Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .ij. Capittel.

1

⁺ALs Cyrus die coninck van Persen regneerde tot volbrenghen van des Heeren woert doer den mont van Ieremias,

+ A

2

soe heeft die Heere verwect den gheest Cyrides conincs van Persen, ende hy heeft vercondicht ouer alle sijn rijck, tsamen met scriften

3

segghende, Dit seyt Cyrus die coninck van Persen. Die Heere van Israel die hooghe Heere heeft my coninck ghemaect op aertrijck,

4

ende hy heeft my te kennen ghegheuen dat ick hem een huys timmeren soude in Ierusalem, welck is dioetsche lant.

5

Esser iemant wt uwen gheslachte, sijn Heere gae met hem op te Ierusalem.

6

Hier om laet alle die omtrent die plaetse woonen hen helpen die op die selue plaetse sijn,

7

met gout, ende siluer, met ghiften, met peerden, ende behelpsaem beesten, ende metten anderen dinghen welck na die beloften voorghestelt worden in des Heeren huys dat te Ierusalem is.

8

Ende die Princen der gheslachten, dorpen, ende des lants van Iuda. Wt den gheslachte van Beniamin, ende die Priesters ende Leuiten welck die Heere verwect hadde om op te gaen ende te timmeren des Heeren huys, dat te Ierusalem is,

9

ende die rontsomme hen waren staende hebben gheholpen met allen hen gout ende siluer, ende beesten ende met seer veel beloefde gauen, veel van hen der welcker sin verwect was.

10

⁺Ende Cyrus die coninck heeft voertsbrocht die heyleghe vaten des Heeren, die welcke Nabugodonosor die coninck van Babilonien ouer gheuoert hadde van Ierusalem, ende die gheheylicht sijnen afgodt,

+ B

11

ende Cyrus die coninck van Persen die voertsbrenghende heeftse gheleuert Mythridato, die ouer sijn scatten was.

12

Ende doer desen sijn die gheleuert gheweest Salmanasar den president van dat Ioetsche lant.

13

Ende deser vaten was dit ghetal, Silueren dranck offer scalen twee duysent vierhondert, silueren beckens dertich, gouden schalen dertich, Item silueren schalen twee duysent vierhondert, ende duysent ander ghereetscappen,

14

ende alle die gulden ende silueren vaten waren vijf duysent acht hondert tsestich.

15

Ende sij sijn ghetelt Salmanasaro tsamen metten ghenen die wter gheuanghenissen van Babilonien comen waren te Ierusalem.

16

Maer ten tijden van Artaxersis des conincs van Persen hebben hem ghescreuen sommighe van den ghenen die woonden int Ioetsche lant ende in Ierusalem Balsamus ende Mithridatus ende Sabellius ende Rathimus Balthemus Samelius, die scrijuer, ende die ander woonende in Samarien ende anderen plaetsen, desen nauolghenden brief

17

den coninck Artaxersi. Heere v knechten Rathimus secretaris der ghesciedenissen ende Sabellius die scrijuer, ⁺ende die ander rechters ws hoefs In Coelessirien ende Phoenicen.

+ C

18

Ende nu sij kenlijc den Heere den coninck, hoe dat die Ioden die van v opcomen sijn tot ons, comende in Ierusalem die afvallighe ende seer quade stadt, haer ouens op timmeren ende rechten op die mueren, ende maken op den tempel.

19

Dus eest soe dat dese stadt ende haer mueren volmaect worden, soe en sullen sij niet alleen weygeren tribuyt te gheuen, maer sij sullen den coninghen oock wederstaen.

20

Ende want dit ghesciet aen den tempel, soe heuet ons goet ghedocht, dit niet te verachten,

21

maer onsen Heere den coninc dat te kennen te gheuen. Op datmen (by alsoe v coninck dit goet dunct) soecken mach in uwer vaderen boecken,

22

ende ghy sult vinden in die ghedenckenissen ghescreuen van desen, ende ghy sult weten dat dese stadt afvallich is, ende die coninghen ende steden beuechtende,

23

ende die Ioden afvallich, ende in haer orloghende van die oude tijden, om welcke saken dese stadt verdoruen is gheweest.

24

Nu hier om gheuen wy te kennen Heer coninc, dat (by alsoe dese stadt opghetimmert wort ende haer mueren opghericht worden) soe en sult ghy ghenen afganck hebben int lant van Coelesyrien ende Phoenicen.

25

⁺Doen screef die Coninck Rathimo die de ghesciedenissen bescreef, ende Balthemo ende Sabellio den scrijuer, ende den anderen ghestelden ende woonende in Sirien ende Phoenicen tghene dat hier na volcht.

+ D

26

Ick heb ghelesen den brief die ghy my ghesonden hebt. Hier om heb ick doen ondersoecken, ende tes gheuonden dat die stadt vander eewicheyt is den coninghen wederstaende,

27

ende die menschen afvallich ende orloghen daer in voerende, ende dat seer stercke coninghen waren in Ierusalem heerscappie hebbende, ende tribuyt eysschende van Coelesyrien ende Phoenicen.

28

Hier om heb ic nu gheboden datmen dien menschen verbieden sal die stadt te timmeren, ende verbieden datter voerts niet meer ghemaect en worde,

29

ende oock dat sij niet veele voerts en gaen, waer wt quaetheden comen, alsoe dat den coninghen quellinghe aenghebrocht soude worden.

30

Als dan dit ghelesen was dat van den coninck Artaxerses ghescreuen was, soe sijn Rathimus ende Sabellius die scrijuer, ende die met hen ghestelt waren tsamen vergadert, ende haestelijck ghecomen in Ierusalem, met peerde volck, ende een scare, ende eenen hoop volcs, ende begonsten die timmerende luyden te verbieden, ende sij hielen op van die timmeragie des tempels in Ierusalem totten tweede iare van Darius den coninck van Persen.