Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .viij. Capittel.

1

⁺ENde nae desen als regneerde Artaxerses die coninck van Persen soe is comen Esdras die sone Azarie, des soens Helcie, des soens Solome,

+ A

2

des soens Sadoc, des soens Achitob, des soensAmeri, des soens Azahel, des soens Bocci, des soens Abisue, des soens Phinees, des soens Eleazarus, des soens Aaron des ierste Priesters.

3

Dese Esdras is opcomen van Babilonien doen hy was scrijuer ende verstandich in die wet van Moyses, die welcke hem ghegheuen is van den Heere den Godt van Israel om voerts te leeren ende te doen.

4

Ende die coninc heeft hem glorie ghegheuen om dat hy gratie gheuonden hadde, in alle weerdicheden ende begheerte voor sijn aensicht.

5

Ende daer isser tsamen met hem op ghegaen vanden kinderen van Israel ende vanden Priesters ende Leuiten, ende vanden heylighen sanghers des tempels, ende vanden doerwaerders ende dienaers des tempels in Ierusalem.

6

Int seuenste iaer doen Artaxerses regneerde in die vijfste maent, welc was dat seuenste iaer sijns rijcs, sijn sij (wt Babilonien gaende op die nieu mane der vijfster maent)

7

ghecomen in Ierusalem, nae sijn ghebodt, nae den voerspoet des wechs die hen van haren heere ghegheuen was.

8

Want in dese dinghen was Esdras seer gheleert, dat hy niet en soude achter laten yet van die dinghen die vander wet des Heeren ende vanden gheboden waren, ende leerende gheheel Israel alle rechtuerdicheyt ende recht ordeel.

9

Ende comende die Artaxersis des conincs scriftueren screuen hebben gheleuert een ghescrift dwelck comen was van Artaxerses den coninck aen Esdram den Priester, ende leser van die wet des Heeren, welcs inhout hier nae ghestelt is.

10

Die coninck Artaxerses Esdre den Priester ende leser van des Heeren wet Salicheyt.

11

Ick beleefdelijcker ordeelende in weldaden, heb beuolen den ghenen die wt dat Ioetsche volck ende vanden Priesteren ende Leuiten begheren vrijwillichlijck met v te gaen in Ierusalem.

12

⁺Hier om soe wie begheren met v te gaen, die laet comen te samen ende reysen alsoe my dat belieft heeft ende mijnen seuen vrienden den raetheeren,

+ B

13

dat sij besoecken moghen tghene datter ghedaen wort omtrent dat Ioetsche landt ende Ierusalem onderhoudende ghelijck ghy hebt in des Heeren wet,

14

ende dat sij die ghiften draghen den Heere den Godt van Israel, die ick gheloeft hebbe ende mijn vrienden, in Ierusalem ende alle tgout ende siluer dat gheuonden sal worden int lantscap van Babilonien den Heere

[p. *378]

in Ierusalem daer mede,

15

het welck ghegheuen is voor tvolck inden tempel van haren Heere die in Ierusalem is, dat dit gout ende siluer mach vergadert worden tot varren ende rammen ende lammeren ende ionghe boxkens ende der dinghen die daer toe behooren,

16

dat sij slachofferanden offeren den Heere op den outaer van haren Heere die in Ierusalem is.

17

Ende al dat ghy met uwen broeders sult willen doen van dat gout ende siluer, voldoet dat nae uwen wille, nae tghebot des Heeren ws Godts,

18

ende die gheheylichde vaten die v ghegheuen sijn tot die wercken van dat huys des Heeren ws Godts welck in Ierusalem is,

19

ende alle dandere dat v voor comen sal tot die wercken van ws Gods tempel, suldi gheuen van den coninclycken scadt,

20

als ghij met uwen broederen sult iet willen doen met den goude ende siluere, voldoet dat nae des Heeren wille.

21

Ende ick coninck Artaxerses heb voorwaer beuolen den bewaerders der scatten van Sijrien ende Phenicien, dat alle dat Esdras die priester ende leser van des Heeren wet scrijuen sal, hem naerstelijck ghegheuen worde, tot hondert talenten siluers, desghelijcs oec van goude,

22

ende tot hondert mudden tarwen, ende tot hondert cruycken wijns, ende ander dinghen die ouervloedich sijn sonder taxe oft mate.

23

Laetet al ghedaen worden na die wet, den alder hoochsten God datter messchien gheen gramscap op en stae int rijck des conincs ende sijn soens, ende sijns soens sonen.

24

Ende v lieden wort gheseyt dat ghij alle den priesteren ende Leuiten, ende den heyleghen sanghers ende dienaers van desen tempel

25

ende den scrijuers van desen tempel gheen tribuyt oft eenighe ander scattinghe en stelt, ende niemant en heb macht hen iet aen te tijghen,

26

maer ghij Esdra na die wijsheyt Gods stelt rechters ende paysmakers, ⁺in gheheel Sijrien ende Phenicen, ende leert alle die ws Gods wet niet en weten,

+ C

27

op dat alle die ghene die de wet sullen ouertreden naerstelick ghecastijt worden, tsij metter doot tsij met pyninghe, tsij oeck door scattinghe van ghelde, oft doer wtbanninghe.

28

Ende Esdras die scrijuer heeft gheseyt, Ghebenedijt sij onser vaderen Godt die desen wille heeft ghegheuen in des conincs herte om sijn huys vermaert te maken dat in Ierusalem is,

29

ende die mij heeft eerlijck ghemaect voor dat aensicht des conincs ende sijnder raetsheeren ende vrinden ende der sijnen die purpur draghen,

30

ende ick ben stantvastich van moede gheworden, nae die helpe des Heeren mijns Gods, ende ick heb wt Israel vergadert sommighe mannen dat sij met mi opgaen souden.

31

Ende dit sijn die ouersten nae haer familien, ende nae hen bedeylde gheslachten der gheender die met mij opghegaen sijn van Babilonien int rijck van Artaxerses

32

ende van Phares kinderen Gersomus, van die kinderen Siemarith Amenus, van Dauids kinderen Acchus die sone Scecilie,

33

van Phares kinderen Zacharias ende met hem sijn wedercomen hondert ende vijftich mannen,

34

vanden kinderen des leytsmans Moabilionis des Zaraei ende met hem twee hondert ende vijftich mannen,

35

van die kinderen Zachues Iechonias Zechoeli, ende met hem twee hondert vijftich mannen,

36

van die kinderen Sala Maasias Gotholie ende met hem tseuentich mannen,

37

van die kinderen Saphatie Zarias Micheli ende met hem tachtentich mannen,

38

van Iobs kinderen Abdias Ieheli ende met hem tweehondert ende twaelf mannen,

39

van die kinderen Banie Salimoth die sone Iosaphie ende met hem hondert ende sestich mannen, vanden kinderen Beer Sacharias Bebei ende met hem tweehondert ende acht mannen,

41

vanden kinderen Ezead Iohannes Eccetan ende met hem hondert ende thien mannen,

42

vanden kinderen Adonicam vanden lesten, ende dit sijn hen namen, Eliphalam die sone van Gebel, ende Semeias ende met hem tseuentich mannen.

43

Ende ick hebse vergadert aen den vloet die ghenoempt wort Thia, ende wy hebben daer onsen legher ghestelt drij daghen, ende ick hebse ouertelt.

44

Ende vander priesteren ende Leuiten kinderen en heb ick daer niet gheuonden,

45

⁺Ende ic heb ghesonden tot Eleazarum ende Eccelon ende Masinan ende Maloban ende Enaathan ende Samea ende Ioribum Nathan Enuagan Zachariam ende Mosollamum selue leytsmannen ende gheleert.

+ D

46

Ende ick heb hen gheseyt dat sij comen souden tot Loddeum die daer was bi die plaetse der scatcamere,

47

ende ick beual hen dat si Loddeo segghen souden ende sijnen broederen, ende den ghenen die in die scatcamer waren, dat si ons die ghene senden souden die tpriesterscap bedienen souden in des Heeren ons Gods huys.

48

Ende si hebben ons bracht doer die machtighe hant des Heeren ons Gods gheleerde mannen, vanden kinderen Moholi des soens Leui, des soens Israel Sebebian ende sijn sonen ende broederen, die waren achtien,

49

Asbian ende Amin van den kinderen der kinderen Chananei, ende hen kinderen twintich mannen.

50

Ende van den ghenen die den tempel dienden die welcke Dauid ghegheuen heeft, ende sij waren die ouerste totten wercke, den Leuiten in den tempel dienende, twee hondert twintich. Alle die namen sijn beteekent in die scriftueren,

51

Ende ic heb daer een vasten gheloeft voor die ionghelinghen in dat aensicht Gods, dat ik van hem voor ons een goede reyse vercrijghen soude, ende voor die ghene die met ons waren, ende haren kinderen, ende beesten om die listighe laghen.

52

Want ic scaemde mij van den coninc te begheren voetvolck ende peertvolck in ons gheselscap tot een bescermen teghen onse vyanden.

53

Want wij hadden den coninc gheseyt, dat die macht des Heeren met hen sijn sal die hen soecken met alder begheerten.

54

Ende wij hebben wederom den Heere onsen Godt ghebeden om dese sake, den welcken wij oock hebben ghenadich ghehadt, ende hebben onsen wensch ghehadt door onsen Godt.

55

Ende ick heb wt die ouersten des volcs ende wt die priesters des tempels ghesceyden twaelf mannen, ende Sedebiam ende Asamiam, ende met hen wt haren broederen thien mannen,

56

ende ick heb hen gheweghen tgout ende tsiluer ende die priesterlijcke ghereetscappen van dat huys ons Gods, welck die coninck ende sijn raetsheeren ghegheuen hadden, ende die princen ende gheheel Israel.

57

⁺Ende als ick dat gheweghen hadde, soo heb ick gheleuert hondert ende vijftich talenten siluers, ende silueren vaten van hondert talenten, ende hondert talenten gouts,

+ E

58

ende seuenmael twintich gouden vaten, ende metalen vaten van goeden metael blinckende twaelue gheuende tscijnsel van goude,

59

ende ick heb hen gheseyt, Ende ghij sijt heylich den Heere, ende die vaten sijn heylich, ende tgout ende siluer is beloeft den Heere onser vaderen Godt.

60

Waect ende bewaertse tot dat ghi die gheleuert hebt den ghenen die van den ouersten des volcs sijn, ende den priesteren ende Leuiten ende den Princen der steden van Israel in Ierusalem in die camer des priesters van ons gods huys.

61

Ende die priesters ende Leuiten die tgout ende tsiluer ende die vaten ontfanghen hebben, hebbense ghebracht in Ierusalem in des Heeren tempel,

62

Ende wij sijn wech

[p. *379]

ghereyst vanden vloet Thia, opden twaelfsten dach der ierster maent tot dat wij quamen in Ierusalem.

63

Ende doen den derden dach comen was, so is op den vierden dach gheweghen tgout ende tsiluer, ende gheleuert int huys des Heeren ons Gods Marimoth den sone Iori den priester,

64

ende met hem was Eleazar Phinees sone, ende met hen waren Iosadus die sone Iesu, ende Medias ende Bannis sone Leuiten, al te male bij ghetale ende ghewichte,

65

Ende tghewichte van dien is ghescreuen op die selue vre,

66

Ende die wter ghevanghenisse comen waren, hebben tot een sacrificie gheoffert den Heere den Godt van Israel, twaelf varren, voor alle die van Israel, sessentachtentich rammen,

67

tweenseuentich lammeren, twaelf bocken voor die sonde, ende voor die salicheyt twaelf coyen, alle tot des Heeren sacrificie,

68

Ende sij hebben des conincs gheboden herlesen den rentmeesteren des conincs ende den cleynen onderconinghen van Celessyrien ende Phenicen, ende sij hebben den volcke eere bewesen ende den tempel des Heeren,

69

Ende als dese dinghen volbracht waren soo sijn tot my ghecomen die ouerste segghende,

70

Dat gheslachte van Israel, ende die princen ende priesteren, ende Leuiten ende die wtlanders vanden heydenen ende die ingheborene des lants, en hebben hen onsuyuerheden niet ghesceyden vanden Chananeen ende Hetheen, ende Pherezeen ende Iebuseen end Moabiters ende Egiptenaren ende Idumeiters,

71

⁺want sij sijn versaempt met haerlieder dochteren, sij selue ende hen sonen, ende theylich saet is ghemenghet met die vreemde heydenen des lants, Ende die ouerste ende wethouders waren deser boosheyt deelachtich van tbeghinsel des rijcs,

+ F

72

Ende ter stont als ic dit ghehoort hadde, soo heb ick mijn cleederen ghescoert, ende dat heylich cleedt, ende wttreckende thair van mijnen hoofde ende baerdt, heb ick gheseten rouwich ende truerich,

73

Ende daer sijn tsamen comen alle die beruert waren doort woort des Heeren Gods van Israel by my weenende ouer dese boosheyt, ende ick sadt droeuich tot des auonts sacrificie,

74

Ende opstaende van die vastene, hebbende mijn cleederen ghescoort ende dat heylich cleedt nederknielende, ende mijn handen wtreyckende tot den Heere

75

seyde ick, Heere ic ben bescaemt ende vreese voor v aensicht,

76

want onse sonden sijn vermenichfuldicht op onse hoofden, ende onse boosheden sijn verhauen totten hemel toe,

77

want van die tijden onser vaderen sijn wy in groote sonde tot op desen dach,

78

Ende om onse ende onser vaderen sonden sijn wy gheleuert met onsen broeders, ende met onsen priesters. den coninghen der aerden ten swaerde, ende ter gheuanghenissen, ende ter beroouinghen met bescaemptheden tot op den dach van heden toe,

79

Ende nv hoe groot is dit, dat ons bermherticheyt ghesciet is van v Heere Godt, ende laet ons een worttel ende eenen naem in die plaetse uwer heylichmakinghen

80

om te ontdecken onsen lichter int huys van den Heere onsen Godt, om ons te gheuen spijse tallen tijden van onser slauernien,

81

Ende doen wij dienden soo en waren wy niet verlaten van den Heere onsen Godt, maer hij heeft ons in die gratie ghestelt, stellende ons die coninghen van Persen om ons spijse te gheuen,

82

ende te eeren den tempel van den Heere onsen Godt, ende te timmeren die verwoeste plaetsen van Syon, om ons te gheuen ghestadicheyt in Iudeen ende Ierusalem,

83

⁺Ende nu wat segghen wij Heere hebbende dese dinghen? Want wij hebben uwe gheboden ouerghetreden die welcke ghij ghegeuen hebt door die handen van uwen dienaers der propheten segghende,

+ G

84

Het lant daer ghij in comen sijt om dat te besitten tot een erffdom is een besmet lant van die onsuyuerheden der vreemderlinghen des lants ende hen onsuyuerheden hebben dat heel vervult met hen vuylichteyt,

85

Ende nv daerom en suldi v dochters met haer lieder sonen niet versamen ende hen dochteren en suldi niet nemen voor uwe sonen,

86

ende ghij en sult niet versoeken vrede met hen lieden te hebben tot allen tyden, op dat ghij machtich wordende moecht eten dat beste des lants, ende dat ghij die erffelijcheyt moecht wt deylen uwen kinderen tot inder eewicheyt,

87

Ende dat ons gheschiet, dat wordt al ghedaen om onse quade wercken, ende onse groote sonden,

88

Ende ghy hebt ons alsulcken wortel ghegheuen, ende wij sijn weederghekeert om te ouertreden v wettelijcke gheboden, dat wij ons verminghen souden met die onsuyuerheden van die vreemde heydenen van desen lande,

89

En suldi daer om teghen ons niet gram wesen om ons te verderuen tot dat onse wortel ende onsen naem niet achter ghelaten en worde?

90

Heere God van Israel ghij sijt warachtich, want ons is een wortel ouerbleuen tot op desen dach toe,

91

Siet wij sijn nv in v aenschijn in onse boosheden, want wij en behoirden niet alnoch te staen voor v aensicht in dese misdaden.

92

Ende doen Esdras aenbiddende ende weenende beleedt, ligghende ter aerden voor den tempel, soo sijn tot hem van Ierusalem vergadert een zeer groote scare, mannen ende vrouwen, ionghe, linghen ende ionghe dochters. Want daer was een groot ghescrey onder die menichte.

93

Ende doen Iechonias Ieheli wt den kinderen van Israel gheroepen hadde, soo heeft hij gheseyt tot Esdras, Wij hebben teghen den heere ghesondicht, dat wij ten houwelijcke ghenomen hebben vreemde vrouwen, van die heydenen des lants,

94

Ende nu ghij sijt ouer gheheel Israel, Laet dan hier aff eenen eedt wesen vanden heere om te verdrijuen alle onse huysvrouwen die vanden vreemdelinghen sijn met haren kinderen,

95

Ghelijck v beuolen is vanden ouders nae die wet des Heeren staende op soo verclaret,

96

want dese sake gaet v aen, ende wij sijn met v, doet manlijck,

97

Ende Esdras opstaende heeft besworen die princen der priesteren ende die Leuiten, ende gheheel Israel hier nae te doen, ende sij hebbent ghesworen.