Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .vi. Capittel.

1

⁺ENde tis gheschiet dat doen Sanaballat gehoort hadde ende Tobias, ende Gossem die Araber ende die andere onse vianden dat ic die mueren opghericht hadde, ende datter gheenen scaert meer in was (hoe wel dat ick tot op dien tijt noch gheen doren ghestelt en hadde in die poorten)

+ A

2

soo hebben Sanaballat ende Gossem aen my ghesonden, segghende. Coemt ende laet ons tsamen een verbont maken met calueren opt velt Ono, Maer sij dachten dat sij my quaet doen souden,

3

Hierom heb ick boden tot hen ghesonden segghende. Ick make een groot werck ende ick en mach niet nederwaerts comen dat by auontueren het werck niet versuemt en worde als ic comen soude ende tot v lieden nederwaerts reysen,

4

Ende sij hebben aen my ghesonden met dese woorden vier reysen, ende ick heb hen gheantwoort nae dat ierste woort

5

⁺Ende Sanaballat heeft aen my ghesonden nae dat ierste woort die vijfste reyse sijnen knecht ende hy hadde eenen brief in sijn hant ghescreuen in deser manieren

+ B

6

Tis onder die Heydenen ghehoort, ende Gossem heeft gheseyt dat ghi ende die Ioden denct wederspannich te worden, ende dat ghy daerom die mueren optimmert, ende dat ghy v seluen wilt verheffen ouer hen tot eenen coninc,

7

om welcke sake ghi soudt propheten ghestelt hebben die van v openbaer spreken in Ierusalem, segghende. Daer is een coninck wt Ioetsche lant, Die coninc sal dese woorden hooren daerom coemt nv dat wi tsamen moghen raet nemen.

8

Ende ick heb tot hen ghesonden segghende. Ten is niet ghesciet nae die woorden die ghy spreect, Want wt v herte versierde ghy dese dinghen,

9

want alle dese veruaerden ons denckende dat onse handen souden ophouden vanden wercke ende dat wij rusten souden, ⁺Waerom dat ic te meer mijn handen versterct hebbe,

+ C

10

ende ben ghegaen int huys van Semaia den sone Delaie, des soons Metabeel bedectelijck, Die welcke heeft gheseyt. Laet ons onder ons tsamen spreken in dat huys Gods, int midden des tempels, ende sluyten die doeren des huys, want sij sullen comen om v te dooden, ende te nacht sullen sij comen om v doot te slaen,

11

Ende ick heb gheseyt. Heeft iemant mijns ghelijck gheuloden? ende wie mijns ghelijck sal inden tempel ghaen ende te leuen blijuen? Ick en sal daer niet ingaen,

12

Ende ic heb verstaen dat hem Godt niet ghesonden en hadde, maer dat hy tot my sprack als oft hi ghepropheteert hadde, ende dat Tobias ende Sanaballat hem ghehuert hadden,

13

want hy hadde loon daer op ontfanghen dat ickt veruaert sijnde doen soude, ende sondighen, ende dat sij eenich quaet hebben souden dwelc sij my mochten verwijten,

14

Weest mijnder ghedachtich Heere om Tobias ende Sanaballat nae sulcken haren wercken, ⁺ende oock Noadie des propheets ende der ander propheten die my veruaerden

+ D

15

Ende den muer is voldaen op den vijfentwintichsten dach der maent Elul, binnen tweenvijftich daghen.

16

Hierom eest gheschiet dat doen alle onse vianden ghehoort hadden, dat alle die Heydenen vreesden die rontsomme ons waren, ende dat hen den moet in hen seluen ontuiel, ende dat sij wel wisten dat dit werck van Godt ghedaen was,

17

Maer in dien daghen worden veel brieuen vanden besten ende treffelijcste der Ioden ghesonden aen Tobias, ende van Tobia quamen sij tot henlieden,

18

Want daer wasser vele in Iudeen die hem ghesworen hadden, want hy was een behoude sone van Sechenia des soons van Area, ende Iohanan sijn sone hadde ghetrout die dochter van Mosollam des soons Barachie,

19

ooc so presen sij hem voor my, ende mijn woorden bootscapten sij hem ouer, Ende Tobias sandt brieuen dat hy my veruaren soude.