Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .ix. Capittel

1

⁺ENde Esdras opstaende van voor die voorplaetse des tempels, is ghegaen in die slaepcamer des priesters Ionathe, des soons Nasabi,

+ A

2

ende daer herberghende en heeft hij gheen broot gheten noch gheen water ghedroncken ouer die boosheyt der menichten,

3

Ende daer is eenen wtroep ghedaen ouer gheheel Iudeen ende in Ierusalem tot allen den ghenen die wter gheuanghenissen in Ierusalem vergadert waren,

4

dat soo wie niet en quam te ghemoete binnen twee oft drij daghen nae tvonnisse der bijsittender ouderen, diens goeden souden ghenomen worden, ende hij soude gheordeelt worden als vreemt van die menichte der gheuanghenissen,

5

Ende si sijn alle vergadert die van Iuda ende Beniamins gheslachte waren, binnen drij daghen in Ierusalem, dit was die neghenste maent ende den twintichsten dach der maent,

6

Ende alle die menichte sadt in den voorhoff des tempels beuende om den teghenwoordighen winter,

7

Ende Esdras opstaende heeft tot hen

[p. *380]

gheseyt, Ghy hebt booselijc ghedaen nemende voor v ten houwelijcke vreemde vrouwen, dat ghy vermeerderen soudt die sonden van Israel.

8

⁺Ende nu gheeft belijdinghe ende grooten loof den Heere onser vaderen Godt

+ B

9

ende voldoet sijnen wille, ende sceydt van die heydenen des lants, ende van die vreemde huysvrouwen.

10

Ende alle die groote menichte heeft gheroepen ende sij hebben gheseyt met luyder stemmen. Ghelijck ghy gheseyt hebt soe sullen wy doen.

11

Maer aenghesien dat die menichte groot is, ende het winter tijt is, ende wy niet en connen sonder hulpe ghestaen, ende dit voer ons gheen werck en is van eenen daghe, oft van twee daghen, want wy hebben in desen veel ghesondicht,

12

soe laet die ouerste der menichten staen ende alle die ghene die met ons woonen, ende alle die vreemde huysvrouwen by hen hebben,

13

ende laet die priesteren ende rechters van allen plaetsen daer ouer staen ten bequamen tijde tot dat sij ontbinden des Heeren gramscap van deser saken.

14

Ende Ionathas die sone Ezeli ende Ozias Thecam hebbent aenghenomen nae dese te doen ende Bosoramus ende Leuis ende Sabatheus hebben mede ghearbeyt met hen.

15

Ende alle die wter gheuanghenissen waren, hebben ghestaen na alle dese dinghen.

16

⁺Ende Esdras die Priester heeft voor hem wtghecoren mannen wesende groote princen van haren vaderen nae hen namen ende sij sijn gheseten in die nieuwe mane der thiender maent om te ondersoecken dese sake.

+ C

17

Ende tes ghesloten vanden mannen die vreemde huysvrouwen hadden tot die nieuwe mane der ierster maent,

18

ende daer isser gheuonden vanden Priester onder een die vreemde huysvrouwen hadden.

19

Wt die kinderen Iesu Iodedecs sone, ende van sijnen broederen. Maseas ende Eliozerus ende Ioribus, ende Ioadeus,

20

ende sij hebben hen handen daer toe gheslaghen dat sij haerlieden huysvrouwen souden wt stoten, ende om te offeren eenen ram ter verbiddinghen voor hen onwetentheyt.

21

Ende wt den kinderen Semmer Mascas, ende Esses, ende Ieelech Azarias,

22

ende wt die kinderen Fosere Limosias Hismaenis, ende Nathanee Iussio, Reddus ende Talsas.

23

Ende wt den Leuiten Iorabdus, ende Semeis, ende Colnis ende Calitas, ende Facteas ende Coluas, ende Elionas,

24

ende vanden heyleghen sanghers, Eliazib Zaccarus,

25

ende vanden doerwaerders, Salumus ende Tolbanes,

26

ende wt Israel vanden kinderen Foro, ⁺Ozi, ende Remias ende Geddias ende Melchias, ende Michelus Eleazarus, ende Iammebias ende Bannas,

+ D

27

ende wt die kinderen van Iolamam, Chamas ende Zacharias, ende Iezrelus ende Ioddius, ende Erimoth, ende Helias,

28

ende wt die kinderen Zathoun Eliadas ende Liasumus. Zochias, ende Larimoth, ende Zabdis, ende Tebedias,

29

ende wt die kinderen Zebes, Iohannes ende Amanias, ende Zabdias, ende Emeus,

30

Ende wt die kinderen Banni, Olamus ende Maluchus, ende Ieddeus, ende Iasub, ende Azabus ende Ierimoth

31

ende wt die kinderen Addin, Naathus ende Moosias, ende Caleus, ende Raanas, Maaseas Mathathias, ende Beseel ende Bonnus ende Manasses.

32

Ende wt die kinderen Nuae Noneas, ende Afeas, ende Melchias, ende Sameas, ende Symon, Beniamin, ende Malchus, ende Marras,

33

ende wt die kinderen Asom Carianeus, Mathathias, ende Bannus, ende Eliphalach, ende Manasses, ende Semei.

34

Ende wt die kinderen Banni, Ieremias, ende Moadias, ende Abramus, ende Iohel, ende Baneas, ende Pelias, ende Ionas, ende Marimoth, ende Eliasib, ende Mathaneus, ende Eliasis, ende Orizas, ende Dielus, ende Senedius, ende Zambris, ende Iosephus.

35

Ende wt die kinderen Nobei, Idelus, ende Mathathias, ende Sabadus, ende Zecheda, Sedmi, ende Iessei, Baneas.

36

⁺Alle dese hadden ten houwelijck ghenomen vreemde vrouwen, ende sij hebbense verlaten met haren kinderen.

+ E

37

Ende die Priesters ende Leuiten, ende die wt Israel waren, hebben ghewoont in Ierusalem, ende in een gheheel lantscap, op die nieuwe mane der seuenster maent. Ende die kinderen van Israel waren in hen wooninghen,

38

Ende alle die menichte is tsamen vergadert op die voerplaetse, welck is aen die oostsijde der heylegher poorten.

39

Ende sij hebben gheseyt Esdre den ouersten Priester ende leser, dat hy halen soude die wet Moysi, die ghegheuen is vanden Heere den Godt van Israel.

40

Ende Esdras die ouerste Priester heeft die wet ghebrocht voor alle die menichte van hen lieden, vanden mans totten vrouwen, ende allen den Priesteren, om te hooren die wet, in die nieuwe mane der seuenster maent.

41

Ende hy las in die voerplaetse die daer is voor die heyleghe poorte des tempels, van smorghens vroech, totten auont toe, voor die mannen ende vrouwen, Ende sij hebben alle hen verstant totter wet ghegheuen.

42

Ende Esdras die Priester ende leser der wet, stont op eenen houten rechter stoel, die daer toe ghemaect was,

43

⁺Ende by hem stonden Mathathias, ende Samus, Ananias, Azarias, Vrias, Ezechias, ende Balsamus aen die rechte sijde,

+ F

44

ende aen die slincke sijde, Phaldeus, Misael, Malachias, Abustias, Sabus, Nabadias, ende Zacharias.

45

Ende Esdras heeft den boeck ghenomen voor alle die menichte, want hy sadt ten hoochsten met eeren in daensicht van hen allen,

46

Ende doen hi die wet al wt ghelesen hadde, soe stonden sij alle opgherecht, ende Esdras heet gebenedijt den Heere den alderhoochsten Godt, den almachtichsten Godt der heyrscaren.

47

Ende alle tvolc heeft geantwoert, Amen. Ende met opghehauen handen op waerts ten hemel sijn sij op die aerde gheuallen, ende hebben den Heere aenbeden,

48

Iesus ende Banaeus, ende Sarabias, ende Iaddimus, ende Accubus, ende Sabatheus, ende Calithes, ende Azarias, ende Ioradus, ende Ananias, ende Philias, Leuiten die de wet des Heeren voerts leerden, ende onder die menichte lasen die wet des Heeren, ende stelden elck die voore die de lesse verstonden.

49

⁺Ende Atharathes seyde Esdre den ouersten Priester, ende leser, ende den Leuiten, die de menichte leerden segghende,

+ G

50

Desen dach is den Heere gheheylicht, Ende sij weenden alle doen sij die wet ghehoort hadden,

51

Ende Esdras heeft gheseyt, Hier om als ghi wech ghegaen sijt soe eedt die aldervetste dinghen ende drincket dat aldersuetste, ende seyndt ghiften den ghenen diet niet en hebben,

52

Want desen dach des Heeren is heylich, ende en wilt niet droeuich sijn. Want die Heere sal v verclaren.

53

Ende die Leuiten vercondichdent hen allen int openbaer segghende, Desen dach is heylich en wilt niet droeuich wesen.

54

Ende sij sijn al wech ghegaen eten, ende drincken, ende blijde chiere maken, ende ghiften gheuen den ghenen diet niet en hadden, dat sij goede chiere maken souden. Want sij waren grotelijck verhuecht vanden woerden,

55

waer mede sij onderwesen waren. Ende sij sijn alle vergadert in Ierusalem om feestelijc blijscap te houden nae dat testament des Godts van Israel.

Hier eyndt dat derde boeck Esdre.