Den gheheelen Bybel, Inhoudende het oude ende nieuwe Testament (Leuvense bijbel 1548)

Dat ierste Capittel.

1

⁺ENDE Iosias heeft paesschen ghehouden in Iherusalem den Heere, ende heeft dat Phase ghedoot ten offer, op die veerthienste mane der ierster maent

+ A

2

stellende die priesters by buerten der daghen met priesterlijcke cleederen ghecleedt inden tempel des Heeren,

3

ende hy seyde den Leuiten den heylighen dienaren van Israhel, dat sij hen seluen heylich maken souden den Heere om te stellen die heylighe arcke des Heeren int huys dat Dauids sone Salomon die coninc getimmert heeft.

4

Ghi en sult die niet moeten op v scouderen draghen, Ende nv dient uwen Heere ende draecht sorghe voor sijn volck Israel, elck by een deel, nae uwe dorpen ende gheslachten,

5

nae die scrifttuere Dauids des conincks van Israel, ende nae die grootdadicheyt Salomons sijns soons, alle inden tempel, ende nae v vaderlijck deelken der gheender die staen int aenschijn der broederen der kinderen van Israel,

6

Doot ten offer dat paeschlam ende bereyt die sacrificien voor uwe broederen, ende doet nae tghebodt des Heeren dat Moysi ghegheuen is,

7

Ende Iosias heeft ghegheuen onder tvolck datter gheuonden is dertich duysent scapen, lammeren, ionghe bocken, ende gheyten, ende drij duysent calueren,

8

Dese sijn van die coninclijcke goeden ghegheuen nae die belofte den volcke, ende den priesters ten paesschen, scapen in ghetale twee duysent ende hondert calueren,

9

⁺Ende Iechonias, ende Semeias, ende Nathanael ghebroeders, ende Hasabias, ende Oziel, ende Coraba gauen totten phase vijf duysent scapen ende vijf hondert calueren,

+ B

10

Ende doen dese dinghen eerlijcken ghedaen worden, soo hebben die priesters ende Leuiten ghestaen, hebbende ongheheefde brooden by haren gheslachten,

11

Ende nae die deelen van haerder vaderen heerlijcheyt voor daenschijn des volcs offerden si den Heere nae tghene dat inden boec Moysi ghescreuen is,

12

ende sij hebben tpaeschlam metten vier ghebraden ghelijck dat behoorde, ende die slachofferanden hebben sij ghecoect in metalen ketelen ende potten, met goetwillicheyt,

13

ende sij hebben die ghedraghen tot al-

[p. *371]

len den ghenen die vanden ghemeynen volcke waren, ende nae desen hebben sij bereydt voor hen seluen, ende voor die priesters.

14

Want die Priesters offerden die vetten des inghewants tot dat die vre ouerleden was ende die Leuiten hebben voor hen seluen bereydt, ende voor hen broederen kinderen van Aaron.

15

⁺Ende die heylighe sanghers Asaphs kinderen, waren by oordene nae tghebodt van Dauid ende Asaph, ende Zacharias ende Ieddimus die vanden coninck ghestelt was,

+ C

16

Ende die doorwaerders aen elcke doere, alsoo dat niemant van hen van die sijne en ghinc, want hen broeders hebben voor hen spijse bereyt,

17

Ende tis volbracht al dat tot des Heeren sacrificie behoorde, Op dien dach hebben sij tphase ghehouden,

18

ende sij offerden slachofferanden op des Heeren sacrificie nae tghebot des conincs Iosie,

19

Ende die kinderen van Israel die op dien tijt gheuonden sijn hebben tphase ghehouden, ende den feestdach vanden ongheheefden brooden, seuen daghen lanck,

20

ende daer en is sulck phase niet ghehouden gheweest in Israhel van die tijden Samuels des propheets,

21

ende alle die coninghen van Israel en hebben sulck paesschen niet ghehouden, als Iosias ghehouden heeft, ende die priesters, ende Leuiten, ende Ioden ende gheheel Israel die gheuonden sijn in die woooninghe te Ierusalem,

22

op dat achthienste iaer als Iosias regneerde is tphase feestelijc ghehouden,

23

Ende Iosias wercken sijn wel ghesciet gheweest in sijns Heeren aensicht, den welcken hy met een volcomen herte vreesde,

24

ende tghene dat omtrent hem ghesciet was is bescreuen in die voorleden tijden, van die ghene die ghesondicht hebben ende die ongheestelijck gheweest hebben teghen den Heere bouen allen volcken, ende die des Heeren woorden niet ghesocht en hebben ouer Israel,

25

⁺Ende nae alle dese daet van Iosias is Pharao die coninck van Egipten opghetrocken comende in Charcamis vanden wech op den vloet Euphrates, ende Iosias is hem te ghemoete ghegaen,

+ D

26

Ende die coninc van Egipten heeft tot Iosiam ghesonden segghende. Wat heb ic met v te doen ghi coninc van Iuda?

27

Ic en ben vanden Heere niet ghesonden dat ic teghen v strijden soude, want ouer Euphraten is mijn orloghe, Keert haestelijc nederwaerts,

28

Ende Iosias en is niet wederghekeert opden waghen, Maer hy arbeyde om hem vechtende te verwinnen, niet achtende dwoort des propheets wt den mont des Heeren

29

maer hy stelde teghen hem eenen strijdt int velt van Mageddo, Ende die princen sijn nederwaerts ghetrocken totten coninc Iosiam,

30

Ende die coninc heeft gheseyt tot sijnen knechten. Doet my wech wt den strijde, want ic ben seer cranc gheworden, Ende ter stont hebben hem sijn knechten wt die slachoorden gevuert,

31

ende hy is ghegaen op sijnen tweeden waghen, ende comende tot in Ierusalem is daer ghestoruen ende begrauen in sijnder vaderen graf,

32

Ende in tgheheel lant van Iuda hebben sij Iosiam beweent, ende die ouerste met haren huysvrouwen hebben hem beclaecht tot opden dach van heden toe, Ende tis inghestelt datmen dat altijt doen soude in alle die gheslachten van Israel,

33

Maer dese dinghen sijn te voren ghescreuen int boeck der hystorien der coninghen van Iuda, ende alle die ghesciedenissen van Iosias wercken, ende sijn glorie, ende sijn verstant in des Heeren wet, ⁺ende die wercken die van hem ghedaen sijn, ende die niet ghescreuen en sijn int boeck der coninghen van Israel ende Iuda,

+ E

34

Ende die wt den volcke waren nemende Iechoniam den sone Iosie, hebben hem coninc ghemaect voor Iosias sijnen vader, doen hi drijendertich iaren out was,

35

Ende hy heeft ouer Israhel gheregneert drij maenden, Ende die coninck van Egipten heeft hem afghestelt, dat hi in Ierusalem niet regneren en soude,

36

ende hy heeft het volck ghescadt op hondert talenten siluers ende een talent gouts.

37

Ende die coninck van Egipten heeft Ioacim sijnen broeder ghestelt coninck van Iuda ende Ierusalem

38

ende hi bandt die wethouders Ioacim ende Zaracel sijnen broeder, ende opnemende heeft hy die gheuoert in Egipten,

39

Ioacim was vijfentwintich iaren oudt, doen hy begonste te regneren int lant van Iuda ende Ierusalem, ende hy heeft quaet ghedaen in des Heeren aensicht,

40

Ende nae desen soo is Nabugodonosor die coninck van Babilonien opcomen ende bindende hem met eenen metalen bant heeft hy hem ghebracht in Babilonien,

41

ende die heylighe vaten des Heeren heeft Nabugodonosor ghenomen, ende wechghedraghen, ende gheheylicht in sijnen tempel in Babilonien,

42

Want van sijnder onsuyuerheyt ende ongoddelijcheyt is ghescreuen int boeck van die tijden der coninghen,

43

Ende Ioachin sijn sone heeft voor hem gheregneert, Ende doen hy coninck ghemaect was soo was hy achthien iaren oudt,

44

⁺Ende hy heeft gheregneert drij maenden ende thien daghen in Ierusalem, ende hy heeft quaet ghedaen in des Heeren aenschijn,

+ F

45

Ende nae een iaer soo heeft Nabugodonosor ghesonden ende hem ouergheuoert in Babilonien, tsamen met den heylighen vaten des Heeren,

46

Ende hy heeft Sedechiam ghemaect coninc van Iuda ende Iherusalem, doen hy eenentwintich iaren out was, ende hy heeft gheregneert elf iaren,

47

Ende hy heeft quaet in des Heeren aensicht ghedaen, ende hy en heeft hem niet ontsien van die woorden die gheseyt waren van Ieremias den propheet wt den mont des Heeren,

48

ende besworen sijnde vanden coninck van Babilonien is hy meyneedich hem afgheuallen, ende sijnen neck ende sijn herte verhart sijnde heeft hy ouertreden die wettelijcke gheboden des Heeren des Godts van Israhel,

49

Ende die ouersten van des Heeren volck hebben veel dinghen boosselijck bedreuen ende hebben ongoddelijc ghedaen bouen alle die onsuyuerheden der heydenen, ende sij hebben des Heeren tempel ontsuyuert die heylich was in Ierusalem,

50

Ende haerder vaderen Godt heeft ghesonden door eenen Enghel om hen wederom te roepen om dat hy hen ende sijn tabernakel spaerde,

51

Maer sij bespotten sijn Enghelen, ende op wat dach dat die Heere ghesproken heeft, soo waren sij sijn propheten bespottende,

52

Die welcke is tot gramscap verwect op sijn volck, ⁺om hen ongoddelijcheyt wille, ende hy heeft beuolen den coninghen van den Chaldeen dat sij opquamen,

+ G

53

Dese hebben ghedoot hen ionghelinghen metten swaerde rontsomme haren heylighen tempel, ende sij en hebben niet ghespaert die ionghers ende die ouders ende die maechden ende die ionghelinghen, maer sij sijn alle gheleuert in hen handen,

54

ende alle die heylighe vaten des Heeren, ende die coninclijcke scatten weder om nemende, hebben sij die ghedraghen in Babilonien,

55

ende sij hebben verbrant des Heeren huys, ende afgheworpen die mueren van Ierusalem, ende haer torren hebben sij metten viere verbrant,

56

ende sij hebben verdoruen allen hen eerlijcheden, ende te niet ghebracht, ende die daer ouerbleuen waren vanden swaerde hebben sij gheleyt in Babilonien,

57

Ende sij waren sijn knechten tot dat die Persen regneerden int veruulen van des Heeren woort door den mont van Ieremias,

58

tot dat het lant godertierlijck sijn rustdaghen

[p. *372]

hielt, alle den tijt van sijnder verwoestheyt heeft dat lant die rustdaghen ghehouden, tot in die volbringhinghe van seuen ende tseuentich iaren.