Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xi. Capittel.

1

⁺ENde ick heb ghesien eenen droom, ende siet daer quam op vander zee eenen aern, die twaelf vloghelen van vederen hadde, ende drij hoofden.

+ A

2

Ende ick heb ghesien, ende siet hy reycte sijn vloghelen wt tot allen landen, ende alle die winden des hemels blaesden op dien, ende sij worden vergadert.

3

Ende ick heb ghesien, ende van sijnen vederen worden teghen vederen gheboren, ende sy worden ook tot cleyn ende luttel vederkens,

4

want sijn hoofden waren rustende, ende sijn middelste half hooft was meerderdan die ander hoofden, maer het ruste met hen.

5

Ende ick heb ghesien, ende siet dien aern vlooch met sijnen vederen, ende hij heeft gheregneert op die aerde, ende ouer die ghene die daer op woonen.

6

Ende ick heb ghesien dat haer al onderworpen was dat onder den hemel es, ende niemant en seyde teghen haer, noch oock gheen vanden creatueren die op daerde sijn,

7

Ende ick heb ghesien, ende siet dien aern es opghestaen op sijn clauwen, ende hij heeft een stemme wt ghelaten met sijnen vederen segghende,

8

En wilt al te samen niet waken, slaept een ieghelijck in sijn plaetse, ende bij tijde waket,

9

maer die hoofden laet totten laetsten bewaert worden,

10

Ende ick heb ghesien, ende siet daer en ghinck gheen stemme van sijnen hoofden, maer van dat middelste sijns lichaems.

11

Ende ick heb sijn teghen vederen ghetelt, ende siet sij waren achte,

12

Ende ick heb ghesien, ende siet van die rechte sijde is een veder opghestaen, ende die heeft gheregneert ouer alle die aerde.

13

Ende tes ghesciet doen die regneerde dat haer dat eynde quam, ende haer plaetse en worde niet ghesien, ende die nauolgende is op ghestaen, ende sij heeft gheregneert,.Dese hielt veel tijts,

14

Ende tes ghesciet doen sij regneerde, ende haer eynde quam, ⁺alsoo dat sij niet ghesien en worde ghelijck dierste.

+ B

15

Ende siet een stemme es wtghelaten segghende,

16

Hoor ghij die soo langhen tijd daerde ghehouden hebt, die vercondighe ic v eer dat ghij beghint niet ghesien te worden,

17

Niemant nae v en sal uwen tijt houden, noch oock niet die helicht van dien.

18

Ende die derde heeft haer opghehauen, ende sij heeft die heerlijcheyt ghehouden ghelijck die eerste, ende sij en is oock niet meer ghesien.

19

Ende alsoo ghesciedet alle den anderen elcken besonder dat sij heerscapie hadden, ende dan wederom niewaerts ghesien en worden.

20

Ende ic heb ghesien, ende siet in den tijt worden die nauolghende vederen opghericht van die rechte sijde, dat sij oock souden heerscappie houden, ende van desen wasser diet hielden, maer nochtans ter stont en werden sij niet ghesien,

21

want die sommighe van dien worden op ghericht, maer sij en hielen gheen heerscappie.

22

Ende ick heb ghesien nae desen, ende siet die twaelf vederen en worden nerghers ghesien, ende twee vederkens,

23

ende daer en was niet ouerbleuen in dies aerns lichaem, dan twee rustende hoofden, ende ses vederkens.

24

Ende ick heb ghesien, ende siet vanden ses vederkens, sijnder twee afghesceyden, ende sijn ghebleuen onder thooft, dwelck is aen die rechte syde, want die vier bleuen in hen plaetse.

25

Ende ick sach, ende siet die vederen onder die vloghelen dachten hen seluen op te richten, ende die heerscappien te houden.

26

Ende ic heb ghesien, ende siet die eene is op ghericht, maer ter stont en worde sij niet ghesien,

27

ende die tweede snellijcker dan dierste en worden oock niet meer ghesien.

28

Ende ick heb ghesien, ende siet die twee die ouerbleuen waren, dachten bij hen seluen dat sij oock souden regneren,

29

ende doen sij daer op dachten, siet een vanden rustenden hoofden dwelck dmiddelste was, worde wacker, want dat was dmeeste vanden twee hoofden.

30

Ende ick heb ghesien dat die twee hoofden met hen veruult waren,

31

ende siet dat hooft is omghekeert met desen die met hem waren, ende het heeft gheten die twee vederen onder die vloghelen, die dachten te regneren.

32

Ende dit hooft verwaerde alle die aerde, ende het hadde heerscappie in die aerde ouer alle die daer op woonden met grooten arbeyt, ende het heeft die macht ghehouden van daertrijck int ronde ouer alle die vloghelen die gheweest hadden.

33

Ende ick heb ghesien nae desen, ende siet dat middelste hooft en worde haestelijck niet meer ghesien, ende dat ghelijc die vloghelen.

34

Doen waren daer noch twee hoofden ouerbleuen, die welcke oock desghelijcs gheregneert

[p. *393]

hebben op die aerde, ende op die ghene die daer in woonen.

35

Ende ick heb ghesien, ende siet het hooft dat aen die rechte sijde was heeft verslonden het ghene dat aen die slincke sijde was.

36

Ende ick heb een stemme ghehoort segghende tot mij, Siet teghen v ouer, ende aenmerct dat ghij siet.

37

Ende ick heb ghesien, ende siet ghelijck eenen leuw opghewect wt den bossche briesschende, ⁺ende ick heb ghesien dat hy wt liet eens menschens stemme tot dien aern, ende hy heeft gheseydt segghende,

+ D

38

Hoort ghy ende ick sal tot v spreken, ende die alder hoochste sal v segghen,

39

En syt ghy niet die te bouen ghegaen sijt vanden vier dieren die ick hadde doen regneren in myn werelt, ende op dat door die soude comen deynde van haren tyden?

40

Ende dat vierde comende heeft alle die dieren verwonnen die voorby gheghaen syn, ende metter macht heuet die werelt ghehouden met grooter beuinghen, ende alle den omganck der aerden met eenen alder quaetsten arbeyt, ende het heeft bewoont den omganck der aerden met bedroch.

41

Ende ghij hebt die aerde gheordeelt niet metter waerheyt,

42

want ghy hebt ghequelt die saechtmoedighe, ende ghequetst die rustende, ende bemint die loghenachtighe, ende ghy hebt bedoruen hen wooninghen die vrucht deden, ende vernedert hen mueren die v gheen hinder ghedaen en hebben.

43

Ende v versmaeden is opghegaen totten alderhoochsten, ende v houerdie totten stercken.

44

Ende die alderhoochste heeft aensien die houerdighe tijden, ende siet sij sijn gheeyndt, ende haer groote sonden sijn volbrocht

45

Daer om en wort niet meer ghesien ghy aernt, ende v vreesselijkce vloghelen, ende v alderquaetste vederkens, ende v boose hoofden, ende v alderquaetste clauwen, ende allen v ydel lichaem,

46

op dat vercoelt mach worden alle daertrijck, ende wederkeere verlost van uwen ghewelt, ende dat die hope dat recht ordeel, ende bermherticheyt van hem die haer ghemaect heeft.