Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .v. Capittel.

1

⁺MAer vanden teekenen, siet die daghen sullen comen in die welcke sullen omuanghen worden alle die op die aerde woonen met veel rijcdommen, ende den wech der waerheyt sal verborghen worden, ende dlant sal onuruchtbaer wesen vanden ghelooue,

+ A

2

ende die onrechtuerdicheyt sal vermenichfuldicht worden bouen dese die ghi seluer siet, ende bouen die ghene die ghy in voortijden ghehoort hebt,

3

ende den voetstap sal een settinghe hebben int lantscap dat ghi nv siet regneren, ende sij sullen dat verwoest sien,

4

Maer eest dat die alderopperste v verleent te leuen, soo suldi sien nae dat derde trompet, ende die sonne sal onuerhoets weder des nachts lichten, ende die mane drijmael inden dach,

5

ende vanden houte sal bloet druppen ende den steen sal sijn stemme gheuen, ende die luyden sullen beroert worden,

6

ende hi sal regneren den welcken sij niet en hopen die op die aerde woonen, ende die voghelen sullen een ouertredinghe maken,

7

Ende die Sodomijtsche

[p. *385]

zee sal visschen wtworpen, ende tsal des nachts een gheluyt gheuen die welcke veel niet en verstonden, Maer sij sullen alle haer stemme hooren,

8

ende te veel plaetsen sullen groote diepten worden, ende tvier sal daer dicmael wederom wtghesonden worden, ende die wilde beesten sullen ouer trecken, ende die maensuchtighe vrouwen sullen baren wonderlijcke ghedrochten,

9

ende in die soete wateren sullen soutwateren gheuonden worden ende alle vrinden sullen malcanderen bestormen, ende den sin sal dan verborghen worden, ende tverstant sal ghesceyden worden in sijn verborghentheden,

10

ende tsal van vele ghesocht worden, maer niet gheuonden, ende die ongherechticheyt sal vermenichfuldicht worden, ende die oncuyscheyt opder aerden,

11

Ende deen lantscap sal dat naeste vraghen ende segghen. Is door v die rechtuerdicheyt ghegaen recht doende? Ende dat salt loochenen,

12

Ende tsal sijn in dien tijde, ende die menschen sullen hopen ende niet verweruen, ⁺sij sullen arbeyden ende haer weghen en sullen gheenen voorspoet hebben,

+ B

13

Dese teekenen v te segghen is my toeghelaten, ende eest sake dat ghy wederom biddet ende weent ghelijc ghi nv doet, ende dat ghy vastet seuen daghen lanck, soo suldi weder hooren meerder dinghen dan dese,

14

Ende ic ontwaecte ende mijn lichaem verscricte hem seere, ende mijn ziele arbeyde soo dat sij flau worde,

15

ende den Enghel die comen was heeft mi ghehouden die in my sprack ende hy heeft my versterct ende op mijn voeten ghestelt,

16

Ende tis gheschiet inden tweeden nacht, ende Salathiel die ouerste des volcs is tot my comen ende heeft tot my gheseyt. Waer waerdi? ende waerom is v aensicht droeue?

17

En weet ghy niet dat Israel v beuolen is in dlant van hen oueruoeringhe?

18

Daerom staet op ende eedt broot, noch en verlaet ons niet, ghelijck een herder sijn cudde in die handen der quaden woluen

19

Ende ick seyde hem. Gaet wech van my ende en coemt by my niet, Ende hy heuet ghehoort als ickt gheseyt hebbe, ende hy is van my ghegaen,

20

ende ick heb gheuast seuen daghen huylende ende weenende ghelijc my beuolen hadde Vriel die Enghel,

21

Ende tis gheschiet nae die seuen daghen, ende mijn ghedachten hebben my wederom seer quellijc gheweest,

22

ende mijn ziele creech wederom den gheest des verstants, ende ick begonste wederom te spreken voor den alderhoochten woorden

23

ende ick seyde. Heerscappende Heere wt allen die bosschen der aerden, ende wt alle haer boomen hebdi eenen wijngaert alleen vercoren,

24

ende wt alle die aerde der werelt hebdi voor v vercoren een grachte, ende wt alle die bloemen der werelt hebdi voor v vercoren een lelie,

25

ende wt alle die afgronden der zee hebt ghy v een riuier veruult ende wt alle die ghetimmerde steden hebdi voor v seluen gheheylicht Sion,

26

ende wt alle die ghescapen vlieghende dieren hebdi voor v ghenoemt een duyue, ende wt alle die ghescapen beesten hebdy v voorsien een scaep,

27

ende wt alle die vermenichfuldichde volcken hebdi voor v een volc vercreghen, ende die wet van allen menschen ghepresen, hebt ghi desen volcke ghegheuen dat ghy begheert hebt,

28

Ende nv o Heere waerom hebdy dat een volck soo vele volcken gheleuert? Ende hebt op die een wortel die ander bereydt, ⁺ende ghy hebt uwen eenighen verstroyt onder vele,

+ C

29

ende si hebben hem vertreden die teghen uwe beloften spraken, ende die uwen ghetuyghenissen niet en gheloofden

30

Ende waert alsoo dat ghy v volck haetet dat behoort van uwen handen ghecastijt te worden,

31

Ende tis gheschiet doen ick die woorden ghesproken hadde datter een Enghel tot my ghesonden is, die te voren tot my comen was den voorleden nacht,

32

ende hy heeft tot my gheseyt. Hoort my ende ick sal v onderwijsen, ende luystert nae my ende ick sal noch meer segghen voor v,

33

Ende ick heb gheseyt. Spreect mijn Heere, Ende hi heeft tot my gheseyt. Ghy sult v seere ontgaen int ghepeys uwer herten voor Israel, Oft hebde ghy dien lieuer, dan die ghene die hem ghemaect heeft?

34

Ende ic heb tot hem gheseydt. Neen ick Heere, maer ick heb rouwich ghesproken, Want mijn nieren doen my pijne aen tot allen vren, soeckende te begrijpen den wech des alderhoochsten, ende te ondersoecken een deel sijns ordeels,

35

Ende hy heeft tot my gheseyt. Ghy en vermoghes niet, Ende ick heb gheseyt. Waerom Heere? Waer toe was ick gheboren, ende waerom en worde mijns moeders lichaem mi niet een graf, dat ick niet en hadde te sien den arbeydt van Iacob, ende die vermoetheyt des gheslachts van Israel?

36

Ende hi heeft tot mi gheseyt. Telt my die dinghen die noch niet comen en sijn ende vergadert my die verstroyde druppelen, ende maect my wederom groeyende die verdroochde bloemen,

37

ende doet my open die besloten binnenste verborghentheden, ende brengt my voorts die winden die daer in verborghen sijn, ende toont mi dat beelt der stemmen, ende dan sal ick v toonen den arbeyt die ghy begheert te sien

38

Ende ick heb gheseyt. Heerscapper Heere, wie ysser die dit weten mach dan die metten menschen gheen wooninghe en heeft?

39

Maer ick ben onwijs ende hoe sal ic connen segghen van desen dinghen daer ghy my afghevraecht hebt?

40

Ende hy heeft tot my gheseyt. Alsoo ghy niet en cont ghedoen een van allen den dinghen die gheseyt sijn, alsoo en suldi niet connen vinden mijn ordeel oft int eynde die liefde, die ick den volcke beloeft hebbe,

41

Ende ick heb gheseyt. ⁺Maer siet Heere ghi sijt by den ghenen die ten eynde sijn, ende wat sullen sij doen die voor my gheweest hebben, oft wij, oft die ghene die na ons sullen sijn,

+ D

42

Ende hy heeft tot my gheseyt. By eender croonen sal ic mijn ordeel ghelijcken, want ghelijck der laetster traecheyt niet en is, alsoo en is ooc der ierster snelheyt niet,

43

Ende ick heb gheantwoort ende gheseyt. En conste ghy niet ghemaken die ghene die ghemaect sijn, ende die noch sijn, ende die comen sullen altesamen, op dat ghy v ordeel te eer mocht vertoonen?

44

Ende hy heeft tot my gheantwoort, ende gheseyt. Die creatuere en mach haer niet haesten bouen den scepper noch die werelt en mach niet verdraghen die ghene die daer in sullen ghescapen worden te samen,

45

Ende ick heb gheseyt. Alsoo ghi uwen dienaer gheseyt hebt, dat ghy leuendich makende hebt leuendich ghemaect die creatuere van v tsamen ghescapen, ende die creatuere verdroocht, soo mach sij nv ooc die teghenwoordighe tsamen verdraghen,

46

Ende hy heeft tot mi gheseyt. Vraecht die moeder der vrouwen ende ghi sult tot haer segghen. Als ghy baert, waerom doedi dat metter tijt? Daerom vraecht haer dat sij thien vruchten tsamen gheue,

47

Ende ick seyde. Dat en soude sij voorwaer niet vermoghen dan metter tijt,

48

Ende hy heeft tot my gheseyt. Ich heb oock der aerden een moeder ghegheuen voor die ghene die op haer ghesaeyt sijn metter tijt,

49

Want ghelijck een ionck kint niet voorts en brengt dat den ouden toebehoort, alsoo heb ick die werelt bescict die van my ghemaect is,

50

Ende ick heb ghevraecht ende gheseyt. Als ghy my nv eenen wech ghegheuen hebt soo sal ick voor v spreken, want onse moeder daer ghi my af gheseyt hebt, die is noch ionck, ende sij naeckt nv haerder outheyt,

51

Ende hy heeft mi gheantwoort, ende gheseyt. Vraecht haer die baert ende sij salt v seg-

[p. *386]

ghen,

52

Want ghy sult haer segghen. Waerom en sijn die ghene die ghi nv ghebaert hebt niet ghelijck den ghenen die voor v waren maer minder van lingden,

53

Ende sij sal v ooc segghen. Het sijn andere die in die ioncheyt der cracht gheboren sijn, ende andere die ten tijden vander outheyt gheboren sijn, als die moeder cranc wort,

54

Hierom aenmerct ooc ghi dat ghi lieden van minder lengden sijt, dan die ghene die voor v waren,

55

ende die nae v comen sullen oock van minder lengden wesen dan ghi, als creatueren die nv out worden, ende die stercheyt der ionger iuecht voorby gaende,

56

Ende ic heb gheseyt. Ic bidde Heere heb ick gracie voor v ooghen gheuonden thoont uwen dienaer door den welcken ghy v creatuere besoect.