Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .ix. Capittel.

1

⁺ENde opden vierentwintichsten dach van deser maent sijn die kinderen van Israel tsamen ghecomen met vasten, ende met sacken ghecleedt, ende aerde op hen,

+ A

2

Ende tsaet der kinderen van Israel is ghesceyden van allen vreemden kinderen, ende sij stonden ende beleden hen sonden, ende haerder vaderen boosheden,

3

Ende sij sijn tsamen opgheresen, om te staen ende sij hebben ghelesen int boeck van die wet des Heeren haers Godts, vierwerf sdaechs, ende vierwerf beleden ende aenbaden sij den Heere haren God,

4

Ende op den trap der Leuiten hebben ghestaen Iosue, ende Bani, ende Cedmiel, Sabania, Bonni, Sarebias, Bani, ende Chanani, ende hebben gheroepen met luyder stemmen tot den Heere haren Godt,

5

Ende die Leuiten hebben gheseyt tot Iosue, ende Cedmiel, Bonni Hasebania, Sarebia, Odaia, Sebuia, Phathathia. Staet op, Ghebenedijt den Heere uwen Godt, van der eewicheyt tot inder eewicheyt, ende ghebenedijden moeten sij den hooghen naem uwer glorien met alle ghebenedijdinghe ende lof,

6

⁺Ghy selue Heere alleen, ghi hebt ghemaect den hemel, ende den hemel der hemelen ende allen hen heyrscare, die aerde ende alle dat daer in is, die zee ende alle dat daer in is, ende ghi maect dese alle leuende ende theyr des hemels aenbidt v,

+ B

7

ghy sijt seluer die Heere God die vercoren hebt Abram, ende hebt hem geleydt wt dat vier der Chaldeen, ende sijnen naem Abraham ghestelt

8

Ende ghi hebt sijn herte ghetrouwe vonden voor v, ende ghi hebt met hem een verbont vast gemaect, dat ghy hem gheuen soudt dlant der Chananiters, ende Hethiters, ende Heueiters, ende Amorriters, ende Pherezeiters, ende Iebuseiters, ende Gergeseiters op dat ghi dat soudt leueren sinen sade, ende ghi hebt uwe woorden volbrocht, want ghi sijt rechtuerdich,

9

Ende ghi hebt ghesien dat verdriet onser vaderen in Egipten ende haer gheroep hebdi ghehoort op die roode zee,

10

Ende ghi hebt teekenen ende onghewoonlijcke mirakelen ghedaen op Pharao, ende alle sijn knechten, ende op alle sijn volc van dien lande, Want ghi wist wel dat sij houerdelijc ghedaen hadden teghen hen, ende ghy hebt v seluen eenen naem ghemaect ghelijc dat is op desen dach,

11

Ende ghi hebt die zee ghesceyden voor henlieden, ende sij sijn ghegaen door dmidden der zee int drooghe ende hen veruolgers hebdi gheworpen in die diepte ghelijc eenen steen in crachtighe wateren,

12

Ende in een colomne der wolcken hebdi hen leytsman gheweest inden dach ende door een columne des viers des nachts, dat si den wech sien souden daer ouer dat sij ghinghen,

13

Ende opden berch van Sinai sijt ghi oock nederghedaelt, ⁺ende hebt met hen ghesproken vanden hemel, ende hebt hen ghegheuen rechte ordeelen ende die wet der waerheyt, ceremonien, ende goede gheboden,

+ C

14

Ende uwen gheheylichden sabboth dach hebdi hen ghetoont, ende die gheboden ende ceremonien ende die wet hebdi hen gheboden, door die hant Moysi ws dienaers

15

Broot vanden hemel hebdi hen oock ghegheuen in haren hongher, ende water wt den steen hebdy hen doen loopen doen sij dorst hadden, ende ghy hebt hen gheseyt dat sij souden ingaen ende besitten dlant, waer ouer dat ghy v hant hebt opghehauen dat ghijt hen gheuen soudt,

16

Maer sij ende onse vaderen hebben houerdichlijck ghedaen, ende hebben hen necken verhart ende en hebben nae v gheboden niet ghehoort,

17

Ende sij en hebben niet willen hooren, ende sij en hebben niet ghedachtich gheweest uwer wonderlijcheden, die ghy hen ghedaen hadt, Ende sij hebben hen necken verhart, ende hen hooft daer toe ghegheuen dat sij wederghekeert souden worden tot hen slauernie als door een spijticheyt, Maer ghi God ghenadich, goedertieren, ende bermhertich, lanckmoedich, ende van veel ontfermens en hebt hen niet verlaten,

18

ende hoe wel dat sij voor hen seluen een ghegoten calf ghemaect hadden ende gheseyt. Dit is v Godt die v wt Egipten gheleydt heeft, Ende deden groote blasphemien,

19

⁺Maer nochtans ghy door v menichfuldighe bermherticheden en hebt hen niet ghelaten in die woestijne, die columne der wolcken en is van hen niet ghegaen des daechs, om hen te leyden inden wech ende die columne des viers des nachts, om hen den wech te toonen daer door sij gaen souden,

+ D

20

Ende uwen goeden gheest hebdi ghegheuen die hen leeren soude ende v Manna en hebdi van haren mont niet wech ghenomen, ende water hen ghegheuen in den dorst,

21

Veertich iaren lanck hebdy hen gheuoedt in die woestijne, ende hen en heeft niet ghebroken, hen cleederen en sijn niet veroudert, ende hen voeten en sijn niet versleten,

22

Ende ghy hebt hen conincrijcken ende volcken ghegheuen, ende ghy hebt hen loten ghedeylt ende sij hebben beseten dlant van Sehon, ende dlant des conincs Hesebon, ende dlant van Og den coninc van Basan,

23

Ende ghy hebt hen kinderen vermenichfuldicht ghelijc die sterren des hemels, ende ghi hebtse bracht int lant daer ghy haren vaderen af gheseydt hadt dat sij daer in gaen souden ende dat besitten,

24

Ende hen kinderen sijn ghecomen, ende hebben dlant beseten, ende ghy hebt verneerdert voor henlieden die inwoonders des lants die Chananeen, ende ghy hebt die in hen handen ghegheuen

[p. *367]

ende hen coninghen ende dat volck des lants, ⁺dat sij dien souden doen ghelijc hen beliefde,

+ E

25

Aldus hebben si inghenomen besloten steden ende vette landouwen, ende si hebben beseten huysen vol van alderhande goet, waterputten van ander luyden ghemaect, wijngaerden, ende olijfgaerden, ende veel vruchtdraghende boomen, ende sij hebben gheten ende sijn versaet ende vet worden, ende hebben oueruloedighe wellusticheden ghehadt door v groote goetheyt,

26

Maer si hebben v verwect tot gramscap ende sijn van v ghesceyden, ende sij hebben v wet wech gheworpen achter hen rugghen, ende v propheten hebben sij ghedoot, die hen vermaenden dat sij wederkeeren souden tot v, ende sij hebben seer groote blasphemien ghedaen,

27

Ende ghy hebtse ghegheuen in die hant van haren vianden ende sij hebben hen verdriet aenghedaen, Ende ten tijde van haren grooten lijden, hebben si tot v gheroepen, ende ghy hebtse vanden hemel ghehoort ende nae v menichfuldighe bermherticheden hebdi hen ghegheuen verlossers diese verlossen souden wt die hant van haren vianden,

28

Ende als sij gherust hadden soo sijn sij wederom ghekeert dat sij quaet doen souden voor v aenschijn, ende ghi hebtse verlaten in haerder vianden handen, ende die hebbense beseten, Ende sij sijn wederom bekeert ende hebben gheroepen tot v, ende ghy hebtse vanden hemel verhoort, ⁺ende verlost door v bermherticheden te veel tijden,

+ F

29

Ende ghy hebtse betuycht dat sij wederkeeren souden tot v wet, Maer sij hebben houerdelijc ghedaen, ende en hebben v gheboden niet ghehoort, ende in v rechten hebben sij ghesondicht, die welcke een mensch doen sal ende daer in leuen, ende sij hebben haer scouderen afghekeert, ende haren neck verhart, ende sij en hebben niet ghehoort

30

Ende ghy hebt veel iaren ouer hen vertrocken, ende ghy hebtse betuycht met uwen gheest door die hant van uwen propheten, ende sij en hebben niet ghehoort ende ghy hebtse gheleuert in die hant van die volcken der lantscappen,

31

Maer in v groote bermherticheden en hebdi hen niet ghebracht tot vernielinghe, noch ghi en hebtse niet verlaten, Want een Godt der bermherticheden ende goedertieren sijt ghy,

32

Hierom nv onse God groot, sterck, ende veruaerlijck, bewarende tverbont ende die bermherticheyt en wilt van uwen aensicht niet keeren, alle den arbeydt die ons gheuonden heeft, onse coninghen, ende onse princen, ende onse priesteren, ende onse propheten, ende onse vaderen ende allen uwen volcke van die daghen des conincs van Assur, tot op desen dach toe,

33

⁺Ende ghi sijt rechtuaerdich in alle die dinghen die ouer ons comen sijn, want ghy hebt die warachticheyt ghedaen, maer wi hebben booslijc ghedaen,

+ G

34

Onse coninghen, onse princen, onse priesteren, ende onse vaderen en hebben v wet niet ghedaen ende sij en hebben gheen acht gheslaghen op v gheboden, ende ghetuyghenissen die ghi onder hen ghetuycht hebt,

35

Ende in hen goede conincrijcken ende in v menichfuldighe goetheyt die ghi hen ghegheuen hadt, ende in dit seer breedt ende vet lant dat ghy gheleuert hadt voor hen aensicht, soo en hebben sij v niet ghedient, noch sij en sijn niet wederom ghekeert van haren alderquaetsten opsetten,

36

Siet wij seluer sijn noch heden eyghen knechten, ende dlant dat ghy onsen vaderen ghegheuen hebt, dat sij tbroot ende tgoet van dien eten souden, ende wij sijn seluer daer in eyghen slauen

37

Ende die vruchten van dien lande worden oueruloedelijck vergadert voor die coninghen, die welcke ghi ouer ons ghestelt hebt om onser sonden wille, ende si hebben heerschappie ouer onser lichamen, ende ouer onse lastdraghende beesten, nae haren wille, ende wij sijn in grooter quellinghen,

38

Hierom ouer alle dese dinghen, soo maken wij seluer een verbont, ende scrijuent ende onse princen, Leuiten ende priesteren beseghelent.