Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .vij. Capittel.

1

⁺DOen waren Sisennes die onderconinck van Coelessyrien ende Phenicen, ende Satrabuzanes ende sijn medeghesellen ghehoorsaem den dinghen die van Dario den coninck beuolen waren

+ A

2

ende bescicten die heylighe wercken, seer naerstelijck medewerckende met die ouders der Ioden, die Princen van Syrien,

3

ende die heyleghe wercken hebben voerspoet ghehadt, doen daer propheteerden Aggeus ende Zacharias die propheeten.

4

Ende sij hebbent al volmaect door tghebodt des Heeren des Gods van Israel, ende wt den raet van Cyrus Darius ende Artaxerses des conincs van Persen.

5

⁺Ende ons huys is volmaect gheweest tot den drijentwintichsten dach der maent Adar int seste iaer Darij des conincs,

+ B

6

ende die kinderen van Israel ende die Priesters ende Leuiten, ende die andere die wter gheuanghenissen waren, die daer toe ghestelt sijn hebben ghedaen, nae tghene datter ghescreuen is int boeck van Moyses.

7

Ende sij hebben gheoffert tot die wijdinghe van des Heeren tempel, hondert varren, tweehondert rammen, vierhondert lammeren,

8

ende twaelf bocken voer die sonden van gheheel Israel, nae tghetal der gheslachten van Israel.

9

Ende die Priesteren ende Leuiten stonden met priesterlijcke cleederen, by gheslachten, ouer alle die wercken des Heeren des Godts van Israel nae Moyses boeck, ende die doerwaerders aen elcke doere.

10

Ende die kinderen van Israel hebben dat Phase ghehouden metten ghenen die wter gheuanghenissen waren op die veerthienste mane der ierster maent als die Priesters ende Leuiten gheheylicht waren.

11

Alle die kinderen der gheuanghenissen en waren niet tsamen gheheylicht, want die Leuiten worden tsamen gheheylicht.

12

⁺Ende alle die kinderen der gheuanghenissen hebben Tphase ten offer ghedoot haren broeders den Priesteren ende voor hen seluen.

+ D

13

Ende die kinderen van Israel die wter gheuanghenissen waren hebbent gheten alle die ouer ghebleuen waren van alle die versmadelijcheden der heydenen den Heere soeckende,

14

ende sij hebben feestelijck ghehouden den feest dach der ongheheefder brooden seuen daghen lanck blijde maeltijden houdende int aenschijn des Heeren.

15

Om dat hy den raet des conincs van Assyrien tot hen ghekeert hadde om te verstercken hen handen tot die wercken des Heeren des Gods van Israel.