Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xiij. Capittel.

1

⁺ENde tes ghesciedt nae seuen daghen, ende ic heb eenen droom ghedroomt des nachts,

+ A

2

ende siet vander zee stont eenen wint op, om dat hij verstooren soude alle sijn vloeden.

3

Ende ick heb ghesien, ende siet die mensch worde machtich met die duysenden des hemels, ende daer hij sijn aensicht toe keerde om te aenmercken, soo beefde alle dat onder hem ghesien worde,

4

ende waerwaerts dat die stemme wtghinck wt sijnen monde, soo branden sij alle die sijn stemmen hoorden, ghelick die aerde rustet als sij tvier gheuoelt.

5

Ende ick heb nae desen ghesien, ende siet daer worde een menichte van menschen vergadert der welcker gheen ghetal en was van die vier winden des hemels, dat sij beuechten souden den mensch die vander zee opghestaen was.

6

Ende ic heb ghesien, ende siet hij hadde voor sij seluen wtghesneden eenen grooten berch, ende hij heeft daer op gheuloghen.

7

Ende ick sochte om te besien dat lantscap, oft plaetse van daer dien berch wtghesneden was, ende ic en coste dat niet doen.

8

Ende nae desen heb ic ghesien, ende siet alle die tot hem vergadert waren, om dat si hem vechtende verwinnen souden, vreesende zeer, nochtans dorsten sij vechten.

9

Ende siet, als hij ghesien heeft dat ghedruys der comender menichten, soo en heeft hij sijn hant niet opghehauen, noch hy en hielt gheen swaert, noch gheen orloochsche wapen,

10

dan alleen (als ick ghesien hebbe) dat hy wt sijnen monde liet gaen als een blasinghe des viers, ende wt sijnen lippen den wint der vlammen, ende van sijnder tonghen seynde hij wt voncken viers, ende tempeesten,

11

ende die sijn al te samen ghemenghet. Dese blasinghe des viers, ende den wint der vlammen, ende die menichte des tempeests, sijn tsamen gheuallen op die menichte met een ghedruysch, die bereydt was om te vechten, ende heeft die alle verbrant, also datmen haestelijck niet meer en sach van die ontallijcke menichte, dan alleen stubbe, ende rueck des roocs, ende ick heb ghesien, ende zeer ghevreest.

12

⁺Ende nae desen heb ick dien seluen man ghesien nederdalen vanden berghe, ende roepende tot hem seluen een ander vreedtsamighe menichte,

+ B

13

ende tot hem quam daensicht van veel menschen, der sommigher blijde sijnde ende der sommigher droeue sijnde, ende die sommighe waren ghebonden, ende die sommighe brengende tot hem vanden ghenen die gheoffert worden. Ende ick worde sieck van die grootheijt der vreesen, ende ick ben wacker gheworden, ende heb gheseyt,

14

Ghij hebt van tbeghinsel uwen dienaer ghetoont dese wonderlijcke dinghen, ende ghij hebt my weerdich ghehadt, dat ghij soudt ontfanghen mijn ghebet

15

ende nv toont mij noch die bediedenisse van desen droom.

16

Want ghelijck ick meyne in mijnen sin, wee den ghenen die achterghelaten sijn gheweest in dien daghen, ende noch veel meer wee den ghenen die niet achter ghelaten en worden.

17

Want die niet verlaten en sijn, waren droeuich.

18

Ick verstaen nv die dinghen die achterwaerts ghehouden worden in de vterste daghen, ende die sullen hen ontmoeten, maer oock den ghenen die achter ghelaten sijn.

19

Want daer om sijn sij comen in groote periculen, ende in veel nooden, ghelijck dese droomen toonen,

20

Maer nochtans eest lichtelijcker dat een die in perikel es, comen soude tot desen, dan door te gaen ghelijck een wolcke vander werelt, ende nv te sien die ghescieden int laetste. Ende hy heeft tot mij gheantwoort, ende gheseyt.

21

Ende die bediedenisse des visioens sal ick v segghen, ende daer ghij af ghesproken hebt sal ick v open doen,

22

om dat ghij van die ghene gheseyt hebt die achter ghelaten sijn, dit is die bediedenisse.

23

Diet perikel wechneemt in dien tijde die heeft sij seluen bewaert, die int perikel gheuallen sijn, dese sijn die ghene die de wercken hebben ende tghelooue tot den alderstercksten.

24

Daerom weet dat sij meer salich ghemaect sijn die ouerghebleuen sijn dan die ghene die ghestoruen sijn.

25

Dit sijn die bediedenissen des visioens. Want ghy ghesien hebt eenen man op gaende wt dat herte vander zee,

26

Hij selue eest den welcken die alderhoochste bewaert veel tijden, die door sij seluen sal sijn creatuere verlossen, ende hij salse bescicken die daer ouerghebleuen sijn.

27

Ende dat ghij wt sijnen mont hebt sien wtgaen als eenen gheest, dat vier, ende den storm,

28

ende dat hij gheen swaert en hielt noch orloochs gheweer, want sijn ghedruysch

[p. *395]

bedorf die menichte, die comen was om hem strijdende te verwinnen, ⁺dit is die bediedenisse.

+ C

29

Siet die daghen comen als die alderhoochste sal beghinnen te verlossen die op der aerden sijn,

30

ende hij sal comen in een opneminghe des gheests op hen die daerde bewoonen.

31

Ende deen sullen dander dencken te bestrijden, deen stadt dander stadt, ende die een plaetse die andere, ende deen volck teghen dander, ende deen rijck teghen dander rijck.

32

Ende tsal sijn als dese dinghen ghescieden sullen, ende dan sullen ghescieden die teekenen die ick v te voren ghetoont hebbe, ende dan sal mijn sone vertoont worden, den welcken ghij ghesien hebt, als eenen opclimmende man.

33

Ende tsal sijn als alle die heydenen sullen sijn stemme ghehoort hebben, ende een yeghelijck sal in sijn lant sijn orloghe verlaten, die sij teghen malcanderen hebben,

34

ende een ontellijcke menichte sal ouer een vergadert worden, ghelijck willende comen, ende hem strijdende verwinnen.

35

Maer hy sal staen op dat opperste des berchs van Sion.

36

Ende Sion sal comen, ende sal allen menschen ghetoont worden bereyt ende ghetimmert, ghelijck ghij ghesien hebt den berch ghesneden worden sonder handen.

37

Ende die selue mijn sone sal straffen tghene dat die heydenen gheuonden hebben, hen ongoddelijcheden die bij den tempeeste naecten om hen quade ghedachten,

38

ende die pijninghen waer mede sij sullen begonst ghepijnicht te worden, die welcke gheleken sijn der vlammen, ende hij salse verderuen sonder arbeyt door die wet, die by den viere gheleken is.

39

Ende want ghij hem ghesien hebt vergaderende een ander vreedtsamighe menichte,

40

dit sijn die thien gheslachten, die gheuanghen sijn gheworden van haren lande, ten tijden van Osee den coninc, den welcken heeft gheuanghen gheleyt Salmanasar die coninc der Assyrien, ende hij heeft die wech ghevoert ouer den vloet, ende sij sijn wecht gheuoert in een ander lant,

41

maer sij hebben hen seluen desen raet ghegeuen dat sij verlaten souden die menichte der heydenen, ende souden reysen in een voorder lantscap, daer het menschelijc geslachte noyt ghewoont en heeft,

42

oft emmer daer te onderhouden sijn wettelijcheden, die sij niet onderhouden en hadden in hen lantscap.

43

⁺Maer door die enghe inganghen des vloets Euphrates zijn sij incomen,

+ D

44

want doen heeft hen die alderhoochste teekenen ghedaen ende hy heeft die aderen des vloets doen stille staen tot dat sij door ghinghen.

45

Want door dat lantscap was eenen grooten wech reysens van onderhaluen iare, want dat lant heet Arsareth.

46

Doen hebben sij daer in ghewoont totten laetsten tijde, ende nu weder om als sij begonsten te comen,

47

so sal die alderhoochste wederom doen staen die aderen des vloets, tot dat sij souden moghen doorgaen. Hier om hebdi die menichte ghesien met vrede.

48

Maer die van uwen volcke ouerbleuen sijn, dese sijn die ghene die gheuonden worden binnen mijn pale.

49

Ende het sal ghescieden, als hij sal beghinnen te verderuen die menichte van den heydenen die vergadert sijn, soo sal hij bescermen die tvolc verwonnen hebben,

50

ende dan sal hij hen toonen zeer veel wonderlijcke teekenen.

51

Ende ick heb gheseyt, Heere scappende heere, toont mij dat, waerom dat ick gesien heb den man opgaende van therte der zee.

52

Ende hij heeft mij gheseyt, ghelijck ghij niet en cont dese dinghen ondersoecken, oft weten, die in die diepte der zee sijn, alsoo en sal niemant op der aerden mijnen sone sien, oft die ghene die met hem sijn, dan in den tijd vanden daghe.

53

Dit is die bediedinghe van den droom die ghij ghesien hebt, ende waerom dat ghij hier alleen verlicht sijt,

54

want ghij hebt verlaten uwe wet, ende v becommert met de mijne, ende ghij hebtse ghesocht.

55

Want v leuen hebdi bescict in wijsheden, ende uwen sin hebdi moeder gheheeten,

56

ende daerom heb ick v den loon ghetoont bij den alderhoochsten, want het sal sijn nae die ander drij dagen dat ick tot v ander dinghen spreken sal, ende ick sal v wt legghen sware ende wonderlijcke dinghen.

57

Ende ick ben ghereyst ende door ghegaen int velt, zeer glorificerende ende louende den alderhoochsten, van die wonderlijcke dinghen die hij bij der tijt dede,

58

ende dat hij dien regeert, ende alle dat in die tijden ghebuert is, ende ick heb daer gheseten drij daghen.