Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .vi. Capittel.

1

⁺MAer int tweede iaer des conincrijcs van Darius soe heeft ghepropheteert Aggeus, ende Zacharias, die sone van Addin die propheten in Iudeen ende Ierusalem inden naem des Godts van Israel op hen.

+ A

2

Doen hebben Zorobabel Salathiels sone ende Iesus Iosedecs sone staende begonst te timmeren dat huys des Heeren welc te Ierusalem is, doen die propheten des Heeren by hen waren ende hen hielpen.

3

Maer in dien seluen tijt is tot hen comen Sisennes die onderconinc van Syrien ende Phenicen ende Satrabuzanes ende sijn ghesellen, ende hebben hen gheseyt,

4

Wt wiens beuel timmerde ghy dit huys, ende dit dack, ende volmaect alle dese andere dinghen, ende wie sijn dese timmermeesters?

5

Ende die ouders der Ioden die wter gheuanghenisse comen waren hadden gratie vanden Heere als dat versoeck ghedaen was,

6

ende sij en sijn niet beledt gheweest te timmeren, tot dat Dario van allen desen dinghen kennisse ghedaen was, ende dat die antwoerde ontfanghen worde.

7

Dat inhout des briefs welck sij Dario sonden, Sisennes die onderconinck van Syrien ende Phenicen ende Satrabusannes, ende sijn medeghesellen ouerste in Syrien ende Phenicen Dario den coninck salicheyt.

8

Alle dinghen moeten kenlijck sijn onsen Heere den coninck, dat als wy ghegaen sijn in dat Ioetsche lantscap, ende wy comen waren in Ierusalem soe hebben wy gheuonden sommighe

9

die daer timmerden dat groot huys Gods, ende den tempel van ghehouwen ende groote steenen, ende van costelijcke materie in die mueren,

10

⁺ende dat die wercken neerstelijck ghedaen worden, ende voertganck ende voerspoet hadde in hen handen, ende dat met alder glorien seer naerstelijck voldaen wort.

+ B

11

Doen vraechden wy die ouders segghende, Doer wiens ghehengen timmerde ghy dat huys, ende fundeert ghy dese wercken.

12

Ende daer om vraechden wijt hen, dat wy v souden laten weten die mannen ende die ouersten, ende wy eyschten van hen die namen der ouersten in ghescrifte.

13

Ende sij antwoerden ons segghende. Wy sijn des Heeren knechten die hemel ende aerde ghemaect heeft

14

ende dit huys worde ghetimmert voer veel deser iaren van eenen grooten ende seer stercken coninc van Israel, ende is volbracht.

15

Ende om dat ons vaderen waren verstoorende, ende ghesondicht hadden teghen Godt van Israel, soe heeft hy die gheleuert in die handen Nabugodonosors van Babilonien des conincs vanden Caldeen,

16

ende dit huys brekende hebben sij verbrant, ende tvolck hebben sij gheuanghen gheleyt in Babilonien.

17

Maer int ierste iaer als Cyrus die coninck van Babilonien regneerde soe heeft Cyrus die coninck ghescreuen datmen dit huys timmeren soude,

18

ende die heyleghe vaten gouden ende silueren, welck Nabugodonosor ghedraghen hadde wt den huyse dat te Ierusalem is, ende hadde die gheheylicht in sijnen tempel, heeft wederom wtghehaelt Cyrus die coninck wt den tempel die in Babilonien was, ende sij sijn gheleuert Zorobabel ende Salmanasaro den onderconinck,

19

ende hen is gheboden dat sij dese vaten souden offeren ende weder om stellen inden tempel die te Ierusalem was, ⁺ende dat sij dien tempel Gods op timmeren souden op sijn plaetse.

+ C

20

Doen leyde Salmanasarus die fundamenten van des Heeren huys welck in Ierusalem is, ende van doen tot nu toe wort dit ghetimmert, ende ten es noch niet volbrocht.

21

Nu hier om duncket v goet O coninck, soe laet ondersoecken in die coninclijcke librarien Cyrides conincs die in Babilonien sijn,

22

ende eest dat beuonden wort, dat by rade van Cyrus den coninck begonst is die timmeringhe van des Heeren huys, dat te Ierusalem is, ende dattet van onsen Heere den coninck gheordeelt wort, soe scrijue hy ons hier af.

23

Doen heeft Darius die coninc doen soecken in die librarien, ende daer is vonden in die stadt Ecbathanis die welcke is int midden des lants, een plaetse, daer dese dinghen in ghescreuen waren.

24

Int ierste iaer als Cyrus regneerde, soe heeft die coninck Cyrus beuolen datmen soude op timmeren het huys des Heeren dwelck in Ierusalem is, daer sij met een eewich vier sacrificie deden,

25

welcs huys hoochde sal wesen, van thien cubitus, ende die wijdde van tsestich cubitus, viercantich met drij rijen van ghehouwen steenen,

[p. *377]

ende met een ouerghewelft werck van des lants hout, ende met een nieuwe wt gaende timmeringhe, ende datmen die costen soude gheuen van Cyrus des conincs huys,

26

ende die heyleghe vaten van des Heeren huys, soe wel die gulden als die silueren, die welcke Nabugodonosor ghehaelt heeft wt des Heeren huys dat te Ierusalem is daer sij ghestelt waren, dat die daer weder ghestelt souden worden.

27

⁺Ende hy heeft Sisennen den onderconinck van Syrien ende Phenicen, ende Satrabuzanem ende sijnen ghesellen, die ouerste ghestelt waren in Syrien ende Phenicen gheboden dat sij besorghen souden, ende hen onthouden vander seluer plaetsen.

+ D

28

Ende ick heb beuolen datment gheheel soude timmeren, ende ick heb voersien dat sij hen helpen souden die vander gheuanghenisse der Ioden sijn tot dat den tempel van des Heeren huys heel volmaect ware.

29

Ende datmen van die scattinghe der tribuyten van Coelessyrien ende Phenicen naerstelijck gheuen soude een somme dien menschen tot des Heeren sacrificie, te weten Zorobabel den ouersten hooftman, tot stieren ende rammen ende lammeren,

30

desghelijcs oock tarwe, ende sout, ende wijn, ende olie ghestadelijck, allen iaren ghelijck dat die Priesteren die in Ierusalem sijn, segghen sullen datter verdaen wort sonder eenich vertrec,

31

op dat die spijsofferanden moghen gheoffert worden den hoochsten Godt voor den coninck ende sijn kinderen ende dat sij bidden moghen voor hen leuen,

32

ende datmen laet vercondighen soe wie yet ouertreeden van tghene dat hier ghescreuen is, oft versmaeden datmen sal nemen een hout van sijnen eyghenen houten, ende hem daer aen hanghen, ende die goeden van dien den coninck toescrijuen.

33

Daer om die Heere (wiens naem daer aengheroepen is) verdrijue ooc alle coninghen ende volcken, die hen hant wtreycken om te verbieden, oft quaet te doen dien huyse des Heeren dwelck in Ierusalem is.

34

Ick Darius die coninck heb beuolen dattet nae desen seer naerstelijck ghedaen worde.