Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .x. Capittel.

1

⁺ENde tes ghesciet doen mijn soen in sijn slaepcamer ghegaen was, dat hy viel ende sterf,

+ A

2

ende wij wierpen alle die lichten omme, ende alle mijn borghers sijn opghestaen om mij te troosten, ende ic heb gherust tot den anderen dach tot inder nacht

3

Ende tes ghesciet doen sij alle rusten van mij te troosten dat ick rusten soude, soo ben ic des nachts opghestaen, ende gheuloden ende ghecomen ghelijck ghij siet in dit velt,

4

ende ick dencke nv niet weder te keeren in die stadt, maer hier te blijuen, ende niet te eten oft te drincken, maer sonder ophouden rouwich te sijne ende te vasten tot dat ick sterue.

5

Ende ic heb verlaten die woorden daer ic inne was, ende ic heb gheantwoort met gramscap tot haer, ende heb gheseyt,

6

Ghij sottinne bouen alle vrouwen en siedi niet onsen rouwe, ende dat ons ghesciet?

7

Hoe dat Sion ons moeder met alder droefheyt bedroeft is, ende met een vernederinghe vernedert, ende sij weent zeer crachtelijck.

8

Ende nv aenghesien dat wij alle weenen, ende droeuich sijn, ende wij alle bedruct sijn, bedroefde ghij v van eenen sone?

9

Want vraecht die aerde, ende sij sal v segghen, want sij is, die sculdich is te beweenen den val van soo veel menschen die op haer groeyen,

10

ende wt haer sijn sij alle vant beghinsel gheboren, ende daer sullen ander comen, ende siet sij wandelen bij nae alle ter verderffenissen, ende hen menichte wort een vernielinghe.

11

Aldus wie moet dan meer weenen anders dan dese die soo groote menichte verloren heeft meer dan ghij die om eenen rouwich sijt?

12

Maer eest dat ghij my segghet, Mijn ghescrey en is niet ghelijck der aerden, want ick heb die vrucht mijns lichaems verloren, welck ick met droefheden ghebaert hebbe, ende met pijnen vorts ghebracht,

13

maer die aerde doet nae die maniere der aerden, ende die teghenwoordighe menichte is in haer wech ghegaen alsoo die wt comen was,

14

ende ick segghe v, ghelijck ghij met aerbeyt ghebaert hebt, alsoo gheeft die aerde haer vrucht den mensch vant beghinsel, hem diese ghemaect heeft.

15

Daer om nv behoudt bij v seluen uwen rouwe, ende verdraecht vromelijck die misuallen die v gheschiet sijn.

16

Want eest dat ghij dat eynde Gods voor rechtuerdich houdt, soo suldi ooc sijnen raet inden tijt ontfanghen, ende in sulcken dinghen ghepresen worden.

17

Daer om gaet in die stadt tot uwen man.

18

Ende sij seyde tot my, Ick en sals niet doen, noch ick en sal in die stadt niet gaen, maer ick sal hier steruen.

19

Ende ick heb noch meer tot haer ghesproken ende gheseyt,

20

En wilt dit woort niet doen, maer volcht hem die v raet. Hoe veel sijn die vallinghen van Syon? Laet v vertroosten om den rouwe van Ierusalem.

21

Want ghij siet doch, hoe dat ons heylichmakinghe verwoest is, ende onsen outaer omgheworpen is, ende onsen tempel verdoruen is,

22

ende ons Psalter spel vernedert is, ende onsen loff sanck swijghende is, ende ons verhueghen ommachtich gheworden is, ende dlicht ons candelaers wt gheblasen is, ende dat die arcke ons testaments gherooft is, ende onse heylighe plaetsen ontsuyuert sijn, ⁺ende den naem die op ons aengheroepen is bij nae ontheylicht, ende onse kinderen hebben versmaetheyt gheleden, ende onse priesteren sijn verbrant, ende onse Leuiten sijn in die gheuanghenisse wech ghegaen, ende onse maechden sijn ontsuyuert, ende onse vrouwen sijn vercracht, ende onse rechtuerdighe sijn gherooft, ende onse cleyn kinderen sijn verloren, ende onse ionghelinghen hebben ghedient, ende onse stercke sijn omanchtich gheworden,

+ B

23

ende het dalder meeste, dat teeken van Syon, is van sijn glorie ontsloten, want het is gheleuert den handen der gheender die ons haten.

24

Daer om ghij, scudt af v groote droefheyt, ende doet van v die menichte der smerten, dat die stercke ws mach ghenadich sijn, ende die alder hoochste sal v ruste maken, een ruste vanden arbeyden.

25

Ende tes ghesciet doen ic tot hear sprack, dat haer aensicht ende ghedaente onuersienlijck blincte, ende haer ghesicht worde claer lichtende, alsoo dat ick zeer verscrict worde van haer, ende dachte wat dat was?

26

Ende siet haestelijck liet sij wtgaen een groot gheluyt van een stemme, vol vreesen, alsoo dat die aerde beefde van tgheluyt der vrouwen.

27

Ende ick heb ghesien, ende siet die vrouwe en vertoonde haer mij niet meer, maer een stadt worde ghetimmert, ende die plaetse worde vertoont van grooten fundamenten, ende ick heb gheuvreest, ende gheroepen met luyder stemmen, ende gheseyt,

28

Waer is Vriel die enghel, die van ierst tot mij ghecomen was? want hij heeft mij doen comen in die menichte in desen wtganck mijns herten, ende mijn eynde is gheworden ter verganckelijcheyt, ende mijn ghebet tot lachter.

29

Ende doen ick dese dinghen sprekende was, siet so quam hij tot mij, ende hij heeft mij ghesien,

30

ende siet ick was ghestelt als een doode, ende mijn verstant was verureemt, ende hij heeft mijn rechte hant ghehouden, ende mij versterct, ende hij heeft mij op mijn voeten ghestelt, ende hij heeft mij gheseyt,

31

Wat is v? ende waer om is v verstant verslaghen, ende den sin ws herten, ende waerom wordi verstoort?

32

Ende ic heb gheseyt, Om dat ghij mi verlaten hebt. Ic heb inder waerheyt ghedaen nae uwe woerden, ende ick ben wtghegaen opt velt, ende siet ick heb ghesien, ende ic sie dat ick niet wtghespreken en can.

33

Ende hij heeft tot mi gheseyt, Staet als een man, ende ic sal v beweghen.

34

Ende ick heb gheseyt, Spreect ghij mijn Heere in mij, en wilt mij niet verlaten, dat ic niet te vergheefs en sterue,

35

want ic heb ghesien dinghen die ic niet en wiste, ende ic hoor dat ic niet en weet.

36

Oft wort mijnen sin bedroghen, ende droomt mijn ziele?

37

Daer om bidde ick v nv, dat ghij uwen dienaer wilt toonen van dien ouerganck.

38

Ende hij heeft tot mij gheantwoort ende gheseyt, Hoort mij ende dat ick v mach leeren ende ic sal v segghen daer ghij af vreest, want die alderhoochste heeft v veel verborghen dinghen gheopenbaert.

39

Hij heeft ghesien uwen rechten wech, om dat ghi sonder ophouden droeuich waert voor v volck, ende ghij weende zeer om Sion.

40

Dit is dan tverstant van dat visioen dat v gheopenbaert heeft, een luttel hiervoor.

41

Die ghi hebt sien weenende,

[p. *392]

hebdi begonst te troosten,

42

maer nv en siedi die ghedaente der vrouwen niet, maer v heeft gheopenbaert een stadt die ghetimmert wort,

43

ende want sij v vertelde vanden val haers soens, soo is dit die wtlegghinge.

44

⁺Dese vrouwe die ghij ghesien hebt die is Syon, ende want sij v gheseyt heeft, die welcke ghij nv aensien sult als een stadt ghetimmert.

+ D

45

Ende want sy v gheseyt heeft dat sij onvruchtbaer was dertich iaren, om dat dertich iaren gheleden was, dat in haer noch gheen offerande gheoffert en was,

46

ende tes ghesciet nae dertich iaren dat Salomon heeft ghetimmert die stadt, ende hij heeft offeranden gheoffert, dat was doen die onvruchtbarighe eenen sone baerde.

47

Ende dat sij v gheseyt heeft dat sij dien opgheuoedt hadde met arbeyde, dat was die bewooninge in Ierusalem.

48

Ende want sij v gheseyt heeft dat haer sone in sijn slaepcamer ghestoruen is, ende dat hem eenen val gheboerde, dat was den val die in Ierusalem ghesciet es.

49

Ende siet ghij hebt haer ghelijckenisse ghesien, ende om dat sij haren sone beweende, soo hebdi haer begonst te troosten, ende van dese dinghen die ghesciet sijn die waren v te verclaren.

50

Ende nv siet die alderhoochste dat ghy wter herten bedroeft sijt gheweest, ende dat ghij wt ganscher herten voor haer lyden hebt, dus heeft hij v vertoont die claerheyt van haerder glorien, ende die schoonheyt van haerder frayheyt.

51

Want daer om heb ick v gheseyt dat ghij int velt blijuen soudt daer gheen huys ghetimmert en is,

52

want ick wist wel dat die alderhoochste v begonst dese dinghen te toonen,

53

daerom heb ick v gheseyt dat ghij inden acker comen soudt, daer gheen fundament van timmeringhen en is.

54

Want het werck van eens menschens timmeragien en mocht niet staende ghehouden worden in die plaetse daer des alderhoochsten stadt begonste vertoont te worden.

55

Daer om en wilt ghy niet vreesen, noch v herte en verscricke hem niet, maer gaet daer binnen, ende besiet die blinckende claerheyt ende grootheyt der timmeringhen, soo verre alst ghesicht van ooghen begrypen mach om te sien,

56

ende daer nae suldi hooren soo veel als tghehoor uwer ooren begrijpen mach om te hooren,

57

Want ghij sijt salich bouen vele, ende sijt gheroepen bij den alderhoochsten ghelijck luttel,

58

Maer op den nacht die morghen comne sal suldi hier blyuen,

59

ende die alderhoochste sal v toonen die visioenen der opperster dinghen welck die alderhoochste doen sal den gheenen die op daerde woonen, van den wterste daghen. Ende ick heb gheslapen dien nacht ende den anderen also hij mij gheseyt hadde.