Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .iij. Capittel.

1

⁺INt dertichste iaer van der stadt veruallingen, was ick in Babilonien, ende ick ben verscrict gheworden rustende op mijn bedde, ende mijn ghedachten clommen tot op mijn herte,

+ A

2

om dat ick ghesien hadde die verwoestheyt van Syon, ende die oueruloedicheyt der gheender die Babilonien woonden,

3

ende mijnen gheest is seer verstroyt gheweest, ende ick heb begonst te spreken tot den alderhoochsten bevreesde woerden, ende ic heb gheseyt,

4

O heerscappie hebbende Heere ghy hebt gheseyt vanden beghinne doen ghi die aerde plantet, ende dat alleen, ende hebt gheboden den volcke,

5

ende hebt Adam ghegheuen een doot lichaem. Ende dat selue was een schepsele van uwen handen, ende ghy hebt in hem

[p. *383]

gheblasen den gheest des leuens, ende hy is leuende gheworden voor v,

6

ende ghy hebt hem gheleyt int Paradijs, dwelck v rechte hant hadde gheplant, eer die eerde voerts quam.

7

Ende desen hebdi beuolen dat hy uwen wech soude lief hebben, ende hy is dien voerby ghegaen, ende terstont hebdi in hem ghestelt die doot ende in sijnen afcoemsten, ende daer sijn gheboren versceyden, lieden ende gheslachten, ende volcken, ende maechscappen der welcker gheen ghetal en is.

8

Ende elck volck heeft ghewandelt in sijnen wille, ende wonderlijcke dinghen deden sij voor v, ende sij versmaedden uwe gheboden.

9

⁺Weder om hebdi op eenen tijt ghebracht den ouervloet der wateren op die bewoonders der werelt, ende ghy hebtse verdaen.

+ B

10

Ende eenen yeghelijcken van hen is ghesciet (ghelijck Adam het steruen) alsoe was desen den ouervloet der wateren.

11

Ende ghy hebt eenen van desen ghelaten Noe met sijnen huyse, ende van hem alle die rechtuerdighe.

12

Ende tes ghesciet doen sij begonsten te vermenichfuldighen die op der aerden woonden, ende dat sij hadden vermenichfuldicht kinderen ende volcken ende veel versceyden lieden, ende sij hebben van nieus begonst meer der boosheyt te doen dan die ierste.

13

Ende tes ghesciet doen sij boosheyt deden voer v, soe hebdy v eenen man wtghecosen van desen wiens naem was Abraham.

14

Ende ghi hebt hem lief ghehadt, ende ghi hebt hem alleen uwen wille ghetoont,

15

ende ghy hebt hem toeghescict een eewich testament, ende ghy hebt hem gheseyt dat ghy nemmermeer sijn saet en soudt verlaten. Ende ghy hebt hem ghegheuen Isaac, ende Isaac hebdi Iacob ghegheuen ende Esau.

16

Ende ghy hebt voor v wt ghesceyden Iacob, Maer Esau hebdy van v ghesceyden. Ende Iacob is worden tot een groote menichte.

17

Ende tes ghesciet doen ghy sijn saet wt Egypten leyddet dat ghy dat ghebracht hebt tot opden berch Sina.

18

Ende ghy hebt die hemelen ghebuycht, ende die aerde vast ghestelt, ende beroert den omganck der werelt, ende ghy hebt die afgrondighe diepten doen beuen, ende die werelt verstoort

19

ende v glorie is ghegaen door die vier poorten des viers, ende der aertbeuinghen, ende des wints, ende des vorsts, dat ghy Iacobs sade soudt die wet gheuen, ende den gheslachte van Israel naersticheyt.

20

⁺Ende ghy en hebt van hen niet ghenomen dat quaet herte, dat v wet in hen mocht vrucht doen.

+ C

21

Want den iersten Adam draghende een quaet herte heeft ouertreden ende is verwonnen, ende ooc mede alle die van hem gheboren sijn.

22

Ende het is gheworden een blijuende crancheyt, ende die wet met des volcs herte met die quaetheyt der wortelen, ende tes wech ghegaen dat goet was, ende bleuen dat quaet was.

23

Ende die tijden sijn voerleden ende die iaren sijn voleynt, ende ghy hebt v eenen dienaer verwect ghenaemt Dauid,

24

ende ghy hebt hem gheseyt dat hy timmeren soude die stadt ws naems, ende daer in v te offeren wierock ende offeranden.

25

Ende dat is ghesciet veel iaren, ende sij hebben misdaen die in die stadt woonden,

26

in alles doende ghelijck Adam ghedaen hadde ende alle sijn afcoemsten, want sij ghebruycten oock een quaet herte.

27

Ende ghy hebt v stadt gheleuert in die handen van uwen vianden.

28

Doen sij ooc beter dinghen die in Babilonien woonen? Ende sal die daerom ouer Sion heerscappie hebben?

29

⁺Maer het is ghesciet doen ick hier ghecomen was ende ghesien hadde die boosheden der welcker gheen ghetal en is, ende veel misdoende soe heeft mijn ziele ghesien, op dit dertichste iaer, ende mijn herte begaf my,

+ D

30

want ic heb ghesien hoe dat ghy hen sondighende verdraecht, ende hebt gespaert die booslijck deden, ende ghy hebt verdaen v volck ende behouden uwe vianden, ende ghy en hebbes niet te kennen ghegheuen.

31

Ick en heb niet ghedacht hoe dat desen wech moet verlaten sijn. Doet Babilon oock beter dinghen dan Sion?

32

Oft heeft eenich ander volck v ghekent sonder Israel? oft wat gheslachten hebben uwen ghetuyghenissen ghelooft ghelijck Iacob?

33

Der welcker loon niet en is ghecomen voor ooghen, noch haren arbeyt en heeft gheen vrucht ghedaen. Want ick heb doergaende doer die heydenen ghegaen, ende ick heb die ghesien ouervloeyende ende niet denckende op uwe gheboden.

34

Nu dan hier om soe weecht in die waghe onse boosheden, ende der gheender die in die werelt woonen, ende uwen naem en sal niet gheuonden worden, elders dan in Israel.

35

Oft wanneer en hebben sij niet ghesondicht in v aensicht die op daerde woonen? oft wat volck heeft alsoe uwe gheboden onderhouden?

36

Dese voerwaer suldi by namen vinden die v gheboden ghehouden hebben, maer die heydenen en suldi niet vinden.