Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .v. Capittel.

1

⁺ENde daer is worden een groot gheroep des volcs, ende haerder huysvrouwen teghen hen broeders den Ioden,

+ A

2

Ende daer warender die seyden. Onse sonen ende onse dochteren sijn bouen maten vele, laet ons voor haren prijs nemen tarwe dat wij eten, ende leuen moghen,

3

Ende daer warender die seyden. Laet ons onse ackerlanden ende wijngaerden ende onse huysen te pande stellen, ende tarwe nemen inden dieren tijt,

4

Ende die ander seyden. Laet ons ghelt ontleenen in des conincs trybuyten, ende laet ons gheuen ons ackerlanden ende wijngaerden,

5

ende nv ghelijc onser broederen vleesch alsoo is ons vleesch oock, ende ghelijck hen sonen alsoo sijn onse sonen ooc, siet wij stellen onse sonen ende dochteren in eyghendom tot slauernie, ende sommighe van onse dochteren sijn eyghen dienstvrouwen, ende wij en hebben niet waer mede sij souden moghen verlost worden, ende onse ackerlanden ende wijngaerden besitten ander lieden,

6

⁺Ende ic ben bouen maten seer gram gheworden doen ick hen gheroep ghehoort hadde, nae dese woorden,

+ B

7

Ende mijn herte heeft by sij seluen ghepeyst, ende ick heb die edelste mannen ende die wethouderen ghestraft ende hen gheseyt. Eyschte ghy elck woecker van uwen broeders? Ende ick heb teghen hen vergadert een groote vergaderinghe,

8

ende heb hen gheseyt Wij (alsoo ghy wel weet) hebben verlost onse broeders die Ioden die den Heydenen vercocht waren, na ons vermoghen, ende sult ghy daerom v broeders vercoopen ende wij sullen die lossen? Ende sij hebben ghesweghen, noch sij en hadden niet dat sij antwoorden mochten,

9

Ende ick heb tot hen gheseyt. Ten is gheen goet dinck dat ghy doet waerom en wandelt ghi niet in die vreese van onsen God dat ons dit niet verweten en worde vanden Heydenen onse vianden?

10

Ende ic, ende mijn broeders, ende mijn knechten hebben seer veel ghelts ende tarwe gheleent, en laet ons te samen dit niet weder om eysschen, tghelt datmen ons sculdich is laet ons noch borghen,

11

Gheeft henlieden wederom hen ackerlanden ende hen wijngaerden, ende hen olijfgaerden, ende hen huysen, ⁺Ende dat meerder is dat honderste deel van ghelde ende tarwe ende wijn ende olie die ghy van hen pleecht te eysschen, gheeft oock voor henlieden,

+ C

12

Ende sij hebben gheseyt. Wij sullen die wederom gheuen, ende van hen niet eysschen, ende wij sullen soo doen ghelijck ghy segghet. Ende ick heb die priesters gheroepen ende ick hebse besworen dat sij alsoo doen souden ghelijc ick gheseyt hadde,

13

Daer bouen soo heb ick mijnen schoot wtghescudt ende hebbe gheseyt. Alsoo moet die Heere wtscudden alle man die dit woort niet en volbrengt, van sijnen huyse, ende van sijnen arbeyde, alsoo moet hy wtghescudt worden ende dat hy ydel worde, Ende die gheheel menichte heeft gheseyt Amen, Ende sij hebben Gode gheloeft, Hierom heuet volc ghedaen ghelijc dat gheseyt was,

14

Ende van dien daghe dat die coninc mi gheboden hadde dat ic een ouerste soude wesen int lant van Iuda van dat twintichste iaer tot dat tweendertichste des conincs Artarexsis, ⁺binnen twaelf iaren so en hebben noch ic noch mijn broeders die iaerlijcsce cost rente diemen den princen sculdich is niet gheten,

+ D

15

maer dierste princen die voor my gheweest waren, hadden tvolck verlast ende hadden van hen ghenomen in broot,

[p. *364]

ende wijn, ende ghelt alle daghe veertich siclen, Ende hen dienaers hadden tvolc ooc verdruct, Maer ick en heb alsoo niet ghedaen om die vreese Gods,

16

Maer dat meer is ick heb ghetimmert int werck vanden mueren, ende gheenen acker en heb ic ghecocht, ende alle mijn knechten waren vergadert totten wercke,

17

Ende die Ioden ende wethouderen hondert ende vijftich mannen, ende die tot ons quamen van den Heydenen die rontsomme ons sijn, waren aen mijn tafel,

18

Ende voor my worde bereydt tot elcken daghen eenen osse, ses wtghecosen rammen, sonder dat gheuoghelte, ende binnen thien daghen versceyden wijnen, ende veel ander dinghen gaf ick, ende daer bouen en heb ick die cost renten van mijnder heerlijcheyt niet begheert, want tvolck was seer verarmt,

19

Weest mijns ghedachtich mijn Godt int goede, nae alle dat ic desen volcke ghedaen hebbe.