereydt sijn om te scrijuen rasschelijck,

25

ende coemt hier, ende ick sal i v herte onsteken een licht des verstants, dat welcke niet en sal wt ghedaen worden tot dat voleynt sullen wesen die dinghen die ghij sult beghinnen te scrijuen.

26

Ende dan suldi den volmaecten sommighe dinghen openbaer maken, sommighe suldi den wijsen heymelijck leeren, want morghen te deser vren suldi beghinnen te scrijuen.

27

Ende ick ben ghereyst alsoo hij my beuolen hadde, ende ick heb alle tvolck vergadert, ende gheseyt,

28

Hoort Israel dese woorden.

29

Ons vaders sijn van ierst vreemdelinghen gheweest in Egipten, ende sij sijn daer wt verlost gheweest,

30

ende sij hebben ontfanghen die wet des leuens, die welcke sij niet bewaert en hebben, die welcke ghij oock nae hen lieden ouertreden hebt.

31

Ende het lant is v ten deele ghegheuen, ende dlant Sion, ende v vaders ende ghij hebt boosheyt ghedaen, ende ghij en hebt die weghen niet onderhouden, welcke die alderhoochste v beuolen hadde,

32

ende want hij een rechtuerdich richter is, soo heeft hij van v lieden wech ghenomen inder tijt dat hij ghegheuen hadde.

33

Ende nv sijt ghij hier, ende v broeders sijn int midden onder v.

34

Daer om eest dat ghij uwen sin bedwinghet, ende v herte onderwijst, soo suldi leuende behouden worden, ende nae die doot suldi bermherticheyt crijghen.

35

Want het ordeel sal nae die doot comen, wanneer dat wij wederom sullen leuende worden, ende dan sullen die namen der rechtuerdigher blijcken, ende die wercken der ongoddelijcker sullen ghetoont worden,

36

daerom niemant en come nv tot mij, noch en versueck mij tot veertich daghen toe,

37

ende ick heb vijf mannen ghenomen ghelijck hij mij gheboden heeft, ⁺ende wij sijn ghegaen int velt, ende sijn daer bleuen.

+ D

38

Ende ick ben ghecomen totten morghen, ende siet een stemme heeft mij gheroepen segghende, Esdra doet uwen mont open, ende drinct dat ghene dat ick v te drincken gheuen sal.

39

Ende ick heb mijnen mont open ghedaen, ende siet eenen vollen kelc worde mij ghegheuen, dien was vol als water, maer sijn verwe was ghelijck vier.

40

Ende ick hebben ghenomen ende ghedroncken, ende doen ick daer wt ghedroncken hadde, soo worde mijn herte ghepijnicht met verstandenisse, ende in mijn borst groeyde die wijsheyt, want mijnen gheest worde onderhouden door die memorie.

41

Ende mijnen mont is open ghedaen, ende en is niet meer ghesloten.

42

Die alderhoochste heeft verstant ghegheuen den vijf mannen, ende sij screuen datter gheseyt worde, die opganghen des nachts die sij niet en wisten. Ende des nachts aten sij broot,

43

maer ick sprack in den dach, ende des snachts en sweech ick niet.

44

Ende daer fijn binnen veertich daghen ghescreuen twee hondert ende vier boecken.

45

Ende tis ghesciet doen sij die veertich daghen ouerbracht hadden, so heeft die alderhoochste ghesproken segghende, Die ierste die ghij ghescreuen hebt stelt int openbaer, ende laet die lesen die werdige ende onwerdighe,

46

maer die tseuentich laetste boecken suldi bewaren, op dat ghij die gheest den wijsen van uwen volcke,

47

want in dese is die adere des verstants, ende die fonteyn der wijsheyt, ende den vloet der wetenheit.

48

Ende ic heb also gedaen.