Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .viij. Capittel.

1

⁺ENde die seuenste maent was comen, ende die kinderen van Israel waren in hen steden, Ende alle tvolc is vergadert ghelijc een man aen die strate die daer is aen die water poorte, ende sij hebben Esdras den scrijuer gheseyt, dat hy halen soude den boec van Moyses wet, welcke die Heere Israel gheboden hadde.

+ A

2

Hierom heeft Esdras die wet ghebracht voor die menichte der mannen ende vrouwen, ende voor alle diet verstaen mochten opden iersten dach der seuenster maent,

3

Ende hi heeft daer in ghelesen openbaerlijck in die strate die by die waterpoorte was van smorghens tot den middach toe, voor daenschijn der mannen ende vrouwen, ende der wijsen, ende die ooren van alle tvolck waren opgherecht totten boeck,

4

Ende Esdras die scrijuer stont op eenen houten graet, den welcken hy ghemaect hadde om te spreken, ende by hem stonden Mathathias, ende Semeia, ende Ania, ende Uria ende Helcia, ende Maasia, te sijnder rechter sijden, ende ter slincker sijden Phadaia, Misael, ende Melchia, ende Hasum, ende Hasbadana, Zacharia, ende Mosollam,

5

Ende Esdras heeft den boec open ghedaen voor alle tvolc, ⁺want hy stont hooghe bouen alle tvolck, Ende doen hy dien open ghedaen hadde soo heeft alle tvolc ghestaen,

+ B

6

Ende Esdras heeft den Heere Godt ghebenedijt met luyder stemmen, Ende alle tvolck heeft gheantwoort Amen, Amen, opheffende hen handen, ende sij hebben hen neder ghebuycht ende Godt aenghebeden plat neder ter aerden,

7

Maer Iosue ende Bani, ende Serebia, Iamin, Accub, Sebthai, Odia, Maasia, Celita, Azarias, Iozabed, Hanan, Phalaia die Leuiten hebben stillicheyt ghemaect onder tvolck om die wet te hooren, ende tvolck stont in sijn steden,

8

Ende sij hebben int boeck der wet ghelesen besceydelijck ende openlijck om te verstaen, ende sij hebbent verstaen doement las,

9

Doen seyde Nehemias (die is Athersata) ende Esdras die priester ende scrijuer, ende die Leuiten diet den heelen volck bedieden. Desen dach is gheheylicht den Heere onsen God, en wilt niet droeuich sijn noch en wilt niet weenen, want alle tvolc weende doen sij die woorden der wet hoorden,

10

Ende hy heeft tot hen gheseyt. ⁺Gaet henen eedt vette spijsen ende drinct soeten dranck ende sendt deelen den ghenen die voor hen seluen niet bereydt en hebben, want tis eenen heylighen dach des

+ C

[p. *366]

Heeren, ende en wilt niet bedroeft sijn, want des Heeren blijscap is onse stercheyt,

11

Ende die Leuiten maecten stilte onder alle tvolck segghende. Swijcht, want tis heden eenen heylighen dach, ende en wilt niet rouwich sijn,

12

Hierom is alle tvolc ghegaen dat sij eten ende drincken souden, ende dat sij deelen senden souden, ende maken groote blijscap, want sij hadden die woorden verstaen die hy hen gheleert hadde.

13

Ende op den tweeden dach sijn verghadert alle die princen der familien, van alle den volcke die priesters, ende Leuiten tot Esdram den scrijuer dat hi hen bedieden soude die woorden der wet,

14

⁺Ende sij hebben gheuonden bescreuen in die wet, dat die Heere beuolen hadde door Moyses hant, dat die kinderen van Israel in tabernakelen souden woonen, opden feestdach in die seuenste maent,

+ D

15

ende dat sij souden vercondighen ende openbaer wtroepen een stemme in alle hen steden ende in Ierusalem segghende. Gaet wt opden berch ende haelt tacken van olijfboomen, ende tacken vanden alderscoonsten boomen, tacken van myrtus boomen, ende tacken van palmboomen, ende tacken van boomen die veel van bladeren sijn, datmen tabernakelen maken mach ghelijc dat ghescreuen is,

16

Ende tvolc is wt ghegaen, ende sij hebbender ghehaelt, Ende sij hebben voor hen tabernakelen ghemaect een ieghelijc in sijn huys ende in sijn voorhouen, ende in die voorhouen van Godts huys, ende in die strate der waterpoorten, ende in die strate van Ephraims poorte,

17

Hierom heeft alle die verghaderinghe der gheender die wter gheuanghenissen comen waren tabernakelen ghemaect, ende hebben in die tabernakelen ghewoont, want van die daghen van Iosue Nuns sone, en hadden die kinderen van Israel also niet ghedaen tot op dien dach toe, Ende daer was een blijscap groot bouen maten,

18

Ende hy heeft ghelesen inden boeck der wet Gods tallen daghen vanden iersten daghe totten lesten dacht toe, ende sij hebben dat hoochtijt ghehouden seuen daghen ende opden achtsten dach een vergaderinghe des volcks nae die costume.