Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .iij. Capittel.

1

⁺DIe Coninck Darius heeft eenen grooten auontmael ghehouden alle sijnen dienstknechten, ende alle den regeerders van Meden ende Persen

+ A

2

ende allen die purpuren cleederen droeghen ende den rechteren ende raetsheeren ende drossaten onder hem, van Indien aen tot Ethiopien tot hondert ende seuenentwintich lantscappen.

3

Ende doen sij gheten ende ghedroncken hadden, ende versaet weder om ghinghen, doen is Darius die coninck op ghegaen in sijn slaepcamer ende heeft gheslapen ende is ontspronghen.

4

Doen hebben die drij ionghelinghen des lichaems bewaerders die des conincs lichaem bewaerden gheseyt deen totten anderen.

5

Laet elck van ons segghen een wtnemende wijs woert, ende soe wiens woert dat blijcken sal wijser te wesen dan des anders, dien sal Darius die coninck gheuen groote gauen,

6

als te moghen met Purpur ghecleedt sijn, ende wt gout te drincken, ende op gout te slapen, ende te rijden op eenen waghen met eenen gouden toom, ende eenen costelijcken witten lijnen hoet, ende eenen halsbant om sijnen hals te draghen,

7

ende op die tweede plaese sal hy sitten naest Darium om sijnder wijsheyt wille, ⁺ende hy sal Darius maeghe gheheeten worden.

+ B

8

Doen hebben sij elck hen woert ghescreuen ende toe gheseghelt ende gheleyt onder dat oorcussen van Darius den coninck,

9

ende sij hebben gheseyt, Als die coninck opstaen sal soe sullen wy hen ons ghescriften gheuen, ende soe wat die coninck vonnissen

[p. *373]

sal vanden drijen ende die regeerders van Persen, dat sijn woert het wijste is, dien sal die victorie ghegheuen worden alsoe dat bescreuen is.

10

Die eene heeft ghescreuen, Den wijn is sterck.

11

Die ander heeft ghescreuen, Die Coninck is sterker.

12

Die derde heeft ghescreuen, Die vrouwen sijn stercker. Maer bouen al soe verwint die waerheyt.

13

⁺Ende doen die coninck opghestaen was, soe hebben sij hen scriften ghenomen, ende hem die ghegeuen, ende hy heeftse ghelesen.

+ C

14

Ende sendende heeft hy gheroepen alle die regeerders van Persen ende die van Meden, ende die purpuren clederen droeghen, ende die rechteren, ende drossaten,

15

ende sij sijn inden raet gheseten ende die scrifturen sijn voor hen ghelesen,

16

ende hy seyde, Roept die ionghelinghen, ende sij sullen hen worden wtlegghen. Ende sij sijn gheroepen ende binnen ghecomen.

17

Ende hy seyde hen, Berecht ons van tghene datter ghescreuen is. Ende dierste heeft begonst die gheseyt hadde van die stercheyt des wijns,

18

ende hy heeft gheseyt, O ghy mannen hoe machtich is den wijn ouer alle die menschen die dien drincken.

19

Hy brengt tverstant in dolinghe. Item hy maect des conincs ende des weesen ghedachte ydel. ⁺Item der knechten ende der gheender die vrij sijn, der armen ende der rijcken,

+ D

20

ende alle herte bekeert hy tot vrijheyt ende blijscap ende hy en denct op gheen droefheyt noch scult,

21

ende alle inwendighe ghedachten des herten maect hy eerlijck, ende hy en denct niet op den coninck oft wethouderen, ende het doet alle dinghen by ponden spreken.

22

Ende sij en dencken niet (als sij ghedronken hebben) op vrientscap oft op broederscap. Maer niet langhe daer nae nemen sij swaerden,

23

ende als sij vanden wijn ontcomen sijn ende opgestaen, soe en sijn sij niet ghedachtich van tghene dat sij ghedaen hebben,

24

O ghy mannen en gaet den wijn niet te bouen? Wie denct alsoe te doen? Ende dit gheseyt hebbende heeft hy ghesweghen.