Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xij. Capittel.

1

⁺ENde tes gheschiet doen dien leuw dese woorden sprack totten aern, ende ick heb ghesien,

+ A

2

ende siet het hooft datter ouerbleuen was, ende die vier vloghelen en sijn niet te voorscyne ghecomen die tot hem ouerghetrocken waren, ende sij sijn op gherecht om te regneren, ende hen rijck was cleyne, ende vol beroerten.

3

Ende ick heb ghesien, ende siet sij en openbaerden nerghers, ende alle dlichaem vanden aern worde onsteken, ende die aerde worde zeer verscrict, ende ick vanden gheruchte, ende vanden ouerganck myns herten, ende van grooter vreesen worde wacker, ende ic heb gheseyt tot mynen gheest,

4

Siet ghij hebt mij dat ghegheuen, daer door dat ghy ondersoect die weghen des alderhoochsten.

5

Siet ick ben noch vermoyt van moede, ende in mijnen gheest ben ick zeer onmachtich, ende daer en is niet een luttel machts in mij van grooter vreesen, daer door ick verscrict ben in desen nacht.

6

Daer om sal ick nv den alderhoochsten bidden, dat hij mij verstercke totten eynde.

7

Ende ick heb gheseyt, Heerscapper Heere, heb ick gratie gheuonden voor v ooghen, ende ben ick by v rechtuerdich ghemaect bouen veele, ende dat zekerlijck mijn ghebet opgheclommen is voor v aensicht,

8

versterct my ende toont my uwen dienaer, die bediedenisse, ende dat ondersceyden van dit vreeselijck visioen, om dat ghy zeer volcomelijck mijn ziele troostet.

9

Want ghy hebt mij weerdich gheacht dat ghij my toonen soudt die weerste tijden.

10

Ende hy heeft tot my gheseyt, Dit is die bediedinghe van desen visioen.

11

Den arnt die ghij ghesien hebt op climmende vander zee, dat is het rijck dat ghesien is in een visioen van Daniel uwen broeder,

12

maer ten is hem niet bediet, daerom bediede ict v nv.

13

Siet die daghen comen, ende daer sal een rijck opstaen op der aerden, ende tsal een scerper vreese wesen dan alle der rijcken die voor dat gheweest hebben.

14

⁺Ende daer sullen twaelf coninghen in regneren deen nae dandere,

+ B

15

Want die tweede sal beghinnen te regneren, ende hij sal meer tijts houden dan die twaelue.

16

Dit is die bediedenisse van die twaelf vloghelen die ghij ghesien hebt.

17

Ende vander stemmen die ghij ghehoort heb, die ghesproken heeft, niet gaende wt sijnen hoofden, maer wt het midden van sijnen lichaem, dit is die bediedinghe.

18

Dat nae den tijt van dien rijcke sullen op staen twisten niet cleyne, ende tsal in perijckel comen om te vallen, ende ten sal dan niet vallen, maer t sal wederom ghestelt worden op syn beghinsel,

19

ende want ghy ghesien hebt acht onder vederen hanghende aen sijn vloghelen, daer af is dit die bediedinghe.

20

Daer sullen acht coninghen in dat rijck opstaen, der welcker tijden licht sullen sijn, ende snelle iaren,

21

ende die twee voorwaer van dien sullen vergaen. Maer als den middelsten tijt aencomen sal, soo sullen die viere bewaert worden in den tijt, als sijnen tijt sal beghinnen te naken, dat voleynt worde, maer de twee sullen totten eynde ghehouden worden.

22

Ende want ghy die drij hoofden hebt sien rusten, dit is die bediedinghe,

23

In sijn wterste sal die alderhoochste verwecken drij rijcken, ende hy sal daer in veel wederom roepen, ende sij sullen heerscappie hebben ouer die aerde,

24

ende die daer in woonen, met grooten arbeyt bouen alle die ghene die voor dese gheweest hebben, ende daerom sijn sy ghenoemt die hoofden des arents.

25

Want dit sullen die sijn, die sijn ongoddelijcheden sullen verhalen, ende die sijn wterste sullen volbrenghen.

26

Ende want ghij ghesien hebt, het meeste hooft niet openbarende. Dit is die bediedenisse van dien. Want een van dien sal op sijn bedde steruen, ende nochtans met tormenten.

27

Want die twee die volherden sullen, sal het swaert eten,

28

want tswaert vanden eenen sal dien eten die met hem is, ⁺nochtans sal dese een wtersten metten swaerde vallen.

+ C

29

Ende want ghy ghesien hebt die twee onder vederkens gaende ouer tot opt hooft, dat ter rechter sijden is.

30

Dits die bediedenisse, Dit sijn die ghene die dalderhooste bewaert heeft tot hen eynde, dats het smalle rijcke ende vol verstooringhe,

31

Ghelijck ghij oock ghesien hebt den leuw, den welcken ghy ghesien hebt wten bossche onspringhende ende briesschende, ende sprekende totten aernt, ende dien straffende, ende sijn ongherechticheden door allen sijn redenen, ghelijck ghij ghehoort hebt.

32

Dits den wint den welcken die alderhoochste heeft ghehouden tot hen lieden int eynde, ende hen boosheden, ende hij salse straffen, ende hy sal voor hen indrijuen hen verschoeringhen

33

want hy salse stellen int ordeel leuende, ende tsal sijn als hijse ghestraft sal hebben dan sal hyse castijen,

34

want mijn ouerghebleuen volck sal hij met catiuicheden verlossen, die behouden sijn op mijn palen, ende hy salse verblijden tot dat comen sal deynde, den dach des ordeels, daer ick v af ghesproken hebbe vant beghinsel.

35

Dits den droom die ghy ghesien hebt, ende dit sijn die bedie-

[p. *394]

denissen.

36

Aldus sijt ghij alleen weerdich gheweest dese alderhoochste verborghentheyt te weten.

37

Daer om scrijft alle dese dinghen die ghij ghesien hebt in eenen boeck, ende stelt die op een verborghen plaetse,

38

ende ghij sult die leeren den wijsen van uwen volck, wiens herten ghij weet dat souden moghen begrijpen ende bewaren dese secreten.

39

Maer ghij verbeyt hier noch seuen ander daghen, op dat v ghetoont worde al dat den alderhoochsten goet duncken sal v te vertoonen. Ende hij is van my wech ghetrocken.

40

Ende tes ghesciet doen alle tvolck ghehoort hadde dat die seuen daghen voorleden waren, ende dat ick niet en was weder ghekeert in die stadt, ende sij hebben hen alle vergadert vanden minsten totten meesten, ende sijn tot my comen, ende hebben my ghesproken segghende,

41

⁺Wat hebben wij v misdaen, oft wat hebben wij teghen v onrechtuerdelijck ghedaen, dat ghij ons verlatende, gheseten hebt op dese plaetse?

+ D

42

Want ghij sijt ons alleen ouerbleuen van alle den volcke, ghelijck eenen druyf vanden wijngaert, ende ghelijck een lichtvat in een doncker plaetse, ende ghelijck een hauene ende een scip behouden van den tempeest.

43

Oft en sijn ons niet ghenoech die quade dinghen die ons ghescieden?

44

Daer om eest sake dat ghij ons verlaet, hoe veel beter haddet ons gheweest dat wij oock verbrant waren met den brant van Sion?

45

Want wij en sijn niet beter dan die ghene die daer ghestoruen sijn, Ende sij hebben met luyder stemmen gheweent. Ende ick heb tot hen gheantwoort ende gheseyt,

46

Hebt betrouwen Israel, ende en wilt niet bedroeft sijn ghij Iacobs huys,

47

want v ghedenckenisse es voor den alderhoochsten, ende die stercke en heeft v niet vergheten in die becoringhe.

48

Ende ick en heb v niet verlaten, noch ic en ben niet wech gheghaen van v lieden, maer ick ben op dese plaetse ghecomen, dat ick bidden soude voor die verwoestheyt van Sion, ende dat ick bermherticheyt soecken soude voor die vernederinghe van uwer heylichmakinghe.

49

Ende uv gaet een ieghelijc wederom in sijn huys, ende ick sal tot v comen nae dese daghen.

50

Ende tvolck is ghereyst alsoo ick hen gheseydt hebbe in die stadt.

51

Ende ic heb int velt gheseten seuen daghen, ghelijck hij my gheboden hadde, ende ick adt alleen van die bloemen des ackers, van den cruyden is mijn spijse gheworden in dien daghen.